އެމްއެމްޕީއާރުސީގެ ހިޔާނާތުގެ މައްސަލައިގައި ވިލިމާލެ ދާއިރާގެ ކުރީގެ މެމްބަރު އަހްމަދު ނިހާން ހުސައިން މަނިކުގެ މައްޗަށް ދައުލަތުން އުފުލާފައިވާ ދައުވާތަކާއި ގުޅިގެން އިފްތިތާހީ ބަޔާން ހުށަހެޅުމަށް 7 ދުވަހުގެ މުއްދަތެއް ދީފިއެވެ.
އެމްއެމްޕީއާރުސީގެ ހިޔާނާތުގެ މައްސަލައިގައި ނިހާންގެ މައްޗަށް ރިޝްވަތު ހިފުމުގެ 3 ދައުވާއަކާއި ރިޝްވަތަށް އެދުމުގެ 2 ދައުވާއަކާއި، މަނީ ލޯންޑަރިންގެ ދައުވާއެއް އުފުލާފައިވާއިރު، އެ ދައުވާތަކުގެ ޝަރީއަތް ވަނީ ކްރިމިނަލް ކޯޓުގައި މީގެ 2 އަހަރުން ކުރިން ކްރިމިނަލް ކޯޓުގައި ފަށާފައެވެ.
ދެ އަހަރުވީ މި މައްސަލަ މާބޮޑަށް ކުރިއަށްދާ ގޮތްވެފައިނުވާއިރު، މިއަދުވެސް ވަނީ މި ދައުވާތަކާއި ގުޅިގެން އަޑުއެހުމެއް ބާއްވާފައެވެ.
މި މައްސަލައިގައި މީގެކުރިން ދައުވާ އިއްވުމާއި، ދައުވާއަށް ޖަވާބުދާރީވުމާއި، ހެކި ހާމަކުރުމާއި، ޝަރީއަތް ފެށުމުގެ ކުރިން ހުށަހެޅަންޖެހޭ ހުށަހެޅުންތައް ހުށަހެޅުމުގެ މަރުހަލާ ނިމިފައިވާއިރު މިއަދުގެ އަޑުއެހުމަށް ތާވަލުކުރީ އިފްތިތާހީ ބަޔާން އިއްވުމުގެ އަޑުއެހުމެކެވެ.
ނަމަވެސް މިއަދުގެ އަޑު އެހުމުގައި ނިހާންގެ ވަކީލު ވަނީ ހެއްކާ ބެހޭ އާ ގާނޫނުގެ ދަށުން ދައުލަތާއި ދިފާއުގެ ހެކި ލިސްޓު މުރާޖައާ ކުރުމަށް ފުރުސަތަކަށް އެދިވަޑައިގެންފައެވެ. ނަމަވެސް ގާޒީ އެ ފުރުޞަތު ނުދެއްވުމުން ނިހާންގެ ވަކީލު ވަނީ އިފްތިތާހީ ބަޔާނުގައި އެ ނުކުތާތައް ފާހަގަ ކުރެއްވުމުގެ ބޭނުމުގައި، އިފްތިތާހީ ބަޔާނަށް ތައްޔާރުވުމަށް އިތުރު ފުރުސަތެއް ދިނުމަށް އެދިވަޑައިގެންފައެވެ.
ދައުލަތުގެ ފަރާތުން އެކަމަށް އިއުތިރާޒު ނުކުރުން ގާޒީ ވަނީ އިފްތިތާހީ ބަޔާން ހުށަހެޅުމަށް 7 ދުވަހުގެ އިތުރު ފުރުސަތެއް ދެއްވާފައެވެ. އަދި ދެން އޮންނަ އަޑުއެހުމެއްގައި ޝަރީއަތުގެ ފަށާނެ ކަމަށްވެސް ގާޒީ ވިދާޅުވިއެވެ.
ރައީސް ޔާމީންގެ ވެރިކަމުގައި ވެރިކަންކުރި ޕީޕީއެމްގެ ޕާލިމެންޓްރީ ގްރޫޕްގެ ލީޑަރުގެ މަޤާމު އަދާކުރެއްވި ނިހާނަށް ދައުވާ ކުރަނީ ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރަކަށް ހުންނެވި ދުވަސްވަރު ކުރީގެ ނައިބް ރައީސް އަހްމަދު އަދީބުގެ ފަރާތްޕުޅުން ރިޝްވަތަށް އެދިވަޑައިގަތުމާއި ރިޝްވަތު ހިއްޕެވުމާއި އެގޮތަށް ހޯއްދެވި ފައިސާ ލޯންޑާރ ކުރެއްވުމުގެ ކުށުގައެވެ. ރިޝްވަތުގެ ގޮތުގައި ނިހާނަށް ލިބުނު ތަކެތީގެ ތެރޭގައި ރޮލެކްސް ބްރޭންޑްގެ ގަޑިއަކާއި އެއް ލައްކަ ފަންސާސް ހާސް ޑޮލަރު ހިމެނެއެެވެ. އަދި އެ ފައިސާ ލޯންޑަރކޮށްގެން ޕްލެޓިނަމް ރެސިޑެންޓް ފްލެޓެއް ގަނެފައިވާކަމަށްވެސް ދައުލަތުން ތުހުމަތުކުރެއެވެ. އަދި ދައުލަތުން ވަނީ ނިހާންގެ މިލްކިއްޔާތުގައި ޕްލެޓިނަމް ރެސިޑެންޓް ފްލެޓާއި، ރޮލެކްސް ބްރޭންޑްގެ ގަޑި ދައުލަތަށް ނެގުމަށްވެސް އެދިފައެވެ.