ތުރުކީވިލާތުގެ ދެކުނާއި ސޫރިޔާގެ އިރުމަތީ ސަރަޙައްދުތަކަށް އައި ބާރުގަދަ ބިންހެލުންތަކުގައި މަރުވި މީހުންގެ ޢަދަދު 24,500 އަށްވުރެ މައްޗަށް އަރައިފިއެވެ. ފެބްރުވަރީ 6 ވަނަ ދުވަހުގެ ދަންވަރުގެ ވަގުތުގައި އައި ބާރުގަދަ ބިންހެލުމުގައި ތުރުކީވިލާތުން 21,043 މީހުން މަރުވިއެވެ. އަދި، ސޫރިޔާގައި މަރުވި މީހުންގެ ޢަދަދު ވަނީ 3,553 އަށް އަރާފައެވެ. މި ޢަދަދު އަދިވެސް އިތުރުވާނެ ކަމަށް ބެލެވެއެވެ.
ރިކްޓަރ މިންގަނޑުން 7.8އާއި 7.5ގެ ބާރުމިނުގައި އައި ބިންހެލުންތަކުގައި ތުރުކީވިލާތުގައި އެކަނިވެސް 6,000 އަށްވުރެ ގިނަ ޢިމާރާތް ވެއްޓިފައިވާއިރު، ޢިމާރާތްތަކުގެ ދަށުން މަރުވެފައިވާ އިތުރު މީހުންގެ ހަށިތައް ދަނީ ފެންނަމުންނެވެ. ޢިމާރާތްތަކުގެ ދަށުގައި ތާށިވެފައިވާ އެތަކެއް ސަތޭކަ ބަޔަކު ދިރިތިއްބާ ސަލާމަތް ކުރެވިދާނެ ކަމުގެ އުންމީދު ފަނޑުވަމުންދިޔަ ނަމަވެސް، އެ މަސައްކަތް ހުއްޓުމެއް ނެތި ދަނީ ކުރަމުންނެވެ. އެ މަސައްކަތުގައި އެކި ޤައުމުތަކުން 100,000 އަށްވުރެ ގިނަ މީހުން ދަނީ ހަރަކާތްތެރިވަމުންނެވެ.
ބިންހެލުމުން އައިފަހުން 128 ގަޑިއިރަށްވުރެ ގިނަ ވަގުތު ފާއިތުވެފައިވާއިރު، ވެއްޓިފައިވާ ބައެއް ޢިމާރާތްތަކުގެ ކޮންކްރީޓްތަކާއި ފާރުތަކުގެ ދަށުން ބައެއް މީހުން ވަނީ ދިރިތިއްބާ ސަލާމަތް ކުރެވިފައެވެ. ތުރުކީވިލާތުގައި ވެއްޓިފައިވާ ޢިމާރާތެއްގެ ދަށުން ފެނިފައިވަނީ ކުޑަ ފިރިހެން ކުއްޖެކެވެ. އޭނާ މިހާރު ވަނީ ހޮސްޕިޓަލަށް ގެންގޮސް، ފަރުވާދޭން ފަށާފައެވެ.
ބިންހެލުމުގެ 115 ގަޑިއިރު ފަހުން ވެސް، ތުރުކީވިލާތުގެ ގަޒިއެންޓެޕްގައި ވެއްޓިފައިވާ ޢިމާރާތެއްގެ ދަށުން ވަނީ މާބަނޑު އަންހެނަކާއި އޭނާގެ އަންހެން ދަރިފުޅު ސަލާމަތް ކޮށްފައެވެ. ބިންހެލުން އިސްފައި ވަނީ ގަޒިއެންޓެޕް ކައިރިއަށެވެ. އެ ހާދިސާގައި އެ ރަށުގެ ބޮޑު ބައެއް ވަނީ ސުންނާފަތިވެފައެވެ. ބިންހެލުމުގެ 110 ގަޑިއިރު ފަހުން ވެސް، ތުރުކީވިލާތުން ޒުވާން އުމުރުފުރައިގެ އަންހެން ކުއްޖަކު ވަނީ ދިރިހުއްޓާ ފެނިފައެވެ. އޭނާ ސަލާމަތް ކޮށްފައި ވަނީ ކަހްރަމަންމަރާސްގެ ޢިމާރާތެއްގެ ދަށުންނެވެ.
ބިންހެލުން އައިސްފައިވާ ސަރަޙައްދަށް އަދިވެސް އިތުރު ލޮޅުންތައް އަންނަމުންދާ ކަމުގައި، ބިންހެލުންތައް ދިރާސާ ކުރާ އިދާރާތަކުން ބުނެއެވެ. ލޮޅުންތައް އެންމެ ބޮޑަށް އަންނަމުން ދަނީ ބިންހެލުން އައިސްފައިވާ ގަޒިއެންޓެޕް ސަރަޙައްދަށް ކަމުގައި ވެސް އޮފިޝަލުން ބުނެއެވެ.
ބިންހެލުމުގައި ސޫރިޔާގެ އުތުރުގެ ސަރަޙައްދުތައް ވެސް ވަނީ ސުންނާފަތިވެފައެވެ. އެ ސަރަޙައްދުގައި ހާލުގައި ޖެހިފައިވާ މީހުންގެ ޢަދަދު 5.1 މިލިޔަނަށްވުރެ އިތުރުވާނެ ކަމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން އަންދާޒާ ކުރެއެވެ. އެ ޤައުމުގައި ހާލުގައި ޖެހިފައިވާ މީހުންނަށް އިންސާނީ އެހީ ފޯރުކޮށްދިނުމަށް އ.ދ.އާއި އެހީދޭ ޤައުމުތަކުން ދަނީ މަސައްކަތް ކުރަމުންނެވެ.
ނަމަވެސް، އެންމެ އެކަށީގެންވާ ގޮތެއްގައި އެ ކަން ކުރެވެން ނެތް ކަމުގައި އެހީދޭ ޖަމުޢިއްޔާތަކުން ބުނެއެވެ. ބިންހެލުމުގައި އެންމެ ބޮޑެތި ގެއްލުންތައް ލިބިފައިވާ ސަރަޙައްދުތައް އޮތީ ސޫރިޔާގެ ސަރުކާރާ ދެކޮޅު ހަނގުރާމަވެރިންގެ ކޮންޓްރޯލްގެ ދަށުގައެވެ. އަދި، އެ ސަރަޙައްދުތަކަށް އެހީ ފޮނުވަން އޮތް މަގުތައް އޮތީ ބަންދުވެފައެވެ. ނުވަތަ ސުންނާފަތިވެފައެވެ.
ސޫރިޔާގެ އުތުރުގެ ސަރަޙައްދުތަކަށް އެހީ ފޯރުކޮށްދެވެން މިހާރު އޮތް ހަމައެކަނި މަގަކީ ތުރުކީވިލާތުން އެ ޤައުމަށް އެތެރެވުމެވެ. އެ ސަރަޙައްދުގައިވާ ބާބް އަލް-ޙަވާއަށް އެހީގެ ސާމާނު ހިފައިގެން ހަ ލޮރީއެއް މިހާރު ވެސް ދަތުރުކޮށްފައިވާއިރު، އިތުރު 14 ލޮރީއެއް ދަނީ ސޫރިޔާއަށް ދަތުރުކުރަން މަސައްކަތް ކުރަމުންނެވެ.
މި މަސައްކަތް ކުރިއަށްދާ ގޮތާއި، ސޫރިޔާގެ ރައްޔިތުންގެ ހާލަތު ބައްލަވައިލެއްވުމަށް ޑަބްލިޔު.އެޗް.އޯ.ގެ ޑިރެކްޓަރ-ޖެނެރަލް ޓެޑްރޯސް އަދަނޮމް ގެބްރިއޭސޮސް މި ވަގުތު ހުންނެވީ ސޫރިޔާގެ ޙަލަބުގައެވެ. ޙަލަބަށް ކުރައްވަމުން ގެންދަވާ ދަތުރުފުޅުގެ ޓެޑްރޯސް ވަނީ، ބިންހެލުމުގައި ޒަޚަމުވެފައިވާ މީހުންނަށް ފަރުވާދެމުންދާ ހޮސްޕިޓަލްތަކާއި، ގެދޮރުނެތިފައިވާ މީހުން ދިރިއުޅެމުންދާ ވަގުތީ ހިޔާތަކަށް ވަޑައިގަންނަވާފައެވެ.
"އަޅުގަނޑުމެން ޙަލަބަށް މި އައީ 35 ޓަނުގެ އެހީގެ ސާމާނު ހިފައިގެން. އަދި، އެ ތަކެތި، ހާލުގައި ޖެހިފައިވާ މީހުންނަށް ފޯރުކޮށްދޭން މި ދަނީ މަސައްކަތް ކުރަމުން،" ޓެޑްރޯސް ވިދާޅުވިއެވެ. މި ދަތުރުފުޅުގައި އޭނާ ވަނީ ސޫރިޔާގެ ޞިއްޙަތާ ބެހޭ ވަޒީރާއި ޙަލަބުގެ ގަވަރުނަރާ ވެސް ބައްދަލުކުރައްވާފައެވެ. އަދި، ހަނގުރާމަވެރިންގެ ބާރުގެ ދަށުގައި އޮތް ސަރަޙައްދުތަކަށް އެހީގެ ސާމާނު ފޯރުކޮށްދިނުމަށް އެހީތެރިވުމަށް އެދިވަޑައިގަންނަވާފައެވެ.
އ.ދ.ގެ އިންސާނިއްޔަތާއި އެހީއާ ބެހޭ އިދާރާގެ އަންޑަރ-ސެކްރެޓަރީ-ޖެނެރަލް މާޓިން ގްރިފިތްސް ވިދާޅުވީ، ތުރުކީއާއި ސޫރިޔާއަށް އައި ބިންހެލުމަކީ ފާއިތުވި 100 ވަރަކަށް އަހަރުގެ ތެރޭގައި އެ ސަރަޙައްދަށް ކުރިމަތިވި އެންމެ ނުރައްކާތެރި ހާދިސާ ކަމުގައެވެ. އޭނާވެސް މި ވަގުތު ހުންނެވީ ތުރުކީވިލާތުގެ ކަހްރަމަންމަރާސްގައެވެ. ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ކުރަމުންދާ މަސައްކަތްތައް އޭނާ ވަނީ ބައްލަވައިލައްވާފައެވެ.
މި ކާރިސާއަށް ޤައުމުތަކުން ދެމުންދާ އިޖާބައާއި އެހީތެރިކަމަށް އޭނާ ވަނީ ޝުކުރު އަދާކުރައްވާފައެވެ. އަދި، ސޫރިޔާއަށް ވަޑައިގަންނަވައި، އެ ޤައުމުގެ ސަރުކާރުގެ ބާރުގެ ދަށުގައި އޮތް ސަރަޙައްދުތަކުގެ އިތުރުން، ހަނގުރާމަވެރިންގެ އަތްދަށުގައިވާ ސަރަޙައްދުތަކަށް ދަތުރުކުރައްވައި، ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ކުރަމުންދާ މަސައްކަތްތައް ވިލަރެސްކުރުމުގައި އެހީތެރިވެދެއްވާނެ ކަމުގައި އޭނާ ވިދާޅުވިއެވެ.