ޔޫކްރެއިނުގެ ރައީސް ވޮލޮޑޮމީރް ޒެލެންސްކީ އިނގިރޭސިވިލާތާއި ބެލްޖިޔަމަށް ވަޑައިގަންނަވައި، ވިލާތުގެ އިއްތިހާދު (އީ.ޔޫ)ގެ އިސްވެރިންނާ ބައްދަލުކުރައްވައިފިއެވެ. އިނގިރޭސިވިލާތަށް ޒެލެންސްކީ ކުރެއްވި ދަތުރުފުޅަކީ، މީގެ 11 މަސް ކުރިން ފެށި ހަނގުރާމައަށް ފަހު ބޭރު ޤައުމަކަށް އޭނާ ކުރެއްވި ދެވަނަ ދަތުރުފުޅެވެ.
އިނގިރޭސި ބޮޑުވަޒީރު ރިޝީ ސުނަކާއެކު ބޭއްވެވި ބައްދަލުވުމުގައި ޒެލެންސްކީ ވަނީ ޒަމާނީ އަސްކަރީ މަތިންދާބޯޓުތައް ފޯރުކޮށްދިނުމަށް އެދިވަޑައިގަންނަވާފައެވެ. ޒެލެންސްކީ ގާބޫލުފުޅު ކުރައްވާ ގޮތުގައި، އެ ޤައުމަށް އަރައި ހަނގުރާމަ ކުރަމުންދާ ރަޝިޔާ ސިފައިން ފަހަތަށް ޖެއްސޭނީ ދުރުރާސްތާގެ މިސައިލާއި އަސްކަރީ މަތިންދާބޯޓުތައް ލިބިގެންނެވެ.
މި ބައްދަލުވުމުގައި ސުނަކް ވަނީ، ޔޫކްރެއިނަށް އަސްކަރީ އެހީތެރިކަން ފޯރުކޮށްދިނުމުގައި "ނޫނެކޭ" ބުނާނެ އެއްވެސް ފުރުޞަތެއް އެ ޤައުމަށް ނެތް ކަމުގައެވެ. އަދި، އެއްވެސް ވައްތަރެއް ހަތިޔާރެއް ޔޫކްރެއިނަށް ފޯރުކޮށްދޭން އެ ޤައުމުން ފަސް ނުޖެހޭނެ ކަމުގައި ވެސް އޭނާ ވިދާޅުވިއެވެ.
ނަމަވެސް، އެ ޤައުމަށް އަސްކަރީ މަތިންދާބޯޓު ފޯރުކޮށްދިނުމަކީ ފަސޭހަ ކަމަކަށް ނުވާނެއެވެ. ނޭޓޯގެ ޤައުމުތަކުން ބޭނުންކުރާ އަސްކަރީ މަތިންދާބޯޓުތަކުގެ ޕައިލެޓުން ތަމްރީނު ކުރުމަކީ ގިނަ ވަގުތު ހޭދަވާ ކަމެކެވެ. ނަމަވެސް، އިނގިރޭސިވިލާތުން ވަނީ، ޔޫކްރެއިނުގެ ޕައިލެޓުން ތަމްރީނު ކުރުމުގެ މަސައްކަތް ފެށުމަށް ތައްޔާރަށް އޮތް ކަން ހާމަކޮށްފައެވެ. އަދި، އެ ޤައުމަށް ފޯރުކޮށްދޭނެ މަތިންދާބޯޓުތަކާ ގުޅޭގޮތުން އެ ޤައުމުން މިހާރު ދަނީ މަސައްކަތް ކުރަމުންނެވެ.
2022 ވަނަ އަހަރުގެ ފެބުރުވަރީ 24ގައި ފެށި ހަނގުރާމައަށް 11 މަސް ފުރިފައިވާއިރު، އޭގެ ފަހުން އިނގިރޭސިވިލާތަށް ކުރެއްވި ފުރަތަމަ ދަތުރުފުޅުގައި ޒެލެންސްކީ ވަނީ ރަސްގެފާނު ޗާލްސް ތިންވަނައިގެ އަރިހަށް ވެސް ވަޑައިގަންނަވަފައެވެ. އިނގިރޭސިވިލާތަށް ފަހު އޭނާ ވަނީ ފަރަންސޭސިވިލާތަށް ވެސް ވަޑައިގަންނަވާފައެވެ. އަދި، ބެލްޖިޔަމްއަށް ވަޑައިގަންނަވައި، އީ.ޔޫ.ގެ އިސްވެރިންނާ ބައްދަލުކުރައްވާފައެވެ.
އީ.ޔޫ.ގެ އިސްވެރިން ޒެލެންސްކީއަށް ކިޔަފާއި ވަނީ ވިލާތުގެ ބަޠަލެއްގެ މަރުޙަބާއެކެވެ. މި ބައްދަލުވުމުގައި ވެސް ޒެލެންސްކީ އެދިވަޑައިގަންނަވާފައި ވަނީ، އެ ޤައުމަށް ފޮނުވަން އީ.ޔޫ.އާއި ނޭޓޯގެ ޤައުމުތަކުން ވަޢުދުވެފައިވާ ހަތިޔާރު ފޮނުވުމުގެ ކަންކަން އަވަސްކޮށްދިނުމަށެވެ. ހުސްއަތާ އެނބުރި ޤައުމަށް ވަޑައިގަންނަވަން ބޭނުންފުޅު ނުވާ ކަމުގައި ޒެލެންސްކީ ވިދާޅުވިއެވެ.
"ޔޫކްރެއިނުގެ ސިފައިން ދިފާޢު ކުރަމުން އެދަނީ ހަމައެކަނި ޔޫކްރެއިނެއް ނޫން. އެއީ، ނޭޓޯގެ ބޯޑަރު ވެސްމެ. ވިލާތުގެ ހުރިހާ ޤައުމެއްގެ ދިފާޢުގައި ޔޫކްރެއިނުގެ ސިފައިން އެ ދަނީ ހަނގުރާމަ ކުރަމުން،" ވިލާތުގެ ޤާނޫނު ހަދާ މަޖިލީހުގައި ތަޤުރީރު ކުރައްވަމުން ޒެލެންސްކީ ވިދާޅުވިއެވެ. އެއަށްފަހު އޭނާ ވަނީ އީ.ޔޫ.ގެ 27 މެންބަރު ޤައުމުގެ އިސްވެރިންނާ ވެސް ބައްދަލު ކުރައްވާފައެވެ.
ޔޫކްރެއިނުގެ އިރުމަތީގައިވާ ދޮންބާސް ސަރަޙައްދުގެ ރަށްތައް ހިފުމަށް ރަޝިޔާއިން އިތުރު މަސައްކަތްތައް ކުރަން ފަށާފައިވާ ކަމުގައި ޒެލެންސްކީ ވިދާޅުވިއެވެ. އަދި، އިތުރު ސިފައިންނާއި ހަތިޔާރު އެ ސަރަޙައްދުތަކަށް ފޮނުވައި، ވަރުގަދަ ހަމަލާތަކެއް ދެމުންދާ ކަމުގައި އޭނާ ވިދާޅުވިއެވެ. އެ ސަރަޙައްދުން ރަޝިޔާ ސިފައިން ފައްސައިލެވޭނީ، ދުރުރާސްތާގެ މިސައިލާއި ރޮކެޓް ލިބިގެން ކަމުގައި އޭނާ ގަބޫލުފުޅު ކުރައްވައެވެ.
އިރުމަތީގައިވާ ޑޮނެޓްސްކުގެ ދެ ރަށް ކަމުގައިވާ ބަޚްމުތާއި ވޫލެދާރް ހިފުމަށް މަސައްކަތް ކުރަމުންދާ ކަމުގައި ރަޝިޔާގެ ދިފާޢީ ވުޒާރާއިން ވެސް ވަނީ ބުނެފައެވެ. އެއީ، ސިނާޢީ މަސައްކަތްތައް ކުރާ ދެ ރަށް ނަމަވެސް، އެ ދެ ރަށް ރަޝިޔާގެ ކޮންޓްރޯލްގެ ދަށަށް ވެއްޓުމަކީ، އެ ސަރަޙައްދު ދިފާޢު ކުރުމަށް ހަނގުރާމަ ކުރަމުންދާ ޔޫކްރެއިން ސިފައިންނަށް ލިބޭ ބޮޑު ނާކާމިޔާބީއަކަށް ވާނެ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.