ސިނަމާލޭ ބްރިޖު ހައިވޭ މަތީގައި ނުރައްކާތެރި އެކްސިޑެންޓެެއް ހިނގައިފިއެވެ.
މި އެކްސިޑެންޓުގައި ޒަޙަމްވި މީހަކަށް އައިޖީއެމްއެޗް ހޮސްޕިޓަލުގައި މިވަގުތު އަންނަނީ ފަރުވާދެމުންނެވެ. ޕީ.އެސް.އެމް ނިއުސްއަށް މަޢުލޫމާތުދެމުން އައިޖީއެމްއެޗްއިން ވިދާޅުވީ، އެކްސިޑެންޓުގައި ޒަޙަމްވި ފިރިހެނަކު މީގެ ކުޑަވަގުތުކޮޅެއް ކުރިން ހޮސްޕިޓަލުގެ އިމަރޖެންސީއަށް ގެނެސް ފަރުވާ ދެމުންދާކަމަށެވެ. އަދި އޭނާގެ ޙާލު ސީރިއަސްކަމަށްވެސް ހޮސްޕިޓަލުން ވިދާޅުވެއެވެ.
ފުލުހުން ވިދާޅުވީ، ހައިވޭގައި ކާރަކާއި ސައިކަލެއް އެކްސިޑެންޓު ހިނގައިގެން އުޅޭ ސަރަޙައްދުގައި ފުލުހުން ހަރަކާތްތެރިވަމުންދާކަމަށެވެ. ނަމަވެސް އިތުރު ތަފްޞީލެއް ފުލުހުން ދެއްވާފައެއްނުވެއެވެ.
މި ޙާދިސާއާއި ގުޅިގެން ސޯޝަލް މީޑިއާގައި ދައުރުވަމުންދާ ފޮޓޯތަކުން ފެންނަގޮތުގައި ބޮޑެތި ޒަޙަމްތަކަކާއެކު މީހަކު ހައިވޭ މައްޗަށް ވެއްޓިފައިވާ މަންޒަރު ފެނެއެވެ. އަދި އެކްސިޑެންޓުވި ކާރާއި ސައިކަލަށްވެސް ބޮޑެތި ގެއްލުންތަކެއް ލިބިފައިވެއެވެ.