ޕްރައިމަރީގެ ނަތީޖާގައި މައްސަލަތަކެއް ހުރިކަމަށް ބުނެ، ނަތީޖާ ޝީޓުތައް ބަލާ ދިރާސާކުރަމުންދާކަމަށް ރައީސް ނަޝީދުގެ ކެމްޕެއިން ޓީމުން ވިދާޅުވެއްޖެއެވެ.
އެ ޓީމުން ނެރެފައިވާ ނޫސްބަޔާނެއްގައި ވިދާޅުވެފައިވަނީ ގިނަ ވޯޓު ފޮށިތަކުން ރައީސް ނަޝީދު އުޅުއްވަނީ ކުރީގައިކަމަށެވެ. ނަމަވެސް ރައީސް ސޯލިޙު ކުރި ހޯއްދަވާފައިވަނީ އާދަޔާ ޚިލާފަށް ވޯޓުލާފައިވާ ވަކި މަދު ފޮށިތަކެއްގެ ސަބަބުންކަމަށް ވަނީ ބުނެފައެވެ.
މި އިންތިޚާބުގައި 244 ވޯޓު ފޮށި ބަހައްޓާފައިވާއިރު، އޭގެތެރެއިން 234 ވޯޓު ފޮށި ގުނާ ވަގުތީ ނަތީޖާ ވަނީ އިޢުލާންކޮށްފައެވެ. މިހާރުގެ ނަތީޖާއަށް ބަލާއިރު ރައީސް ޞާލިޙަށް 23،000 އަށްވުރެ ގިނަ ވޯޓު ލިބިވަޑައިގެންފައެވެ. ރައީސް ނަޝީދަށް ލިބިވަޑައިގަތީ 15،000 ވޯޓެވެ. މިހާރުގެ ނަތީޖާއަށް ބަލާއިރު ރައީސް ޞާލިޙު އިންތިޚާބު ކާމިޔާބުކުރައްވާފައިވަނީ މިވަނީ %61 ވޯޓު ކާމިޔާބުކުރައްވައިގެންނެވެ. އަދި ރައީސް ނަޝީދަށް ލިބިވަޑައިގަތީ %39 ވޯޓެވެ.
މިއަދު ހަވީރު ރައީސް ނަޝީދު ކުރެއްވި ޓްވީޓެއްގައިވެސް ވަނީ ވޯޓު ފޮށިތައް ކައިރީގައި އެމަނިކުފާނު ފަރާތުން ތިބި ބައެއް އޮބްޒާވަރުން ފުލުހުން ހައްޔަރުކޮށްފައިވާކަމަށް ތުޙުމަތުކުރައްވާފައެވެ. އަދި އެމީހުން ދޫކޮށްލުމަށާއި، އިންތިޚާބު ގަޑުބަޑު ކުރާ މީހުންނާމެދު ފިޔަވަޅު އެޅުމަށް ވަނީ ގޮވާލައްވާފައެވެ.