އެމެރިކާގެ ކަޅު ނަސްލުގެ މީހަކު ހައްޔަރުކުރަން އުޅުމުގެ ތެރޭގައި އޭނާއަށް އަނިޔާކުރި ފަސް ފުލުހެއްގެ މައްޗަށް ދަޢުވާކޮށްފިއެވެ. އަނިޔާކޮށްފައި ވަނީ 29 އަހަރުގެ ޓަޔަރ ނިކޮލްސްއަށެވެ. އޭނާ ވަނީ ފަރުވާދެމުން ދަނިކޮށް މަރުވެފައެވެ. އޭނާއަށް އަނިޔާކުރި ފަސް ފުލުހުން، އެ ހާދިސާއަށް ފަހު ވަނީ ވަޒީފާއިން ވަކިކޮށްފައެވެ. މި ހާދިސާ ހިނގާފައި ވަނީ ޖަނަވަރީ 7 ވަނަ ދުވަހުއެވެ.
ޓެނެސީ ރަށެއް ކަމުގައިވާ މެމްފިސްގައި ހިނގި މި ހާދިސާގައި ޓަޔަރ ހައްޔަރުކުރަން ފުލުހުން މަސައްކަތް ކުރީ އެހެން މީހުންގެ ފުރާނައަށް ނުރައްކާވާ ގޮތަށް އެއްގަމު އުޅަނދެއް ދުއްވުމުގެ ކުށުގައެވެ. ފުލުހުން އޭނާ ހުއްޓުވަން މަސައްކަތް ކުރުމުން އޭނާ ވަނީ ފިލަން މަސައްކަތް ކޮށްފައެވެ. ނަމަވެސް، ފުލުހުން ވަނީ އޭނާ ހުއްޓުވައި، އޭނާއަށް އަނިޔާކޮށްފައެވެ. އޭނާ މަރުވީ، ޖަނަވަރީ 10 ވަނަ ދުވަހުއެވެ.
ޓަޔަރގެ ސިފަ ނޭނގޭ ވަރަށް ފުލުހުން އޭނާއަށް އަނިޔާކޮށްފައިވާ ކަމުގައި އޭނާގެ ޢާއިލާގެ ވަކީލު ބެން ކްރަމްޕް ކޯޓުގައި ބުންޏެވެ. މި ހާދިސާއާ ގުޅިގެން ފަސް ފުލުހުން ވަޒީފާއިން ވަކިކޮށްފައި ވަނީ، ހާލަތާ ނުބައްދަލު ބާރުގެ ބޭނުންކޮށްފައިވާ ކަން، ފުލުހުން ހިންގި ތަހުޤީޤަކަށް ހާމަވުމުންނެވެ. ޓަޔަރއަށް އަނިޔާކޮށްފައިވާ ފަސް ފުލުހުންނަކީ ވެސް ކަޅު ނަސްލުގެ މީހުންނެވެ.
މި ފަސް ފުލުހުންނަށް ދަޢުވާކުރުމާ އެކު، ފުލުހުންގެ އަނިޔާއާ ދެކޮޅަށް އަޑުއުފުލާ ފަރާތްތަކުން ވަނީ ކޯޓު ދޮށަށް އެއްވެ، ޚިޔާލުފާޅުކުރަން ފަށާފައެވެ. މި ކަމާ ގުޅިގެން ރައީސް ޖޯ ބައިޑަން ވަނީ، މުޒާހަރާކުރި ނަމަވެސް، ޢާންމު ހަމަޖެހުމާއި ސުލްޙަ ނަގައިނުލުމަށް މުޒާހަރާގެ ބައިވެރިންނަށް ގޮވައިލައްވާފައެވެ.
"ޓަޔަރގެ މަރުގެ ހިތާމައިގައި އަޅުގަނޑު ވެސް ބައިވެރިވަން. ޑިޕާޓްމަންޓް އޮފް ޖަސްޓިސްއިން އެ ދަނީ އެ އިދާރާގެ ޒިންމާތައް ފުރިހަމައަށް އަދާކުރަމުން. ޓަޔަރގެ ޢާއިލާއިން ވެސް ބޭނުން ވަނީ، މުޒާހަރާގެ ބައިވެރިން ހަމަޖެހުން ނަގައިނުލުމަށް. އަޅުގަނޑު ވެސް އެދެނީ އެ ގޮތް،" ބައިޑަން ވިދާޅުވިއެވެ.
ޓަޔަރއަށް އަނިޔާކުރި މަންޒަރު ދަށްކުވައިދޭ ވީޑިޔޯ ޢާންމު ކުރާނެ ކަމަށް އޮފިޝަލުން ވަނީ ބުނެފައެވެ. މިއީ، ފުލުހުންގެ އަނިޔާގެ ސަބަބުން އެމެރިކާގެ ކަޅު ނަސްލުގެ މީހަކު މަރުވި ފުރަތަމަ ފަހަރެއް ނޫނެވެ. 2020 ވަނަ އަހަރުގެ މޭ މަހު ޖޯޖް ފްލޮއިޑް ކިޔާ މީހަކު ވަނީ، ފުލުހުން އަނިޔާކުރުމުގެ ސަބަބުން މަރުވެފައެވެ. އެ ހާދިސާއާ ގުޅިގެން ފުލުހުންނާ ދެކޮޅަށް އެމެރިކާގެ އެކި ކަންކޮޅުތަކުގައި މުޒާހަރާކޮށްފައިވެއެވެ.
ޓަޔަރގެ މަރާ ގުޅިގެން ފަސް ފުލުހުންގެ މައްޗަށް އުފުލާފައި ވަނީ ގަސްދުގައި މީހަކު މެރުމުގެ ދަޢުވާއެވެ. އަދި، އަނިޔާކުރުމާއި ރަހީނުކުރުމުގެ ދަޢުވާ ވެސް އެ މީހުންގެ މައްޗަށް ވަނީ އުފުލާފައެވެ. މެމްފިސްއަކީ ޓެނެސީގެ ދެވަނައަށް އެންމެ ބޮޑު ރަށެވެ. އެ ރަށުގެ އާބާދީގެ 65 އިންސައްތައަކީ ކަޅު ނަސްލުގެ މީހުންނެވެ.