ޔުނިފޯމް އެޅި ފުލުހުންނާ ސިވިލް މުވައްޒަފުން ހިމެނޭހެން ވޭތުވެދިޔަ 4 އަހަރުގެތެރޭގައި 1000 އަކާއި ގާތްކުރާ އަދަދަކަށް ފުލުހުން ޚިދުމަތާއި ގުޅިފައިވާކަމަށް ހޯމް މިނިސްޓަރ އައްޝައިޚް ޢިމްރާން ޢަބްދުﷲ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، އައްޑޫ ސިޓީގައި ޤާއިމުކޮށްފައިވާ ފުލުހުން ތަމްރީންކުރާ މަރުކަޒުގައި ހިންގި ފުރަތަމަ އަސާސީ ތަމްރީން ޕްރޮގްރާމުގެ ނިމުން ފާހަގަކުރުމަށް ބޭއްވި ރަސްމިއްޔާތުގައެވެ.
ހޯމް މިނިސްޓަރ ޢިމްރާން ޢަބްދުﷲ ވިދާޅުވީ، ފުލުހުންގެ ޚިދުމަތް މަދަނީ މުއައްސަސާއަކަށް ބަދަލުވެ މިވީ 18 އަހަރުގެ ތެރޭގައި، މިހާރު މިދެކޭ ފަދަ ބޮޑު ކުރިއެރުމެއް ފުލުހުންގެ ޚިދުމަތަށް އައިސްފައި ނުވާކަމަށެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ވިސްނުންފުޅާއެކު ރާއްޖޭގެ ހުރިހާ ރަށެއްގައި ޕޮލިސް ޑެސްކުގެ ޚިދުމަތް ފަށާ، މިހާރު މިސްރާބު ފަށާފައި ވަނީ އަތޮޅުތަކުގެ ފުލުހުންގެ ޚިދުމަތުގެ އިންޤިލާބީ ބަދަލަކާ ދިމާލަށްކަމަށް މިނިސްޓަރ ވިދާޅުވިއެވެ.
އެގޮތުން އަތޮޅުތަކުގެ 61 ރަށުގައި ޕޮލިސް ސްޓޭޝަން ޤާއިމުކުރަން ސަރުކާރުން ނިންމާފައިވާ ނިންމުމާއެކު، އަތޮޅުތަކުގައި އަމަން އަމާންކަން ބެލެހެއްޓުމުގެ މަސައްކަތް އެތަށް ގުނައަކަށް ފުޅާވެގެންދާނެކަމަށް މިނިސްޓަރ ވިދާޅުވިއެވެ.
ފުލުހުންގެ ޚިދުމަތަށް ނިކުންނަ ފުލުހުންނަކީ 21 ވަނަ ޤަރުނަށް ހޭލުންތެރި، ހުނަރުވެރި ބައެއްގެ ގޮތުގައި ނެރުމަށް، އައްޑޫ ސިޓީގައި ޤާއިމުކުރި ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓަކީވެސް ޙާސިލުކުރެވުނު ބޮޑު ކާމިޔާބީއެއްކަމަށް ޢިމްރާން ވިދާޅުވިއެވެ.
މިނިސްޓަރ ވިދާޅުވީ އިންސާނީ ވަސީލަތާއި އުމްރާނީ ވަސީލަތުގެ ޙާލަތު، މި ސަރުކާރު ހަވާލުވިއިރު އޮތީ ވަރަށް ދަށްކޮށްކަމަށެވެ. އެގޮތުން މުޅި ރާއްޖޭގައި ފުލުހުންގެ ޚިދުމަތް ބޭނުންވާ މިންވަރާ އަޅަބަލާއިރު، އެކަށީގެންވާ މިންވަރާ ގާތަށްވެސް އިންސާނީ ވަސީލަތް ޤާއިމުވެފައި ނެތްކަމަށާއި ނަމަވެސް މިއަދު ޙާލަތު ތަފާތުކަން މިނިސްޓަރ ފާހަގަކުރެއްވިއެވެ.
"ފުލުހުންގެ ޚިދުމަތް ފުޅާކުރުމަށް ރައީސް ފައްޓަވާފައިވާ ބޮޑު މަސައްކަތަކުގައި، ފުލުހުންގެ ޚިދުމަތަށް ހުނަރުވެރި ޤާބިލު މުވައްޒަފުން އިތުރުކުރެވިއްޖެ. ޔުނީފޯމް އެޅި މުވައްޒަފުންނާ، ސިވިލް މުވައްޒަފުންން ހިމެނޭހެން 1000 އާއި ގާތްކުރާ އަދަދަކަށް މުވައްޒަފުން އިތުރުކުރެވިއްޖ." މިނިސްޓަރ ޢިމްރާން ވިދާޅުވިއެވެ.
ހޯމް މިނިސްޓަރ ޢިމްރާން ވިދާޅުވި ފުލުހުންގެ ޚިދުމަތް އިސްލާހުކުރުމަށް ފަށްޓަވާފައިވާ މަސައްކަތުގައި، ފުލުހުންގެ ލީޑަރޝިޕް ހަރުދަނާކުރުމަށްވެސް ގިނަ މަސައްކަތްތަކެއް ކުރެވިއްޖެކަމަށެވެ. އަދި ފުލުހުންގެ ސަފުތަކަކީ އެއީ ހަރުދަނާ ބަދަހި ސަފަކަށް ހެދިއްޖެކަމަށް މިނިސްޓަރ ވިދާޅުވިއެވެ.
"ސަރުކާރު ބަދަލުވާ ކޮންމެ ފަހަރަކު ފުލުހުން ލީޑަރޝިޕުން 10،12 ބޭފުޅުން މުއައްސަސާ ދޫކޮށް ދާންޖެހުމުގެ ސަޤާފަތެއް އޮތް. ލީޑަރޝިޕް އޮތީ ނިކަމެތިކޮށް. އެހެން އޮއްވާ ރައީސް އިބްރާހީމް މުޙައްމަދު ޞާލިޙުގެ މަސައްކަތްޕުޅުން، ލީޑަރޝިޕް ހަރުދަނާވެ ބަދަހިވެއްޖެ" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މުޖުތަމަޢުގެ އަމަން އަމާންކަން ބެލެހެއްޓުމުގެ ބޮޑު ޒިންމާ އެޅިފައި އޮތީ ފުލުހުންނަށްކަމަށެވެ. އެހެންކަމުން މުޖުތަމަޢުގެ އަމާންކަން ދެމެހެއްޓުމާއި އިންސާނީ ކަރާމާތަށް ފުރިހަމައަށް ރައްކާތެރިވުމަށް މިނިސްޓަރ ވަނީ ފުލުހުންގެ ކިބައިން އެދިލައްވާފައެވެ. އަދި ކޮންމެ ފުލުހަކީ ޒަމާނީ ބަދަލަށް އަހުލުވެރި ހުނަރުވެރި ބަޔަކަށް ހެދުމަށް ފުރިހަމައަށް މަސައްކަތްކުރުމަށް އެމަނިކުފާނު ގޮވާއްލެވިއެވެ.