މާލެ ސަރަޙައްދުން ގޯތި ހޯދުމަށް އެދި ހުށައެޅި ފޯމުތަކުގެ މަޢުލުމާތުގެ ސައްޙަކަން ދެނެގަތުމަށް ކުރިއަށްދާ އިވެލުވޭޝަންގެ މަސައްކަތް ފެބްރުއަރީމަހުގެ ފަހުކޮޅަށް ނިމޭނެކަމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ވިދާޅުވެއްޖެއެވެ. ފައިނަލް ލިސްޓް އިޢުލާނުކޮށް ގޯތި ހަވާލުކުރެވޭނެކަމަށް ސަރުކާރުން ހާމަކޮށްފައިވަނީ މިއަހަރުގެ މެދުތެރެއަށެވެ.
މާލެ ރައްޔިތުންނަށް ޚާއްސަކޮށް މާލެ ސަރަޙައްދުން 5000 ގޯތި ދޭނެކަން ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު އިޢުލާންކުރެއްވީ މިދިޔަ އަހަރުގެ ރިޔާސީ ބަޔާނުގައެވެ. މީގެތެރެއިން ފުރަތަމަ ދޫކުރާ 3000 ގޯތި ދޫކުރަނީ ހުޅުމާލެއާއި ގުޅީފަޅުންނެވެ. އެއީ ހުޅުމާލެ ދެވަނަ ދިޔަވަހިން ދޫކުރާ 1000 ގޯތި އަދި ގުޅީފަޅުން ދޫކުރާ 2000 ގޯއްޗެވެ. މާލެ ރައްޔިތުންނަށް ޚާއްސަކޮށް 3000 ގޯއްޗަށް ކުރިމަތިލުމަށް ހުޅުވާލި ފުރުޞަތުގެ މުއްދަތުގައި 15،000 އަށްވުރެ ގިނަ ފޯމު ހުށައެޅިއެވެ.
މީގެއިތުރުން ހުޅުމާލެއިން 4000 ފްލެޓް ތަރައްޤީކުރުުމުގެ މަސައްކަތް ދަނީ ކުރިއަށްގެންދަމުންނެވެ. ފްލެޓަށް ހުޅުވާލީ މާލޭގައި ދިރިއުޅޭ އެހެން ރަށްރަށުގެ މީހުންނަށްވެސް ކުރިމަތިލެވޭގޮތަށެވެ. މި ޕްރޮޖެކްޓުން ފްލެޓް ހޯދުމަށް 20،000 އަށްވުރެ ގިނަ މީހުން ފޯމު ހުށައެޅިއެވެ.
މާލެ ސަރަޙައްދުން ދޫކުރާ ގޯއްޗާއި ފްލެޓް ލިބޭ މީހުންގެ ދާއިމީ ލިސްޓް އަހަރުގެ މެދުތެރެއަށް ދިއުމުގެ ކުރިން އިއުލާންކުރާނެކަމަށް ސަރުކާރުން ވަނީ ހާމަކޮށްފައެވެ. އަދި މިމަހުގެ 8 ވަނަ ދުވަހު، ނ. ވެލިދޫގައި ބޭއްވި ޖަލްސާއެއްގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވަނީ، މާލެއިން ދޫކުރާ 5000 ގޯތި މިއަހަރު މެދުތެރޭގައި ހަވާލުކުރާނެކަމުގެ ޔަޤީންކަން ދެއްވާފައެވެ.
ގޯތި ލިބޭ މީހުންގެ ލިސްޓް އެކުލަވާލުމުގެ މަސައްކަތްތައް ކުރިއަށްދާ ގޮތާއި ގުޅޭގޮތުން ޕްލޭނިންގ މިނިސްޓްރީއިން ވިދާޅުވީ، ގޯއްޗާއި ފްލެޓް ލިބޭ މީހުންގެ ލިސްޓް އެކުލަވާލުމުގެ މަސައްކަތް ކުރިއަށްގެންދަނީ ދެ ބަޔަކަށް ކަމަށެވެ.
އެގޮތުން މިހާރު ކުރިއަށްދަނީ މީގެ ފުރަތަމަ މަރުހަލާ، ފޯމުތަކުގައިވާ މަޢުލޫމާތުގެ ސައްޙަކަން ދެނެގަތުމަށް ކުރިއަށްގެންދާ އިވެލުއޭޝަންގެ މަސައްކަތްކަމަށް މިނިސްޓްރީން ވިދާޅުވެއެވެ. މި މަސައްކަތް ވަރަށް ބާރަށް ކުރިއަށްދާކަމަށް މިނިސްޓްރީއިން ވިދާޅުވިއެވެ. މިބައިގައި ކުރިއަށްދަނީ ފޯމުގައި ހިމަނާފައިވާ މަޢުލޫމާތާއި، ހުށައަޅާފައިވާ ލިޔެކިޔުންތަކުގެ ސައްޙަކަން ދެނެގަތުމެވެ. އިވެލުއޭޝަންގެ މަސައްކަތް ފެބްރުއަރީމަހުގެ ފަހުކޮޅަށް ނުވަތަ މާރިޗުމަހުގެ ފުރަތަމަ ހަފްތާއަށް ނިންމާނެކަމަށް ހައުސިންގ މިނިސްޓްރީއިން ވިދާޅުވެއެވެ.
ފޯމްތަކަށް މާކްސްދޭނީ މި މަރުހަލާއަށް ފަހުގައެވެ. އަދި ވަގުތީ ލިސްޓް އިއުލާންކޮށް، ފައިނަލް ލިސްޓް ނެރޭނީ ޝަކުވާ ހުށައެޅުމުގެ ފުރުޞަތަށް ފަހުގައެވެ.
ސަރުކާރުން އިއުލާންކޮށްފައިވާ 5000 ގޯތީގެ ތެރޭގައި ދެން ހިމެނެނީ، މާލެ އަތޮޅު ގިރާވަރު ފަޅު ހިއްކާ އެތަނުން ދޫކުރާ 2000 ގޯއްޗެކެވެ. ގިރާވަރު ފަޅު ހިއްކުމުގެ މަސައްކަތް ނިންމާ، އަހަރުގެ މެދުތެރޭގައި އެތަނުންވެސް ގޯތި ދޫކުރައްވާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.
މާލެ ސަރަޙައްދުގެ ބޯހިޔާވަހިކަމުގެ މަޝްރޫޢަކީ މި ސަރަޙައްދުގެ ރައްޔިތުން އެންމެ ބޮޑަށް އިންތިޒާރުކުރާ މަޝްރޫޢުއެވެ. މާލޭގެ ރައްޔިތުންނަށް އެންމެ ފަހުން ގޯތި ދޫކުރިމަކަމަށް އިނގެން އޮތީ މީގެ ސާޅީހަކަށް އަހަރު ކުރިންނެވެ.