އިންޓަރނޭޝަނަލް ޓީޗަރސް ކޮންފަރެންސް ކުޅުދުއްފުށި ސިޓީގައި ބޭއްވުމަށް ތައްޔާރުވެއްޖެއެވެ. މިފަހަރުގެ ކޮންފަރެންސް ކުރިއަށްދާނީ މިމަހުގެ 24 އިން 25 ކުޅުދުއްފުށި ސިޓީގައި ހުންނަ ދިވެހިރާއްޖޭގެ ޤައުމީ ޔުނިވަރސިޓީގެ ކެމްޕަހުގައެވެ.
ނެޝަނަލް އިންސްޓިޓިއުޓް އޮފް އެޑިއުކޭޝަން، އެން.އައި.އީން ކޮންމެ 2 އަހަރުން އެއް އަހަރު ބާއްވާ އިންޓަރނޭޝަނަލް ޓީޗަރސް ކޮންފަރެންސަކީ ޓީޗަރުންނަށް އަމާޒުކޮށްގެން ރާއްޖޭގައި ބާއްވާ މިފަދަ އެންމެ ބޮޑު ކޮންފަރެންސެވެ. މިއީ މިކޮންފަރެންސް ބާއްވާ 6 ވަނަ ފަހަރެވެ. މި ކޮންފަރެންސް ބާއްވާގޮތަށް ކުރިން ހަމަޖެހިފައިއޮތީ މިދިޔަ އޮކްޓޫބަރުމަހުގެ 9 އިން 10 އަކަށެވެ.
މިފަހަރުގެ ކޮންފަރެންސްގެ ތީމަކަށް ކަނޑައަޅާފައިވަނީ "އެޑިއުކޭޝަން ފޯރ ކަރަންޓް ޕާރސްޕެކްޓިވް އެންޑް ފިއުޗަރ ޑައިރެކްޝަންސް" އެވެ. މި ތީމް ޚާއްސަ ކުރެވިފައި ވަނީ މިހާރު ބައިނަލްއަޤުވާމީގޮތުން ދުނިޔެއަށް އައިސްފައިވާ ބަދަލުތަކާއި، މިހާރު އަހަރުމެން ދިރިއުޅެމުންދާ އިންޑަސްޓްރިއަލް ރިވެލިއުޝަންކަމަށްވާ، 4 ވަނަ އިންޑަސްޓްރިއަލް ރިވެލިއުޝަން (އިންޑަސްޓްރީ 4) އާއި ގުޅުވައިގެންނެވެ.
އެން.އައި.އީން ވިދާޅުވީ، މިފަހަރުގެ ކޮންފަރެންސް މައިގަނޑު ގޮތެއްގައި އަމާޒުކޮށްފައިވަނީ މިހާރުގެ ތަޢުލީމީ ދާއިރާ އޮތްގޮތާއި ކުރިއަށްއޮތް ތަނުގައި ތަޢުލީމް ފޯރުކޮށްދިނުމަށް ކުރާނެ މަސައްކަތްތަކަށްކަމަށެވެ. އަދި މިފަހަރުގެ ކޮންފަރެންސްގައިވެސް ދިރާސީ ކަރުދާސްތައް ހުށައެޅުމުގެ ފުރުޞަތު އޮންނާނެކަމަށެވެ.
6 ވަނަ އިންޓަރނޭޝަނަލް ޓީޗާރސް ކޮންފަރެންސްގައި ރާއްޖޭގައި ތިބި ތަޢުލީމީ ދާއިރާގެ ތަޖުރިބާ ކާރުންނާއި، ބޭރުގެ ތަޖުރިބާކާރުން ކީ ނޯޓް ސްޕީކަރުންގެ ގޮތުގައި ބައިވެރިވާނެ ކަމަށް އެން.އައި.އީން ވިދާޅުވެއެވެ.
އިންޓަރނޭޝަނަލް ޓީޗަރސް ކޮންފަރެންސްގެ ފުރަތަމަ 4 ކޮންފަރެންސްވެސް ބާއްވާފައިވަނީ މާލޭ ސިޓީގައެވެ. އެއަށްފަހު 2019 ވަނަ އަހަރު ބޭއްވި 5 ވަނަ ކޮންފަރެންސް ކުރިއަށްގެންގޮސްފައިވަނީ އައްޑޫ ސިޓީގައެވެ. އެންމެފަހުން ބޭއްވި ކޮންފަރެންސްއަށް 87 ކަރުދާހެއް ހުށަހަޅާފައިވެއެވެ. ކޯވިޑް-19ގެ ސަބަބުން 2021 ވަނަ އަހަރު މި ކޮންފަރެންސް ބާއްވާފައެއްނުވެއެވެ.
ޓީޗަރުންނަށް އަމާޒުކޮށްގެން ބާއްވާ މިކޮންފަރެންސަކީ ސްކޫލްތަކުގައި މަސައްކަތް ކުރާ ޓީޗަރުންގެ މެދުގައި ދިރާސާ ކުރުމުގެ ސަޤާފަތެއް ޤާއިމުކުރުމަށާއި، ޢިލްމީ މަސައްކަތް ކުރާ ބައިނަލްއަޤްވާމީ ފަރާތްތަކަށް ރާއްޖެ ހުޅުވާލުމަށް ކުރިއަށްގެންދާ ކޮންފަރެންސްއެކެވެ. މިކޮންފަރެންސް މެދުވެރިކޮށް ރާއްޖެއާއި ރާއްޖެއިން ބޭރުގެ ފަރާތްތަކަށް އެމީހުންގެ މަސައްކަތްތައް ހިއްސާކުރާނެ ޕްލެޓްފޯމެއް ހުޅުވައިދީ، ހުށަހެޅޭ ޢިލްމީ ދިރާސާތަކާއި މަސައްކަތްތަކުގެ އަލީގައި ސްކޫލްތަކުގެ ކިޔަވައިދިނުމަށް ރަނގަޅު ބަދަލުތަކެއް ގެނައުމަކީ މިކޮންފަރެންސް ބޭއްވުމުގެ މުހިއްމު މަޤުޞަދެއް ކަމަށް އެން.އައި.އީން ވިދާޅުވެއެވެ.