އިންޑޮނީޝިޔާގެ މައި ރަށް ކަމުގައިވާ ޖާވާއަށް ރިކްޓަރ މިންގަނޑުން 5.6ގެ ބާރުގަދަ ބިންހެލުމަށް އައިސް 162 މީހުން މަރުވެއްޖެއެވެ. މި ބިންހެލުން އައިސްފައި ވަނީ ހުޅަނގު ޖާވާގެ ޝިއަންޖުރް ކިޔާ ސަރަޙައްދަކަށެވެ. ބިންހެލުމުގައި އެ ސަރަޙައްދުގެ ޢިމާރާތްތަކަށް ބޮޑެތި ގެއްލުންތަކެއް ލިބުނެވެ.
މި ބިންހެލުމުގެ އަސަރު ވެރިރަށް ޖަކަރްތާއަށް ވެސް ފޯރާފައިވާ ކަމުގައި އެމެރިކާގެ ޖިއޮލޮޖިކަލް ސަރވޭއިން ބުނެއެއެވެ. އަދި، ބިންހެލުމުގެ ލޮޅުންތައް ފެށުމާއެކު ޖަކަރްތާގެ ޢިމާރާތްތައް ވެސް ވަނީ ހުސްކޮށްފައެވެ. ބިންހެލުމުގައި ޝިއަންޖުރުގެ 1,000 އަށްވުރެ ގިނަ ޢިމާރާތަށް ގެއްލުން ލިބުނު ކަމުގައި އޮފިޝަލުން ބުނެއެވެ.
ބިންހެލުމާ ގުޅިގެން ކުރިމަތިވި ހާދިސާތަކުގައި 300އަށްވުރެ ގިނަ މީހުންނަށް އަނިޔާވި ކަމަށް ވެސް އޮފިޝަލުން ބުނެއެވެ. މީގެ ތެރޭގައި ގިނައީ ހަށިގަނޑުގެ ތަންތަން ބިނދިފައިވާ މީހުންނެވެ. އަދި، ބައެއް ޢިމާރާތްތަކުގެ ދަށުގައި މީހުން ތާށިވެފައިވާ ކަމަށް ވެސް އޮފިޝަލުން ބުނެއެވެ. ބައެއް ސަރަޙައްދުތަކުގެ ބިންގަނޑު ވެސް ވަނީ ކަނޑައިގެން ގޮސްފައެވެ.
މި ބިންހެލުމާ އެކު އެ ސަރަޙައްދަށް އިތުރު ލޮޅުންތައް އަރާނެ ކަމުގައި އިންޑޮނީޝިޔާގެ އިދާރާތަކުން ބުނެއެވެ. އަދި، މި ވަގުތަށް އެންމެ ރައްކާތެރި ގޮތަކީ ޢިމާރާތްތަކުގެ ބޭރުގައި ނިދުން ކަމަށް އޮފިޝަލުން ބުނެއެވެ. 2021ވަނަ އަހަރުގެ ޖަނަވަރީ މަހު ވެސް އިންޑޮނީޝިޔާއަށް ބާރުގަދަ ބިންހެލުމެއް އައެވެ. ސުލަވޭސީއަށް ރިކްޓަރ މިންގަނޑުން 6.2ގެ ބާރުމިނުގައި އައި ބިންހެލުމާ ގުޅިގެން 100އަށްވުރެ ގިނަ މީހުން މަރުވިއެވެ.