އާއިލީ މައްސަލަތަކަށް ހައްލު ހޯދުމުގެ މައި ތަޅުދަނޑިއަކީ ގާތްކަމާއެކު ކުރެވޭ މުޢާމަލާތްކަމަށް ދީނީ އިލްމުވެރިޔާ މުފްތީ މެންކް ވިދާޅުވެއްޖެއެވެ. މެންކް ވިދާޅުވީ ކައިވެނިތައް ރޫޅުމުގެ އެންމެ ބޮޑު އަސްލަކީވެސް، އެކަށޭނަ މުޢާމަލާތެއް ނުކުރުމާއި، ކަންކަމަށް ހައްލު ހޯދުމަށް މަސައްކަތް ނުކުރުންކަމަށެވެ.
މުފްތީ މެންކް ރާއްޖެއަށް ކުރައްވާ ދަތުރުފުޅުގެ އެންމެ ފަހު ދަރުސް ބާއްވާފައިވަނީ ހުޅުމާލޭގައެވެ. މި ދަރުސްގެ މަޢުޟޫއަކީ "އާއިލީ މައްސަލަތަކާއި ކުމަތިލާނެގޮތް" މި މަޢުޟޫއެވެ.
އާއިލީ މައްސަލަތަކާއި ގުޅޭގޮތުން ދެއްވި ދަރުސްގައި މެންކް ވިދާޅުވީ، ޒަމާނާއި ދިރިއުޅުމުގެ ހާލަތަށް އައި ބަދަލުތަކާއެކު، މައްސަލަތަކާއި މައްސަލަތަކަށް ހައްލު ހޯދުމަށް މަސައްކަތްކުރަންޖެހޭ ގޮތްވެސް ތަފާތުވެއްޖެކަމަށެވެ.
މެންކްގެ ވާހަކަ މައިގަނޑުގޮތެއްގައި ބިނާކުރެއްވީ ކައިވެނީގެ މައްސަލަތަކަށެވެ. ކައިވެންޏަކީ ވެވޭ ވަރަށް ބޮޑު ޤުރުބާނީއެއްކަމަށާއި، ކައިވެނި މަތީގައި ދެމިތިބުމަށް ވާންޖެހުނު ކޮންމެ ޤުރުބާނީއެއް ވުމަކީ ދީން ބާރުއަޅާގޮށްކަމަށް ވިދާޅުވިއެވެ. އިސްލާމް ދީނުގައި ވަރި ހުއްދަަ ކުރެއްވި އެންމެ ބޮޑު ސަބަބަކީ، ޖިސްމާނީ ގޮތުން ލިބޭ އަނިޔާގެ ހާލަތުގައި އެކަމުން ސަލާމަތްވާނެ މަގެއް ތަނަވަސްކޮށްދިނުންކަމަށް މެންކް ވިދާޅުވިއެވެ.
މެންކް ވިދާޅުވީ ދެމަފިރިންގެ ދެމެދުގައި ޖެހޭ މައްސަލަތަކަކީ މުޅި ދުނިޔެއަށް އެނގެންޖެހޭ ކަމެއް ނޫންކަމަށެވެ. ވަކި ވަރަކަށް ހާލަތު ގޯސްނުވާނަމަ، އެކަން ހައްލު ކުރަންވާނީ ދެމީހުންގެ ދެމެދުގައި މުޢާމަލާތްކޮށްގެންކަމަށެވެ. ޒާތީ ވާހަކަތައް އެހެން މީހުންގެ ގާތުގައި ދެއްކުމަކީ އެހެން މީހުންގެ ޙަސަދަވެރިކަން އިތުރުވެ އިތުރު މައްސަލަތަކަކަށް ހުށައެޅިދާނެ ކަމަކަށް ވެދާނެކަމަށެވެ.
ނަމަވެސް ވަރިވާން ގަސްތުކުރާ ހާލަތަށް ކަންކަންދާނަމަ، އެކަން އާއިލާގެ ނުވަތަ އިތުބާރު ކުރެވޭ މީހަކަށް ކިޔައިދީ ހާލަތަށް ހައްލުު ހޯދާ، ކައިވެނި ދެމެހެއްޓުމަށް ކޮންމެހެން މަސައްކަތް ކުރަންޖެހޭކަމަށް މެންކް ވިދާޅުވިއެވެ.
"ވަރީގެ މިންވަރު ދަނީ ވަރަށް ބޮޑަށް އިތުރުވަމުން. ކައިވެންޏާ، ދަރިންނާ އާއިލާ އަދި އިންސާނިއްޔަތަށްޓަކާވެސް ކައިވެނި ދެމެހެއްޓުމަށް، މައްސަލަތައް ހައްލުކުރަން މަސައްކަތްކުރަންޖެހޭ. ކައިވެންޏަކީ ވަރަށް ބޮޑު ޤުރުބާނީއެއް." މެންކް ވިދާޅުވިއެވެ.
މެންކް ވިދާޅުވީ އާއިލާގެ ކަންކަމުގައި ދެމަފިރިންގެ ހިއްސާ އެއްވަރަކަށް ބާއްވަންޖެހޭކަމަށެވެ. އަދި ވަރިވާން ޖެހޭ ހާލަތެއް މެދުވެރިވިނަމަވެސް، ދަރިންގެ ހިތުގައި މަންމަ ނުވަތަ ބައްޕައާއި މެދު ނަފްރަތު އުފައްދާ، ދަރިން ހަތިޔާރެއްގެ ގޮތުގައި ބޭނުންކުރުމަކީ ވަރަށް ގޯސް ޢަމަލެއްކަަމަށެވެ.
މުފްތީ ވިދާޅުވީ ދަރިން ކައިވެނި ކުރަން އިޚްތިޔާރުކުރާ މީހުންނަކީ ކޮބައިކަން ބެލެނިވެރިން ބަލަންޖެހޭނެކަމަށެވެ. އެރޭންޖް މެރޭޖް ނުވަތަ، މައިންބަފައިން ދަރިންނަށް ހަޔާތުގެ ބައިވެރިއަކު ހޯދާ ހާލަތުގައިވެސް، ދެ ޢާއިލާގެ ދެމެދު މުޢާމަލާތްކޮށް، އެކަކު އަނެކަކު ދަސްކުރުން މުހިންމުކަމަށެވެ. ގަދަކަމުން ދަރިން މީހުންނާ ދެވުމަކީ، ރަނގަޅުގޮތް ނޫންކަމަށް މެންކް ވިދާޅުވިއެވެ.
އަދި އެއްވެސް ސަބަބަކާހުރެ ތިމާގެ ދަރީގެ ކައިވެނި ރޫޅޭ ހާލަތުގައިވެސް، އެމީހުންނާމެދު އިހާނެތިކޮށް ނުހިތާ، އާއިލާގެ ތެރޭގައި ބަލައިގަނެ ބައިވެރިކުރުމަށް މައިންބަފައިންނަށް މެންކް އިލްތިމާސްކުރެއްވިއެވެ.
މެންކް ވިދާޅުވީ އާއިލާގެ ތެރޭގައި، އެކަކު އަނެކަކު ކޮށްދޭ ހެޔޮ ކަންކަން ބަލައިގަނެ، އެކަން އިޙުސާސުކޮށްދިނުމަކީ އާއިލީ ގުޅުމުގެ އެންމެ މުހިންމު އެއްކަންތައް ކަމަށެވެ.
"މައިން ބަފައިން ވާންވާނީ، ދަރިންނަށް ކޮންމެ ވަގުތަކު ކޮންމެ ވާހަކައެއްވެސް އައިސް ދެއްކޭހާ ގާތް ބަޔަކަށް. އޭރުން ދަރިން ނިންމުމެއް ނިންމުމުގެ ކުރިން، މައިންބަފައިންނާ އެކުވެ އެކަމަށް މަޝްވަރާ ކުރެވޭނީ. އަދި އެންމެ ރަނގަޅު ހައްލެއް ހޯދޭނީ." މެންކް ވިދާޅުވިއެވެ.
ހުޅުމާލޭ ސްޓޭޑިއަމްގައި ބޭއްވި މިދަރުސްގައި އަޑުއެހުމަށް ނައިބު ރައީސް ފައިސަލް ނަސީމްއާއި ވަޒީރުންގެ އިތުރުން އާއްމުންގެ ގިނަ ބަޔަކު ދަރުސް އަޑުއަހަން ވަޑައިގެންނެވިއެވެ.
މުފްތީ މެންކްގެ މިދަތުރުފުޅުގައި މާލެ، ފުވައްމުލައް ސިޓީ އަދި އައްޑޫ ސިޓީގައި ވަނީ ދަރުސްތައް ކުރިއަށް ގެންގޮސްފައެވެ. މިއިން ކޮންމެ ދަރުސެއްވެސް ޚާއްސަކޮށްފައިވަނީ މުޖުތަމަޢުގައި ހުރި މުހިންމު މައްސަލަތަކަށެވެ.