ދެ ރަށެއްގެ ޞިއްޙީ މަރުކަޒުގައި ކުރަން ހުރި ބައެއް މަސައްކަތްތައް ހެލްތު މިނިސްޓްރީން ބަޔަކާ ޙަވާލުކޮށްފިއެވެ. ހެލްތު މިނިސްޓްރީން ޙަވާލުކޮށްފައިވަނީ ދ. ބަނޑިދޫ ޞިއްޙީ މަރުކަޒުގެ ޕޯރޓިކޯ ހެދުމާއި ވަށާފާރު ރޭނުމުގެ މަސައްކަތާއި، މ. ރަތްމަންދޫ ޞިއްޙީ މަރުކަޒުގެ ޕޯރޓިކޯ ހެދުމާއި، ގަރާޖް ހެދުމާއި ރޭނުމުގެ މަސައްކަތެވެ.
މި ދެ މަޝްރޫޢުގެ ތެރެއިން ދ. ބަނޑިދޫ ޞިއްޙީ މަރުކަޒުގެ ޕޯރޓިކޯ ހެދުމާއި ވަށާފާރު ރޭނުމުގެ މަސައްކަތް ޙަވާލުކޮށްފައިވަނީ ގޯ ޓްރެވަލް ޕްރައިވެޓް ލިމިޓެޑާއެވެ. މި މަސައްކަތަށް 1.3 މިލިއަނަށްވުރެ ގިނަ ރުފިޔާ ޚަރަދުވާނެކަމަށް ހެލްތު މިނިސްޓްރީން ވިދާޅުވެއެވެ. ގޯ ޓްރެވަލްއާއި މި މަސައްކަތް ޙަވާލުކޮށްފައިވަނީ 122 ދުވަހުގެ ތެރޭގައި ނިންމާގޮތަށެވެ.
މ. ރަތްމަންދޫ ޞިއްޙީ މަރުކަޒުގެ ޕޯރޓިކޯ ހެދުމާއި، ގަރާޖް ހެދުމާއި ރޭނުމުގެ މަސައްކަތް ހެލްތު މިނިސްޓްރީން ޙަވާލުކޮށްފައިވަނީ ސަމާލު ކޮންސްޓްރަކްޝަނާއެވެ. އެކުންފުންޏަށް މި މަސައްކަތް ނިންމުމަށް ދީފައިވަނީ 140 ދުވަހުގެ މުއްދަތެކެވެ. މި މަސައްކަތަށް ގާތްގަނޑަކަށް 9 ލައްކައަށްވުރެ ގިނަ ރުފިޔާ ޚަރަދުވާނެކަމަށް ހެލްތު މިނިސްޓްރީން ވިދާޅުވެއެވެ.
ރާއްޖޭގެ ޞިއްޙީ ނިޒާމު ހަރުދަނާކުރުމުގެ މަސައްކަތުގެ ދަށުން، އަތޮޅުތަކުގެ ހޮސްޕިޓަލްތަކާއި، ޞިއްޙީ މަރުކަޒުތަކުގެ އާބާތުރަ ފިލުވުމާއި، ޖާގައިގެ ދަތިކަން ކުރިމަތިވެފައިވާ ތަންތަނުގެ ޖާގަ އިތުރުކުރުމުގެ މަސައްކަތް އަންނަނީ ކުރަމުންނެވެ. މީގެތެރޭގައި ޓަރޝަރީ ހޮސްޕިޓަލްތައް ތަރައްޤީކުރުމާއި، އައު ހޮސްޕިޓަލުތައް އިމާރާތްކުރުމާއި، އެކްސްޓެންޝަން ޢިމާރާތުގެ މަސައްކަތްތައް ކުރުން ހިމެނެއެވެ.