ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން، މާލޭ ރައްޔިތުންނަށް ޚާއްސަކޮށްގެން ދޫކުރާ ގޯއްޗާއި ފްލެޓަށް އެދި ކުރިމަތިލި މީހުންގެ އަދަދު 32000އިން މައްޗަށް އަރައިފިއެވެ.
މާލޭ ރައްޔިތުންނަށް ޚާއްސަކޮށްގެން ދޫކުރާ ގޯއްޗާއި ފްލެޓަށް އެދި ކުރިމަތިލާން ފުރުޞަތު ހުޅުވާލީ ޖޫންމަހުގެ 26 ވަނަ ދުވަހުއެވެ. އަދި ފޯމް ހުށަހެޅުމުގެ ފުރުސަތު މިރޭ 23:59އަށް ހަމަވާނެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހުގެ ވަޢުދުފުޅާ އެއްގޮތަށް މާލޭގެ ރައްޔިތުންނަށް ޚާއްސަކޮށްގެން ދޫކުރާ ގޯއްޗާއި ފްލެޓަށް އެދި ފޯމް ހުށަހެޅުމަށް އެންމެ ފުރަތަމަ ކަނޑައެޅި ސުންގަޑިއަކީ މިދިޔަމަހުގެ 26 ވަނަ ދުވަހެވެ. ނަމަވެސް އެ މުއްދަތު މިއަދުގެ ނިޔަލަށް އިތުރުކުރަން ނިންމީ، ބިންވެރިޔާ ސްކީމްގެ ދަށުން މާލެ ސަރަހައްދުން ބަންޑާރަ ގޯތި ދޫކުރުމުގެ އުސޫލަށް ގެނައި އިސްލާހަކާއި ގުޅިގެންނެވެ.
މާލޭގައި މީގެކުރިން ހިންގި ބޯހިޔާވަހިކަމުގެ މަޝްރޫއުތަކަށް ދިގު ކިޔޫތައް ހަދައިގެން އާއްމު ރައްޔިތުން ފޯމް ހުށަހަޅަން ޖެހުނުނަމަވެސް މި ސަރުކާރުން އެކަމަށް ބޮޑު ލުޔެއް ވަނީ ހޯދައިދީފައެވެ. އެގޮތުން މި 2 ސްކީމުގެ ދަށުން ގޯއްޗާއި ފްލެޓަށް ޝަރުތު ހަމަވާ ފަރާތްތަކުން އެކަމަށް އެދި އެޕްލިކޭޝަން ހުށަހަޅަންޖެހޭނީ "ގެދޮރުވެރިން ޕޯޓަލް" (https://gedhoruverin.gov.mv) މެދުވެރިކޮށެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ޕްލޭނިން މިނިސްޓްރީގެ ސީނިއަރ އެގްޒެކްޓިވް ޑިރެކްޓަރ މުޙައްމަދު އާރިފް ވިދާޅުވީ ގޯއްޗާއިން ފްލެޓަށް އެދި މިއަދު ހަވީރު 5 ޖެހުމާހަމައަށް 32130 މީހުން ފޯމް ހުށައަޅާފައިވާކަމަށެވެ. އާރިފް ވަނީ ފޯމް ހުށައެޅުމުގެ ސުންގަނޑި ހަމަވުމުގެ ކުރިން ޕޯޓަލް އިން ފޯމު ފުރާފައިވާ މީހުންގެ ތެރެއިން ޖޮއިންޓް އެޕްލިކޭޝަން ނުވަތަ އެކަކަށްވުރެ ގިނަ މީހުންގެ ނަމުގައި ހުށަހަޅާފައިވާ އެޕްލިކޭޝަންގައި، ކޯ-އެޕްލިކަންޓުންގެ ގޮތުގައި ބައިވެރިވާ މީހުން ޕޯޓަލް މެދުވެރިކޮށް އިޤުރާރު އެޕްރޫވް ކުރިތޯ ކަށަވަރުކުރުމަށް އެދިވަޑައިގެންފައެވެ.
ރާއްޖޭން ބޭރުގައި ތިބި މީހުންވެސް ގޯއްޗާއި ފްލެޓަށް އެދި ފޯމް ހުށައަޅަމުން އަންނަކަން ފާހަގަކުރައްވާ އާރިފް ވިދާޅުވީ 64 ޤައުމެއްގައި ތިބި ދިވެހިން މިވަގުތު ފޯމް ހުށައަޅާފައިވާކަމަށެވެ. އަދި ފޯމްތައް ހުށައެޅުމުގެ ވަގުތު ހަމަވުމާއެކު ފޯމްތައް ވެރިފައިކުރުމުގެ މަސައްކަތް ފަށާނެކަމަށާއި ވަރަށް އަވަހަށް އެމަސައްކަތް ނިންމާ ގޯއްޗާއި ފްލެޓް ލިބޭ މީހުން އާއްމުކުރެވޭނެ ކަމަށް އުއްމީދުކުރައްވާ ކަމަށް އާރިފް ވިދާޅުވިއެވެ.
"ގެދޮރުވެރިން" މި ނަމުގައި ސަރުކާރުން ކުރިއަށްގެންދާ ޕްރޮގްރާމުގެ ތެރެއިން މާލޭ ރައްޔިތުންނަށް ގޯއްޗާއި ފްލެޓް ދޫކުރަން ހަމަޖެހިފައިވަނީ ސަރުކާރުގެ "ބިންވެރިޔާ ސްކީމް" އާއި "ގެދޮރުވެރިޔާ" ސްކީމުގެ ދަށުން ހުޅުމާލެއާއި ގުޅީފަޅުންނެވެ. މި ޕްރޮގްރާމްގެ ދަށުން ހުޅުވާލާފައިވަނީ 4000 ފްލެޓާއި، 3000 ގޯއްޗަށް ކުރިމަތިލުމަށެވެ. މީގެތެރެއިން 1000 ގޯއްޗާއި، 4000 ފްލެޓް ދޫކުރުމަށް ހަމަޖެހިފައިވަނީ ހުޅުމާލެއިންނެވެ. އަދި ބާކީ 2000 ގޯތި ދޫކުރުމަށް ނިންމާފައި ވަނީ ގުޅީފަޅުންނެވެ.