2003 ވަނަ އަހަރު ގެނެސްދިން "ކަލް ހޯ ނާ ހޯ" ގެ ޑައިރެކްޓަރު ނިކިލް އަދުވާނީގެ ފިލްމެއް ބޮލީވުޑް ތަރި އަބީޝެކް ބައްޗަން އަށް ލިބިއްޖެއެވެ.
މި ފިލްމަކީ ނިކިލްގެ ފިލްމު ކުންފުނި އެއްމޭ އެންޓަޓައިންމަންޓުން ހަދަން ނިންމާފައިވާ ޑްރާމާ ފިލްމެކެވެ. މީގެ ސްކްރިޕްޓް އަބީޝެކަށް ހުށަހެޅުމުން ކަމުގޮސްގެން ފިލްމަށް އާއެކޭ ބުނާނެ ފަދަ އިޝާރާތެއް ވަނީ ދީފައެވެ. ނަމަވެސް ފިލްމަށް ސޮއިކުރި ކަމަކަށް އިންޑިއާގެ މުނިފޫހިފިލުވައިދޭ ޚަބަރުތައް ގެނެސްދޭ ނޫސްތަކުން އަދި ރިޕޯޓެއް ނުކުރެއެވެ.
މި ފިލްމުގެ އިތުރު ކާސްޓުންގެ ތަފްސީލެއް އަދި ހާމައެއް ނުކުރެއެވެ. ފިލްމު ޑައިރެކްޓްކުރާނީ ނިކިލްއާ އެކީ އެސިސްޓެންޓް ޑައިރެކްޓަރެއްގެ ގޮތުގައި މަސައްކަތްކޮށްފައިވާ މީހެއް ކަމަށް މީޑިއާތަކުން ރިޕޯޓުކުރެއެވެ. އަދި ހުރިހާ ކަމެއް ޝެޑިއުލާއި އެއްގޮތަށް ދާނަމަ މި މަސް ނިމޭ ހިސާބުގައި ބޯޕާލްގައި ފިލްމުގެ ޝޫޓިން ފަށާނެއެވެ. މި ފިލްމުގައި ދައްކާނީ ކުޑަ ކުއްޖަކާއި އަބީޝެކް އާއިއެކު އޮންނަ ވަރަށް ވަރުގަދަ ގުޅުމެއް ކަމަށް ރިޕޯޓުތައް ބުނެއެވެ.
އުމުރުން 46 އަހަރުގެ އަބީޝެކް ދެން އެންމެ އަވަހަށް ފެންނާނީ ޕްރައިމް ވީޑިއޯގެ މަޝްހޫރު ޑްރާމާ ސީރީޒް "ބްރީތް:އިން ޓު ދަ ޝެޑޯސް" ގެ 3 ވަނަ ބައިންނެވެ. މީގެ ފުރަތަމަ ބައިގެ ލީޑް ރޯލުން އާރް މާދަވަން ފެނުނުއިރު، ދެވަނަ ބައި ފަށާފައި ވަނީ އަބީޝެކް އާއިއެކުގައެވެ.
މި ސީރީޒްގެ އިތުރުން "ގޫމަރު" އަކީވެސް އަބީޝްކްގެ ކުރިއަށް އޮތް އެއްޗެކެވެ. އޭނާ އެންމެ ފަހުން ފެނުނީ މި އަހަރުގެ އެޕްރީލްގައި ގެނެސްދިން "ދާސްވީ" އެވެ.