ޑެންގީ ހުން ޖެހޭ މީހުންގެ ޢަދަދު ކަންބޮޑުވާ މިންވަރަށް އިތުރުވަނީ

މިދިޔަ އަހަރާ އަޅާބަލާއިރު މި ދުވަސްވަރު ރާއްޖޭގައި ޑެންގީ ފެތުރެމުންދާ މިންވަރު އެތައް ގުނައެއް އިތުރުވެފައިވާކަމަށް ހެލްތު ޕްރޮޓެކްޝަން އެޖެންސީ، އެޗް.ޕީ.އޭގެ ތަފާސްހިސާބުތަކުން ދައްކައިފިއެވެ.

އެޗް.ޕީ.އޭއިން ވިދާޅުވީ، މިދިޔަ އަހަރުގެ އޮގަސްޓް މަހުގެ ތެރޭގަައި 9 މީހަކަށް ޑެންގީ ޖެހިގެން ރިޕޯޓްކޮށްފައިވާކަމަށެވެ. އަދި ސެޕްޓެމްބަރުގައި އެ ބަލި ޖެހުނީ 8 މީހަކަށެވެ. ނަމަވެސް މި އަހަރު އެ އަދަދު ވަނީ އެތައް ގުނައެއް އިތުރުވެފައެވެ. އެގޮތުން މިދިޔަ އޮގަސްޓު މަހުގައި 268 މީހަކަށް މި ބަލި ޖެހުނެވެ. އަދި މިދިޔަ މަހު 229 މީހަކަށް ޑެންގީ ހުން ޖެހިފައިވެއެވެ.

ޑެންގީ ހުން ފެތުރެނީ މަދިރީގެ ޒަރިއްޔާއިންނެވެ. ކޮންމެ އަހަރަކުވެސް ވިއްސާރަ ދުވަސްވަރު ޑެންގީހުން ޖެހޭ މިންވަރު ރާއްޖޭގައި އިތުރުވެއެވެ. މިއާއެކު މަދިރީގެ ޒަރިއްޔާ އިން ޖެހޭ ބަލިތައް ކޮންޓްރޯލްކުރުމަށާއި ބަލިން ރައްކާތެރިވުމަށް ފިޔަވަޅު އެޅުމަށް އެޗް.ޕީ.އޭއިން އިލްތިމާސްކުރައްވައެވެ.

ޑެންގީ ހުމުން ރައްކާތެރިވާން ކުރެވިދާނެ ކަންކަން:

* ހަށިގަނޑު ނިވާވާ ގޮތަށް ހެދުން އެޅުމާއި މަދިރި ލޯޝަން ބޭނުންކުރުން
* މަދިރި އެންމެ ގިނަވާ ވަގުތު [ފަތިސް/ ހަވީރު/ އިރުއޮއްސޭ ގަޑި] ގައި ކުޑަދޮރުތައް ލައްޕާފައި ބެހެއްޓުން
* ހުސް ފުޅި/ ދަޅު ކަހަލަ ފެން ހަރުލާ ތަކެތި ގޯތިތެރެ އާއި މަގުމަތީގައި ނުބެހެއްޓުން

ޑެންގީ ޖެހިއްޖެނަމަ ގޭގައި ދެވޭނެ ފަރުވާ:

* އަރާމުކުރުން
* ގިނަގިނައިން ދިޔާ އެއްޗެހި ބޭނުންކުރުން [ފައިދާހުރި ދިޔާތަކެތީގެ ތެރޭގައި ކުރުނބާ ފެނާއި ލޮނުޕެކެޓާއި ސޫޕް ފަދަ ތަކެތި]
* ހުން މަޑުކުރުމާއި ގައިގައި ރިއްސުމާއި ހުޅުހުޅުގައި ރިއްސާ ނަމަ، ޕެރެސެޓެމޯލް ބޭނުންކުރުން
* ތިން ދުވަހަށް ވުރެ އިތުރަށް ހުން އަންނަ ނަމަ ނުވަތަ ދިޔާތަކެތި ބޭނުންނުކުރެވޭ ނަމަ، ޑޮކްޓަރުގެ ލަފާ ހޯދުން

ޑެންގީ ހުމުގެ އިތުރުން މިއަހަރު އަރިދަފުސް ރޯގާ ފެތުރޭ މިންވަރު ވެސް ވަނީ އިތުރުވެފައިވާކަމަށް އެޗް.ޕީ.އޭގެ ތަފާސްހިސާބުތަކުން ދައްކައެވެވެ.

މިދިޔަ އަހަރުގެ އޮގަސްޓް މަހު 12162 މީހުންނަށް ބަލިޖެހިގެން ވަނީ ރިޕޯޓް ކޮށްފައެވެ. އަދި ސެޕްޓެމްބަރު މަހުގަ ރިޕޯޓް ކުރީ 18777 މީހުންނެވެ. ނަމަވެސް މިއަދަދު މިއަހަރުގެ މި މުއްދަތުގައި އިތުރުވެ ވަނީ 25000 އިން މައްޗަށް އަރާފައެވެ. އެގޮތުން މިއަހަރުގެ އޮގަސްޓް މަހުގެ ތެރޭގައި 25713 މީހަކަށް ވަނީ ބަލި ޖެހިފައެވެ. އަދި ސެޕްޓެމްބަރު މަހު 33584 މީހަކަށް ރޯގާ ޖެހިގެން ރިޕޯޓްކުރިއެވެ.

އެޗް.ޕީ.އޭގެ ތަފާސްހިސާބުތަކުން ދައްކާގޮތުގައި ބޭރަށް ހިންގުމާއި ލޮލު ރޯގާ އާއި ފާނަބަސަދާއި ހޭންޑް ފުޓް އެންޑް މައިތު ޑިޒީސް ކަހަލަ ބަލިތައް ވެސް މިދިޔަ މަހު އިތުރެވެ. އެގޮތުން މިދި އޯގަސްޓްމަހު 3505 މީހަކު ބޭރަށް ހިންގަތީ ވަނީ ރިޕޯޓްކޮށްފައެވެ. އަދި މިދިޔަ މަހު 3533 މީހަކު ބޭރަށް ހިންގާތީ ރިޕޯޓްކޮށްފައިވާކަމަށް އެޗްޕީއޭގެ ތަފާސް ހިސާބުތަކުން ދައްކައެވެ.