ކޮންމެ ޤައުމެއްގެވެސް ތަރައްޤީގެ މައިބަނދައަކީ އެ ޤައުމެއްގެ ބޮޑެތިވަމުން އަންނަ ދަރިންނެވެ. އަދި ތަޢުލީމީ ޖީލެއް ބިނާކޮށްގެން މެނުވީ، އެމުޖުތަމަޢަކީ ކުށް މަދު އަމާން ވެށްޓަކަށްވެސް ނުހެދޭނެއެވެ.
މި ދެންނެވި ތަޢުލީމީ ޖީލު ބިނާކުރުމުގައި މުދައްރިސުންގެ ދައުރަކީ މުހިންމު ދައުރެކެވެ. އަމިއްލަ އެތައް ކަމެއް ޤުރުބާންކުރުމަށްފަހު ކިޔަވައި ދިނުމުގައި މުދައްރިސުން އެތައް ވަގުތެއް ހޭދަކުރާއިރު، އެމީހުންގެ މަސައްކަތްތައް ކުރިއެރުވުމަށް ގިނަ ގޮންޖެހުންތައް ހުރިކަން މުދައްރިސުން ފާހަގަކުރެއެވެ. މަސައްކަތުގެ 5 ދުވަހުގެ އިތުރުން ހުކުރު ހޮނިހިރުގައިވެސް އެކިއެކި މަސައްކަތްތަކުގައި ގިނަ ވަގުތުތަކެއް މުދައްރިސުން ސްކޫލުގައި ހޭދަކުރެއެވެ.
ކިޔަވައިދިނުމުގެ އިތުރަށް ސްކޫލުގައި ބާއްވާ ކުޅިވަރު ހަރަކާތްތަކާއި، އެކި ދުވަސްތައް ފާހަގަކުރުމާއި، އެހެން ފަރާތްތަކުން ބާއްވާ ހަރަކާތްތަކުގައި ދަރިވަރުންގެ ކަންކަން ބެލެހެއްޓުމުގެ ޒިންމާވެސް ނަގާ ބަޔަކީ މުދައްރިސުންނެވެ. މިފަދަ ހަރަކާތްތައް ގިނައިން ބާއްވަނީ ކިޔަވާ ގަޑި ނިމުމުންނާއި، ބަންދު ދުވަސްދުވަހު ކަމަށްވާތީ، ޗުއްޓީ ދުވަހެއް ނުލިބި މަސައްކަތް ކުރާ މުދައްރިސުން މަދެއްނޫނެވެ.
މިއަދު މުދައްރިސުންގެ ދުވަސް ފާހަގަކުރަމުން އަންނައިރު މުދައްރިސުންގެ އެންމެ ބޮޑު ހިތްހަމަޖެހުމަކަށްވަނީ އެމީހުން ކުރާ މަސައްކަތަށް އެކަށީގެންވާ އުޖޫރައެއް ލިބެން ފެށުމެވެ. މިއާއެކު މީގެ އެތަކެއް އަހަރުތަކެއް ވަންދެން ދެކެމުން އައި ހުވަފެން ހަޤީގަތަކަށްވެ ހަމަޖެހިލައިގެން ދިރިއުޅެވޭނެ ގޮތްވެފައިވާކަން ޓީޗަރުން ފާހަގަކުރެއެވެ.
މަސައްކަތްތައް ބުރަވެ އާއިލާއަށް ވަގުތު ނުދެވުމާއި، ސްޓްރެސް ފަދަ މައްސަލަތައް ވެފައިވަނީ ޓީޗަރުން މި ދާއިރާ ދޫކޮށް ދާ އެންމެ ބޮޑު އެއް ސަބަބަށެވެ. ނަމަވެސް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުން ތަޢުލީމީ ދާއިރާއަށް ގެނެސްދެއްވި އެންމެ ބޮޑު ހިތްހަމަޖެހުމަކީ މުސާރައިގެ ކުރިއެރުމެވެ. މިއާއެކު މުޅި ތަޢުލީމީ ދާއިރާގައި މަސައްކަތް ކުރާ 8625 މުދައްރިސުންގެ ތެރެއިން ދިވެހި 6845 މުދައްރިސުންނަށް އެކަށީގެންވާ އުޖޫރައެއް ލިބެންފަށައިފިއެވެ. މީގެ ތެރޭގައި ވަކި މުދައްރިސަކު އިސްތިސްނާ ކުރުމެއްނެތެވެ. ދިވެހި މުދައްރިސެއްނަމަ މުސާރައަށް ކޮންމެވެސް ވަރެއްގެ ބަދަލެއް ވަނީ އައިސްފައެވެ. އެއީ މިހާރު ތިބި ސެން ޓީޗަރުންގެ 385 މުދައްރިސުންވެސް ހިމަނައިގެންނެވެ.
ޚާއްސަގޮތެއްގައި ކުރިން އޮތް މުސާރަދިނުމުގެ އޮނިގަނޑާ ޚިލާފަށް ބޮޑު ކުރި މުސާރައިން ޑިގްރީ ފެންވަރުގެ މުދައްރިސުންނަށް މިހާރު 18658 ރުފިޔާ ލިބޭނެއެވެ. ކުރިން މި ރޭންކްގެ މުވައްޒަފުންނަށް ލިބެނީ 13894 ރުފިޔާއެވެ. މީގެ ކުރިން މުޅި ހަފްތާގައި ދަރިވަރުންގެ ޙައްޤުގައި މަސައްކަތް ކުރާ މާސްޓާޒް ހަދައިގެން ހުރި މުދައްރިސަކަށްވެސް ލިބެމުން އައީ 16374 ރުފިޔާއެވެ. އެހެންނަމަވެސް މިދިޔަ ޖޫންމަހު މުސާރައަށް އައި ކުރިއެރުމާއެކު އެ މުސާރަ މިވަނީ 20027 އަށް އަރާފައެވެ. މުދައްރިސުންގެ އިތުރަށް ސްކޫލް ހިންގަން ތިބި ޕްރިންސިޕަލުންނާއި ޑެޕިއުޓީ ޕްރިންސިޕަލުންގެ މުސާރަވެސް މިހާރު މިވަނީ 30000 އިން މައްޗަށް އަރާފައެވެ. މުދައްރިސުންގެ މުސާރަ ބޮޑު ކުރެއްވުމަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ތަޢުލީމީ ދާއިރާއަށް ވަކިން ޚާއްސަކޮށް މުދައްރިސުންނަށް ބަހައްޓަވާ ގާތްކަމުގެ ފޮހެނުލެވޭނެ ހެއްކެކެވެ.
މުދައްރިސުންގެ މުސާރަ ބޮޑުކުރުމުގެ ސަބަބުން ތަޢުލީމީ ދާއިރާގެ ކުރިމަގާމެދު ކުރެވޭ އުއްމީދު ބޮޑުވެއްޖެއެވެ. ކުރިން މި ދާއިރާއިން ކުރިއަށްދާން ބޭނުންނުވާ މީހުންނާއި މުދައްރިސްކަން ކިޔަވަން ބޭނުންވާ މީހުންގެ ހިތްވަރަކަށްވެސް މުސާރަ ބޮޑުވުން ވެއްޖެއެވެ. އަނެއްކޮޅުން މުސާރަ ކުޑަވުމުގެ ސަބަބުން މި ދާއިރާ ދޫކޮށް ދިޔަ މީހުން މިދާއިރާއަށް އަންނަންވަނީ ފަށާފައެވެ. ރަށްރަށުގެ ޕްރިންސިޕަލުގެ މަޤާމަށް އެހެން ރަށްރަށުން މީހުން ހޯދަންޖެހޭ ޖެހުން ހުއްޓިއްޖެއެވެ. އެއްމަޤާމަކަށް އެތައް ބަޔަކު އެދެނީއެވެ.
ޤަބޫލުކުރަން ޖެހޭ ހަޤީގަތަކީ މުދައްރިސުންގެ މުސާރަވެސް ބޮޑު ކުރެވިދާނެ ކަމެވެ. ނަމަވެސް ކިތަންމެ މަސައްކަތެއް ކުރި ނަމަވެސް މުދައްރިސުން އެ ކުރައްވާ މަސައްކަތުގެ އަގުވަޒަން ކުރުން މަދުވާނެކަމެވެ. އަމިއްލަ ދަރިއެއް ބަލާ ބޮޑުކުރާ ބީދައިން އެތަކެއް ދަރިންތަކެއް އެ އަންނަނީ ބަލަހައްޓަމުންނެވެ. ދަރިންގެ މުސްތަޤްބަލަށް އެތަކެއް މަސައްކަތްތަކެއް އަންނަނީ ކުރައްވަމުންނެވެ. މިއަދު އަޅުގަނޑުމެންނަށް ކުރެވެން އޮތްހާވެސް މަސައްކަތަކީ މުދައްރިސުން ކުރައްވާ ބުރަ މަސައްކަތް ބަލައިގަނެ މުދައްރިސުންނަށް އިހްތިރާމް ކުރުމެވެ.