އެކަކު އަނެކަކުގެ ރަޢުޔު ތަފާތުވިނަމަވެސް، މުޖުތަމަޢުގައި ހުޅު ރޯކުރާ ބަޔަކަށް ނުވުމަށް ހުކުރު ޚުތުބާގައި ގޮވާލައްވައިފިއެވެ. ކަންކަމުގައި ޚިޔާލު ތަފާތުވި ނަމަވެސް، ވާހަކަދެއްކުމުގެ އަދަބުތައް ހިފަހައްޓާ އެކަކު އަނެކަކުގެ އަބުރު ކަތިނުލުމަށް ހުކުރު ޚުތުބާގައިވަނީ ގޮވާލައްވާފައެވެ. މިއަދުގެ ހުކުރު ޚުތުބާ ޚާއްސަކޮށްފައިވަނީ "ދެބަސްވުމުގެ އަދަބުތައް" މިމަޢުޟޫއަށެވެ.
ހުކުރު ޚުތުބާގައި ވިދާޅުވީ ކޮންމެ މަޚްލޫގެއް ޚަލްޤު ކުރައްވާފައިވަނީ ވިސްނުމާއި، ފިކުރާއި، ޚިޔާލާއި، އުއްމީދުތަކާއި ބޭނުންތަކުގައި ތަފާތުކޮށްކަމަށެވެ. އެއީ ދިރިއުޅުމުގެ ފެންވަރާއި ޖިސްމާނީ ބާރުވެރިކަމާއި ވިސްނުމުގެ ފެންވަރުގައިވެސް ތަފާތުކޮށްކަމަށެވެ. އަދި ބަސްމޮށުންތެރިކަމުގައިވެސް ދެ މީހަކު އެއްގޮތް ނުވެއެވެ.
އަހަރަމެންގެ ވިސްނުމާއި ފިކުރާއި ރައުޔުތައް ތަފާތުކޮށް މާތްﷲ ލައްވާފައިވަނީ އެކަލާންގެ ނިޔާކުރައްވާފައިވާ ޙިކްމަތެއްގެ ދަށުންކަމަށެވެ. ގަސްގަހާގެއްސާއި ދޫނިސޫފާސޫފިން މިސާލު ޖައްސަވާ ހުކުރު ޚުތުބާގައި ވިދާޅުވީ، އެންމެހާ އިންސާނުން އެއްގޮތަށް ޚަލްގުކުރެއްވިނަމަ ހަޔާތުގެ މީރުކަމާއި ފޮނިކަން ނެތިދާނެކަމަށެވެ.
ތަފާތު ޖިންސުތަކަށް، ގިންތިތަކަށް، ތަފާތު ސިފަސިފައިގާ ހެއްދެވީވެސް އެއިން ފައިދާ ލިބިގަތުމަށާއި، އެއިން މުޅި ވިސްނުމާ ހަރުދަނާ ޚިޔާލު ހޯދުމަށްކަމަށެވެ. އަދި އޭގެ ބޭނުންކޮށް އަހަރަމެންގެ އުފެއްދުންތައް ގިނަކޮށް ކާމިޔާބު އިތުރުކުރުމަށްޓަކާކަމަށާއި، ރުޅިވެރިކަމާ އަދާވާތްތެރިކަމާ ގުޅުންކެނޑުމުން ދުރުހެލިވުމަށްކަމަށް ޚުޠުބާގައިވެއެވެ.
އިސްލާމްދީން އަހަރަމެންނަށް ގޮވާލަނީ ރަނގަޅު ގޮތުގައި ތަފާތުތައް ބޭނުންކުރުމަށް ކަމަށް ހުކުރު ޚުތުބާގައި ވިދާޅުވިއެވެ. އަދި ޚިޔާލުތަފާތުވުންތަކުގެ ސަބަބުން އަހަރަމެންގެ އެކުވެރިކަމުގައި ރެނދު އެޅިގެން ނުވާނެކަމާއި މުސްލިމުންގެ ސަފުތައް ރޫޅިގެން ދިޔަ ދީގެން ނުވާނެކަމަށެވެ.
"ޚިޔާލު ތަފާތުވިއަސް ވާހަކަދެއްކުމުގައި ހިފަހައްޓަންޖެހޭ އަދަބުތަކެއްވޭ. އެކަކު އަނެކަކުގެ އަބުރު ކަތިލައިގެން ނުވާނެ. އެކަކު އަނެކަކުގެ އިއްޒަތާ ކަރަމާތަށް އަރައިގަނެގެން ނުވާނެ. މުސްލިމުންނަކީ ޚިޔާލު ފާޅުކުރުމުގެ ރިވެތި އުޞޫލުތަކުގައި ހިފަހައްޓައިގެން މީސްތަކުންނާ މުޢާމަލާތުކޮށްފައިވާ ބައެއް. އަހަރަމެން މުސްލިމުން ޖަދަލު ކުރަންވާނީ، މާތް ﷲގެ ވަޖުހުފުޅައްޓަކާ ޙައްޤަށް ވާޞިލުވުމަށް." ޚުތުބާގައި ވިދާޅުވިއެވެ.
ޚުޠުބާގައި ވިދާޅުވީ ތިބާ ޚިޔާލު ހުށައަޅާއިރު އެއީ އެންމެ ރަނގަޅު ޚިޔާލުކަމުގައި ތިބާ ދެކިގެން ނުވާނެކަމަށެވެ. ތިބާގެ ޚިޔާލު ރަނގަޅުވާގޮތަށް އަނެކާގެ ޚިޔާލުވެސް ހަމަ ރަނގަޅުވެދާނެކަމަށާއި، މާތް ﷲ އަހަރެމެންނަށް އަންގަވަނީ ކާފިރުންނާ ޖަދަލުކުރާއިރުވެސް ރިވެތި އަދަބުގައި ހިފެހެއްޓުމަށްކަމަށް ޚުތުބާގައި ވިދާޅުވިއެވެ.
ކޮންމެ ޙާލަތެއްގައިވެސް އަނެކާގެ ރަޢުޔަށްވެސް އިހުތިރާމުކުރަންވާނެއެވެ. ވެރީންކަމުގައި ވިއަސް، ރައްޔިތުންކަމުގައި ވިއަސް، ތަފާތު ޕާޓީތަކުގެ މީހުންކަމުގައިވިއަސް، ތަފާތު ޖަމާއަތްތަކުގެ މީހެއްވިއަސް، ދިނީ އިލްމުވެރިންކަމުގައިވިއަސް ނުވަތަ މުދަރިސުންނާ ދަރިވަރުންވިއަސް އަދި އަންހެނެއް ނުވަތަ ފިރިހެނެއްވިއަސް ޤައުމުގެ މަސްލަޙަތު އިސްކޮށް މުޖްތަމަޢުގެ ލާބައާ މަންފާއަށް އިސްކަންދޭންޖެހޭނެކަމަށެވެ. ރައުޔު ތަފާތުވާ ކޮންމެ ވަގުތަކު މީސްމީޑިއާއަށް އަރާ، ހުޅު ރޯކުރާ ބަޔަކަށް ނުވުމަށް ޚުތުބާގައި ނަސޭހަތްތެރިވިއެވެ.
"ޚިޔާލު ތަފާތުވާ ކޮންމެ މީހަކު ކާފިރުކޮށްގެން ނުވާނެ. ދެބަސްވާ ކޮންމެ މީހަކީ މުޖުރިމަކަށް ހަދައިގެން ނުވާނެ. ދީނީ މައްސަލަތަކުން މައްސަލައެއްގައި ބަހުސްކުރާނަމަ، މައްސަލައިގައި ޢިލްމުވެރިންގެ ރައުޔުތަކާއި ޙުއްޖަތްތަކުގެ އަލީގައި މެނުވީ ޖަދަލުކޮށްގެން ނުވާނެ." ހުކުރު ޚުތުބާގައި ވިދާޅުވިއެވެ.
އެހެންކަމުން އަހަރަމެންގެ އެކުވެރީންނާ މުވައްޒަފުންނާ ގާތްތިމާގެ މީހުންނާ ވާހަކަދައްކާއިރުވެސް ނުވަތަ މައްސަލައަކާ ބެހޭގޮތުން ބަހުސް ކުރާއިރުވެސް މިފަދަ ރިވެތި އަދަބުތަކަށް ތަބާވުމަށް ޚުތުބާގައި ވަނީ ނަސޭހަތްތެރިވެފައެވެ.