ކޮޅުފުށީގެ ހައުސިން މަޝްރޫޢު އަލުން ފަށަނީ

މ.ކޮޅުފުށީގައި ހުއްޓިފައިވާ ހައުސިން މަޝްރޫޢު އަލުން ފަށާ، ކުރިއަށްގެންގޮސްދޭނެ ބަޔަކު ހޯދުމަށް ސަރުކާރުން އިޢުލާންކޮށްފިއެވެ. މި ޕްރޮޖެކްޓްގެ ދަށުން ކޮޅުފުށީގައި 100 ހައުސިން ޔުނިޓް ތަރައްޤީކުރުމަށްވަނީ ހަމަޖެހިފައެވެ.

ރަށްރަށުގައި ގިނަދުވަސްވެ ގޯތި ނޭޅިފައިވާ ގެވަޅުތަކުގައި ސަރުކާރުގެ އެހީގައި ގޯތި އިމާރާތްކޮށްދިނުމަށް ކުރިން ނިންމި ނަމަވެސް މިއީ އެންމެ އެކަށީގެންވާ ކޮންސެޕްޓަކަށް ނުވާތީ، ސަރުކާރުން މި މަސައްކަތް އިތުރަށް ކުރިއަށް ނުގެންދިއުމަށް ނިންމިއެވެ.

މި ޕްލޭންގެ ދަށުން ގޯތި އިމާރާތްކޮށްދިނުމަށް ފެށި ހަމައެކަނި ރަށަކީ މ.ކޮޅުފުއްޓެވެ. އެރަށުގައި 100 ގެ އިމާރާތްކުރަން ހަވާލުކުރިއެވެ.

ކޮޅުފުށީގައި 100 ހައުސިން ޔުނިޓް އެޅުމުގެ މަސައްކަތް ކުންފުންޏަކާ ހަވާލުކޮށްފައިވަނީ 2019 ވަނަ އަހަރުގެ އޮކްޓޫބަރުމަހުއެވެ. މީގެ ޢަމަލީ މަސައްކަތް އެ ކުންފުނިން ފެށީ 2021ވަނަ އަހަރުގެ ފެބުރުއަރީގައެވެ. ނަމަވެސް މި އަހަރުގެ އޭޕްރިލް މަހާއި ހަމައިން މި މަސައްކަތް އޮތީ ހުއްޓިފައެވެ.

މި މަސައްކަތް ހުއްޓުނުއިރު މަސައްކަތް ކުރިއަށް ގެންގޮސްފައިވާ ހިސާބާ ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން ކޮޅުފުށީ ކައުންސިލްގެ ރައީސް ޢަބްދުލް ޢަލީމް ވިދާޅުވީ، މިހާތަނަށް 34 ގެއެއްގެ ފައުންޑޭޝަން މަސައްކަތް ނިންމާފައިވާކަމަށެވެ. މީގެތެރެއިން 7 ގެއެއް ރޭނުމުގެ މަސައްކަތްވެސް އޮތީ ފަށާފައިކަމަށެވެ.

ޕްލޭނިން މިނިސްޓްރީން އެދިފައިވާގޮތަށް ފިނޭންސް މިނިސްޓްރީިން މިހާރު ޢިއުލާންކޮށްފައިވަނީ، ހުއްޓިފައިވާ މަސައްކަތްތައް ކުރިއަށްގެންގޮސްދޭނެ ބަޔަކު ހޯދުމަށެވެ. އެގޮތުން މަސައްކަތް ފަށާފައިވާ 34 ގޭގެ މަސައްކަތް ފުރިހަމަކުރުމާއި، މިހާތަނަށް އެއްވެސް މަސައްކަތެއް ނުކޮށްހުރި 66 ގޭގެ މަސައްކަތްތައް ކުރިއަށް ގެންގޮސްދިނުމަށެވެ.

މި މަސައްކަތަށް ބީލަން ހުޅުވުން އޮންނާނީ އަންނަ މަހުގެ 12 ވަނަ ދުވަހުއެވެ.

ކޮޅުފުށީ ކައުންސިލްގެ ރައީސް ޢަބްދުލް ޢާލިމް ވިދާޅުވީ މި މަޝްރޫޢަކީ ރަށުގެ ބޯހިޔާވަހިކަމުގެ މައްސަލަ ޙައްލުކުރުމަށް ވަރަށް މުހިންމު މަޝްރޫޢެއްކަމަށެވެ. ކައުންސިލްގެ އެދުމަކީ މި މަސައްކަތް ކުރިއަށް ގެންގޮސް ވީހާވެސް އަވަހަށް ނިންމުން ކަމަށްވެސް އޭނާ ވިދާޅުވިއެވެ.

"ސުނާމީއަށް ފަހު މިރަށުގައި ސަރުކާރުން 167 ގެ އަޅައިދިން. އޭގެފަހުންވެސް އާބާދީ އިތުރުވެ ރަށަށް ބޯހިޔާވަހިކަމުގެ މައްސަލަ ބޮޑު. މި މަޝްރޫޢަކީ މިމައްސަލައަށް ލިބޭނެ ބޮޑު ޙައްލެއް." ކައުންސިލްގެ ރައީސް ވިދާޅުވިއެވެ.

މ.ކޮޅުފުށީގެ އާބާދީ 1400އަށްވުރެ އިތުރެވެ. ރަށުގެ ގޭބިސީތަކުގެ އަދަދަކީ 200އެވެ.

މި ޕްރޮޖެކްޓްގައި އަޅާ ގެތަކަކީ 1100 އަކަފޫޓުގެ ގެތަކެކެވެ. މިއިން ކޮންމެ ހައުސިން ޔުނިޓަކީ 3 ކޮޓަރިއާއި، 3 ފާޚާނާއާއި ސިޓިންގ ރޫމާއި ބަދިގެއާއި، ދޮންނަ މެޝިން ބަހައްޓާ ތަނެއް ހިމެނޭ ގޮތަށް ހަދާ ގެތަކެކެވެ. މި ގެތައް ދޫކުރުމަށް ހަމަޖެހިފައިވަނީ މަހަކު 5000 ރުފިޔާއަށް ދިގު މުއްދަތުން ފައިސާ ދައްކާ ގޮތަށެވެ.

75 މިލިއަނަށް ވުރެ ގިނަ ރުފިޔާގެ މި މަޝްރޫއުގެ މަސައްކަތް ކުރުމަށް އޭރު ހަވާލުކޮށްފައިވަނީ 11 މަހާއި 20 ދުވަހުން ނިންމާގޮތަށެވެ.

ކޮޅުފުއްޓަކީ މުލަކަތޮޅުގެ އެންމެ ދެކުނުން އޮންނަ މީހުން ދިރިއުޅޭ ރަށެވެ. މިރަށުގެ ބިމުގެ ބޮޑުމިނުގައި 76 ހެކްޓަރެވެ.