ރާއްޖޭގެ ރިސޯޓުތަކަށް ހުޅުވާލައިގެން ބާއްވާ އެންމެ ބޮޑު ފުޓްސަލް މުބާރާތް ކަމަށްވާ "ރިސޯޓް ލީގު 2022" ގެ ނޯތު މާލޭ ޒޯނުގެ ކުއާޓާ ފައިނަލަށް ބަރޮހާއި ވަރު މޯލްޑިވްސް ދަތުރުކޮށްފިއެވެ.
ވަން އެންޑް އޮންލީ ރީތި ރަށުގައި ކުރިއަށްދާ ނޯތު މާލޭ ޒޯނުގެ ކުއާޓާގެ ޖާގައެއް ބަރޮހުން ހޯދާފައިވަނީ ހަތަރު ޓީމު ހިމެނޭ ގްރޫޕް ޑީގެ ދެވަނަ ޓީމުގެ ގޮތުގައެވެ. އެއީ ގްރޫޕުގެ ފަހު މެޗުގައި ހެލެނގެލި އަތުން 2-1 ގެ ނަތީޖާއަކުން މޮޅުވެގެންނެވެ.
މުބާރާތުގެ ގްރޫޕް ޑީން އެއްވަނަ ޓީމުގެ ގޮތުގައި ޖުމްލަ ހަތް ޕޮއިންޓާއެކު ޕަޓީނާ މޯލްޑިވްސް ކުއާޓާއަށް ދަތުރުކުރިއިރު، ދެވަނަ ޓީމު ބަރޮސް ކުއާޓާއަށް ދިޔައީ ޖުމްލަ ހަ ޕޮއިންޓާއެކުއެވެ. ދެން މި ގްރޫޕުގައި ހިމެނޭ ޖުމެއިރާ އާއި ހެލެނގެލި ވަނީ މުބާރާތުން ކަޓާފައެވެ.
މީގެ އިތުރުން ވަރު މޯލްޑިވްސް ކުއާޓާގެ ޖާގައެއް ހޯދާފައިވަނީ ނޮކައުޓް މެޗުގައި ކުރުނބާ މޯލްޑިވްސް ބަލިކޮށްގެންނެވެ. ނޮކައުޓްގެ ފުރަތަމަ މެޗުން މޮޅުވެ ވަރު މޯލްޑިވްސް މޮޅުވީ ކުރުނބާ އަތުން 8-1 ގެ ތަފާތު ބޮޑު ނަތީޖާއަކުންނެވެ. މި މޮޅާއެކު މުބާރާތުގެ ކުއާޓާގައި ވަރު މޯލްޑިވްސް ބައްދަލުކުރަން ޖެހޭނީ ގްރޫޕް ބީގެ އެއްވަނަ ހޯދި ގިލި ލަންކަންފުއްޓާއެވެ.
ޖުމްލަ 12 ޓީމު, ހަތަރު ގްރޫޕަކަށް ބަހާލައިގެން ކުރިއަށްދާ ނޯތު މާލޭ ޒޯނުގެ ކުއާޓާގެ މެޗުތަށް އަންނަ ހުކުރު ދުވަހު ފަށާއިރު، ފައިނަލް މެޗު ކުޅުމަށް ތާވަލުކޮށްފައި ވަނީ މި މަހުގެ 31 ވަނަ ދުވަހެވެ.