އޮޑިޓަރ ޖެނެރަލް އޮފީހުގެ ބޭނުމަށް 6 ބުރީގެ ޢިމާރާތެއް ހަދަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ)އިން ޙަވާލުވެއްޖެއެވެ.
އޮޑިޓަރ ޖެނެރަލް އޮފީހާއެކު މި އެއްބަސްވުމުގައި ސޮއިކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީން ސޮއިކޮށްފައިވަނީ މިމަހުގެ 10ވަނަ ދުވަހުއެވެ.
މި މަޝްރޫޢު ޙަވާލުކުރުމަށް ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމްއެވެ. އޮޑިޓަރ ޖެނެރަލް އޮފީހުގެ ފަރާތުން ސޮއިކުރެއްވީ ޑިރެކްޓަރ އޮފް ކޯޕަރޭޓް ސަރވިސަސް ނިޝްފާ ފިރާގެވެ.
އެމްޓީސީސީން ވިދާޅުވީ އޮޑިޓާ ޖެނެރަލް އޮފީހުގެ ބޭނުމަށް ތަރައްޤީކުރާ މި ޢިމާރާތަކީ، 17426.40 އަކަފޫޓުގެ ސަރަހައްދެއްގައި ޖުމުލަ 77718.10 އަކަފޫޓުގެ ޖާގަ ލިބޭ ގޮތަށް ތަރައްގީ ކުރާ އިމާރާތެއް ކަމަށެވެ. ހަ ފަންގިފިލާގެ މި އިމާރާތުގެ އުސްމިނުގައި 23.1 މީޓަރު ހުންނާނެ ކަމަށް އެމްޓީސީސީން ވިދާޅުވެއެވެ.
އެމްޓީސީސީން ވިދާޅުވީ މި މަޝްރޫޢުގެ މަސައްކަތް 730 ދުވަހުގެ ތެރޭ ނިންމުމަށް އެއްބަސްވެފައިވާ ކަމަށެވެ. އަދި މި މަޝްރޫޢަކީ 138.67 މިލިއަން ރުފިޔާގެ މަޝްރޫއެކެވެ.
އެމްޓީސީސީން ވަނީ ވޭތުވެދިޔަ 3 އަހަރުތެރޭ ރާއްޖޭގެ އެކި ކަންކޮޅުތަކުގައި ގިނަ މަޝްރޫއުތަކެއް ނިންމާފައެވެ.