ތ.ތިަމަރަފުށީގައި ސަރުކާރުން ތަރައްޤީކުރާ 100 ރޯހައުސްއަށް ކުރިމަތިލުމަށް ހުޅުވާލައިފިއެވެ. މިއީ ސަރުކާރުން އަތޮޅުތަކުގައި ފެށި ބޯހިޔާވަހިކަމުގެ މަޝްރޫޢުގެ ތެރެއިން، މަސައްކަތް ނިމޭ ދެވަނަ ރަށެވެ.
ތ.އަތޮޅު ތިމަރަފުއްޓަކީ 2500އަށްވުރެ ބޮޑު އާބާދީއެއް އޮންނަ ރަށެކެވެ. ތިމަރަފުށީގައި 100 ރޯހައުސް ޢިމާރާތްކުރަން ސަރުކާރުން ކުންފުންޏަކާ ހަވާލުކުރައްވައި މަސައްކަތް ފެށްޓެވީ 2020ވަނަ އަހަރުގައެވެ. ގެތަކުގެ ކޮންސްޓްރަކްޝަންގެ މަސައްކަތްތައް ނިމި، މިހާރު ކުރަމުންދަނީ ގޭގެއަށް ޔުޓިލިޓީ ޚިދުމަތްތައް ގުޅުމާއި ފިނިޝިންގެ މަސައްކަތްތަކެވެ.
ސަރުކާރުން ހާމަކުރައްވާގޮތުގައި މަޝްރުޢުގެ ހުރިހާ މަސައްކަތްތައް އަންނަ އޮގަސްޓް މަހުގެ ނިޔަލަށް މުޅިން ނިންމައިލެވޭނެއެވެ.
މިހާރު މިވަނީ ރަށުގައި ބޯހިޔާވަހިކަން ބޭނުންވާ މީހުން، މި މަޝްރުޢުން ހައުސިންޔުނިޓު ހޯދުމަށް ކުރިމަތިލުމަށް ހުޅުވާލާފައެވެ.
ރޯހައުސްތައް ދޫކުރުމަށް ހަމަޖެހިފައިވަނީ ދެ ކެޓަގަރީއަކަށް ބަހަލައިގެންނެވެ. ކެޓަގަރީ (އޭ) ގައި ހިމެނެނީ، ތިމަރަފުށީގެ ރައްޔިތުންނަށް ދޫކުރުމަށް ހަމަޖެހިފައިވާ 83 ރޯހައުސްއެވެ. ކެޓަގަރީ (ބީ)ގައި ހިމެނެނީ ތިމަރަފުއްޓަށް ދިރިއުޅުން ބަދަލުކުރަން ބޭނުންވާ އެހެން ރަށްރަށުގެ މީހުންނަށް ދޫކުރުމަށް ނިންމާފައިވާ 15 ރޯހައުސްއެވެ. އަދި ބާކީ 2 ރޯ ހައުސް، ޕްލޭނިން މިނިސްޓްރީން ކަނޑައަޅާފައިވަނީ ރަށު ކައުންސިލްގެ ބޭނުމަށް ޚާއްސަކުރުމަށެވެ.
ރޯ ހައުސްތަކަށް އެދި ފޯމު ހުށައެޅުމަށް ހުލުވާލާފައިވަނީ އަންނަ އޮގަސްޓްމަހުގެ 20ވަނަ ދުވަހުގެ 12:00އާ ހަމައަށެވެ.
މިނިސްޓްރީ އޮފް ނެޝަަލް ޕްލޭނިން ހައުސިން އެންޑް އިންފްރާސްޓްރަކްޗަރއިން ކަނޑައަޅާފައިވާ އުސޫލާ އެއްގޮތަށް، މި މަޝްރޫޢުގެ ރޯހައުސް ހޯދުމުގެ އުސޫލާއި މަޢުލޫމާތުތަކާއި މާކްސް ދޭނެ އުސޫލު އަދި ފޯމު މިހާރުވަނީ އާއްމުކޮށް ގެޒެޓްކޮށްފައެވެ.
އަތޮޅުތަކުގައި ހިންގާ ބޯހިޔާވަހިކަމުގެ މަޝްރޫޢުތަކަކީ އެ ރަށްރަށަށް ދިމާވެފައިވާ ބޯހިޔާވަހިގެ މައްސަލަ ޙައްލުކޮށްދީ، ރައްޔިތުންނަށް އަމިއްލަ ބޯހިޔާވަހިކަމެއް ހޯދައިދިނުމަށް ކުރިއަށްގެންދާ މަޝްރުޢުތަކެކެވެ.
މި މަޝްރޫޢުގެ ދަށުން ހައުސިން ޔުނިޓުތައް ލިބޭ މީހުންނަކީ ބޯހިޔާވަހިކަމަށް އެންމެ ބޮޑަށް ބޭނުން ޖެހިފައިވާ މީހުންކަން ކަށަވަރުކުރުމަށް، މިހާރު ސަރުކާރުން ކަނޑައަޅާފައިވާ އުސޫލަކީ ފޯމްތައް އިވަލުއޭޓްކުރުމަށް އެ ރަށަކުން ޚާއްސަ ކޮމިޓީއެއް ނެގުމެވެ.
ތިމަރަފުށީން ހޮވާލެވުނު "ވިލަރެސް ކޮމިޓީ"ގައި 9 މެންބަރުން ހިމެނެއެވެ. އެއީ އާއްމު ފަރުދުންގެ ތެރެއިން ހޮވާލެވުނު މެންބަރަކާއި ރަށުގެ މުއައްސަސާތަކުން ކަނޑައަޅާފައިވާ މެންބަރުންނެވެ.
ތިމަރަފުށީގައި ސަރުކާރުން ކުރިއަށްގެންދިޔަ 100 ރޯހައުސް ތަރައްޤީކުރުމުގެ މަޝްރޫޢުގައި މުޅިންވެސް ހިމެނެނީ 3 ކޮޓަރީގެ ގެތަކެވެ. އެގޮތުން 3 ކޮޓަރިއާ 3 ފާހަނައާއި ބަދިގެ، ސިޓީން ރޫމް އަދި ލޯންޑްރީ އޭރިއާއާއި ސްޓޯ ރޫމްވެސް ހިމެނެއެވެ.
މިއީން ކޮންމެ ރޯހައުސްއަކީ 1000އަކަފޫޓުގެ ގެތަކެވެ. މި ޔުނިޓްތައް ދޫކުރަނީ 20 އަހަރަށް ބަހާލައިގެން ފައިސާ ދައްކާ ގޮތަށެވެ. އެއީ މަކަށް 5000 ރުފިޔާއެވެ.