ހުވަދު އަތޮޅު ދެކުނުބުރީ ތިނަދޫއަކީ އާބާދީގެ ނިސްބަތުން ކެފޭ ރެސްޓޯރަންޓް ގިނަ ރަށެކެވެ. މީގެ ހަތަރުވަރަކަށް ދުވަސްކުރިން އެތަންތަންފެނިގެން ދިޔައީ ވަރަށް ހަލަބޮލިކޮށެވެ.ތިނަދޫގެ ގިނަ ހިސާބުތަކެއްގައި ކެފޭ ރެސްޓޯރަންޓުތައް ހުންނައިރު މީގެ 4 ވަރަކަށް ދުވަސް ކުރިން އެތަންތަން ފެނިގެން ދިޔައީ ފުރިފައި އޮތްތަނެވެ. ޢާންމު ދުވަސްތަކުގައި އިރުއޮއްސުމާއިއެކު އެތަންތަން ވަކިން ބާރުބޮޑު ކަމަށް ކެފޭ ރެސްޓޯރަންޓު ވިޔަފާރިކުރާ ފަރާތްތަކުން ބުނެއެވެ. މިތަންތަނުގައި ހަލަބޮލިކަން އިތުރުވިއިރު، އަމިއްލަ ގޭގައި އެފަދަ ވިޔަފާރި ހިންގާ މީހުން މިރަށުގައި ގިނަކަން އަޅުގަނޑުމެންނަށް ފާހަގަކުރެވުނެވެ. އަށް ހާހެއްހާ މީހުންގެ އާބާދީއެއް އޮންނަ ތިނަދޫގައި ކެފޭ ރެސްޓޯރަންޓު ވިޔަފާރި ކުރާ ބައެއް ފަރާތްތަކުން މިއަދު ބުނީ އަންގާރަވިލޭރޭ ކަރަންޓު ކަނޑައިގެންދިޔަ ހިސާބުން ފެށިގެން ވިޔަފާރި އެތައް ގުނައަކުން ދަށްވެގެން ދިޔަކަމަށެވެ.ކެފޭ ރެސްޓޯރަންޓްތަކަށް ޚިދުމަތް ހޯދުމަށާއި ކޮފީބޯން ވަންނަ ކަސްޓަމަރުން މަދުކަން ބައެއް ފަރާތްތަކުން ފާހަގަކުރިއެވެ. ބައެއް ކެފޭ ރެސްޓޯރަންޓުތައް ބަންދުކޮށްފައި ހުރިތަން ފެނިގެން ދިޔައިރު، މަދު ކެފޭތަކެއްގައި ވިޔަފާރި ތަންކޮޅެއް ރަނގަޅުވެގެން ދިޔަކަން ފާހަގަކުރެވުނެވެ. ސަބަބަކީ ގިނަ ކެފޭ ރެސްޓޯރަންޓުތައް ބަންދުކޮށްފައި ހުރުމުން ކޮފީ ބޯން ބޭނުންވާ ޒުވާނުންގެ މިފަދަ ކެފޭތަކަށް އަންނަ މިންވަރު އިތުރުވުން ކަމަށް ކެފޭ ރެސްޓޯރަންޓް ވިޔަފާރިކުރާ ފަރާތްތަކުން ބުނެއެވެ. ތިނަދޫގައި ކެފޭ ރެސްޓޯރަންޓު ހިންގާ ފަރާތްތަކުންވެސް މިހާރުތިބީ ރަށަށް ކަރަންޓު ލިބި އާއްމު ހާލަތަށް އާދެވޭނެކަމުގެ އުއްމީދުގައެވެ.