ތިނަދުއަށް ކަރަންޓު ފޯރުކޮށްދިނުމަށްޓަކައި މާލެއިން ގެނައި 1 މެގަވޮޓްގެ 2 ޖަނަރޭޓަރު ރަށުތެރެއަށް ބޭލޭނީ މެންދުރުފަހު ބޮޑުދިޔައިގައިކަމަށް ފެނަކަ ތިނަދޫ ބްރާންޗުން ހާމަކުރައްވައިފިއެވެ.ދާއިމީގޮތެއްގައި ތިނަދޫގެ ގޭގެއަށް ކަރަންޓު ފޯރުކޮށްދިނުމަށްޓަކައި ބޭނުންވާ ޖަނަރޭޓަރުތައް މިއަދު ހެނދުނު ވަނީ ތިނަދުއަށް ގެނެސްފައެވެ. އެއީ 1 މެގަވޯޓުގެ 2 ޖަނެރޭޓަރެވެ. މި ޖަނެރޭޓަރުތައް ތިނަދުއަށް ގެނެވުނީ ހެނދުނު 7:15 ހާއިރުއެވެ. ނަމަވެސް ދިޔަވަރު ހިކިފައިވުމާއިއެކު ޖަނެރޭޓަރުތައް ކޮޅުވެއްޓިން ބޭލުމުގައި ދަތިތަކާއި ކުރިމަތިވާތީ، އެ ޖަނެރޭޓަރުތައް ރަށަށް ބޭލޭނެކަމަށް ފެނަކައިން ލަފާކުރައްވަނީ މެންދުރުފަހު ބޮޑުދިޔައިގައެވެ. މި ދެ ޖަނެރޭޓަރު ބޭލުމަށްފަހު ގެންދިއުމަށް ހަމަޖެހިފައިވަނީ ތިނަދޫ އިންޖީނުގެއަށެވެ. އެއަށްފަހު ކަރަންޓު ވިއުގައާއި ގުޅާލުމުގެ މަސައްކަތް ފަށްޓަވާގޮތަށްވަނީ ހަމަޖެހިފައެވެ. ފެނަކަ ކޯޕަރޭޝަނުން ލަފާކުރައްވާގޮތުގައި ޖަނެރޭޓަރު އިންސްޓޯލްކުރުމަށް 12 ގަޑިއިރު ނަގާނެއެވެ.މިރަށަށް ގެނެވުނު ދެ ޖަނެރޭޓަރަކީ ސްޓެލްކޯއިން ފޯރުކޯށްދިން އެއް މެގަވޯޓުގެ ޖަނެރޭޓަރަކާއި، ފެންކުންފުނި، އެމް.ޑަބްލިއު.އެސް.ސީން. ފޯރުކޮށްދިން ޖަނެރޭޓަރެކެވެ. ޖަނެރޭޓަރުތައް އިންސްޓޯލްކޮށް ފުރަތަމަވެސް 24 ގަޑިއިރު ގޭގެއަށް ކަރަންޓު ފޯރުކޯށްދިނުމަށް ހަމަޖެހިފައިވީ ނަމަވެސް، އިންޖީނުގެ އެޅުމަށް އިންވެސްޓުކުރުމަށްފަހު ދާއިމީ ހައްލެއް ހޯދުމަށް 2 މަހެއްހާ ދުވަސް ނަގާނެކަމަށް ފެނަކަ ކޯޕަރޭޝަނުން ލަފާކުރައްވައެވެ.