ބ. އަތޮޅު ދޮންފަނު ސިއްޙީ މަރުކަޒު، ހެލްތު މިނިސްޓަރ އިރުތިޝާމް އާދަމް ހުޅުއްވައި ދެއްވައިފިއެވެ.ހެލްތު މިނިސްޓަރ އިރުތިޝާމް އާދަމް މިނިސްޓަރ ބ. އަތޮޅާއި ރ. އަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި ދޮންފަނު ސިއްޙީ މަރުކަޒު ހުޅުއްވައި ދެއްވީ އިއްޔެ ހަވީރު އެރަށުގައި ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ވިދާޅުވީ ސިއްޙީ ޚިދުމަތަކީ ކޮންމެ ރައްޔިތަކުވެސް ދިރިއުޅޭ ރަށުން އެކަށީގެންވާ ގޮތަކަށް ލިބޭނެ އަސާސީ ޚިދުމަތަކަށް ހެއްދެވުމަކީ ސަރުކާރުން ވަރަށްވެސް އިސްކަމެއް ދެއްވާ ކަމެއް ކަމަށެވެ. އަދި މިދާއިރާއިން ބައެއް ރަށްރަށުގައި ލިބެންނުހުންނަ ބޮޑެތި ޚިދުމަތްތައް، ރަށާއި ކައިރިން ފަސޭހައިން ލިބޭނެފަދަ ގޮތަކަށް އިންތިޒާމް ކުރެއްވުމަށް މަސައްކަތް ކުރައްވާކަމަށް މިނިސްޓަރ ވިދާޅުވިއެވެ. 500 ވަރަކަށް މީހުންގެ އާބާދީއެއް އޮންނަ ބ. ދޮންފަނުގައި ސިއްޙީ ޚިދުމަތް ދިނުމަށް ވަކި ޢިމާރާތެއް އަޅާފައި މިވަނީ އަލަށެވެ. މީގެ ކުރިން އެރަށުގައި ސިއްޙީ ޚިދުމަތް ފޯރުކޮށްދިނީ ރަށުކައުންސިލްގެ ޢިމާރާތުގެ ތެރޭގައި ވަރަށް ދަތި އުނދަގޫތަކާއި އެކު ކަމަށް ދޮންފަނު ކައުންސިލުން މަޢުލޫމާތުދެއެވެ. މިނިސްޓަރ އިރުތިޝާމް ބ. އަތޮޅާއި ރ. އަތޮޅުގެ ބައެއް ރަށްތަކަށް ކުރައްވާ ދަތުރުފުޅުގައި އިއްޔެ ދަރަވަންދޫ ސިއްޙީ މަރުކަޒަށް ވަޑައިގެން އެ މަރުކަޒު ވަނީ ބައްލަވާލައްވާފައެވެ. މީގެ އިތުރުން އޭދަފުށީގައި ހުންނަ އެ އަތޮޅުގެ އަތޮޅު ހޮސްޕިޓަލަށް ވަޑައިގެން ރޭ އެ ހޮސްޕިޓަލުގެ މުވައްޒަފުންނާއި ބައްދަލު ކުރައްވައި، މިނިސްޓަރ ހޮސްޕިޓަލް ބައްލަވައިލައްވާފައިވެއެވެ.