ލ. އަތޮޅު ގާދޫއިން ތިނަދޫއަށް ގެންދިޔަ 160 މެގަވޮޓް ޖަނެރޭޓަރު ގުޅާ ތިނަދޫ ގޭބިސީތަކަށް ޕްރެޝަރުގައި ފެން ދޫކުރަން ފަށައިފިއެވެ.ތިނަދޫގައި ހުރި ޕީއެސްއެމްގެ ރިޕޯޓަރ ބުނީ، ތިނަދޫ ގޭތަކަށް ޕްރެޝަރުގައި ފެންދޫކުރަން ފަށާފައިވަނީ، މެންދުރު 12 ޖަހާ ކަންހާއިރުކަމަށެވެ. މިއާއިއެކު މެދުކެނޑުމެއްނެތި ތިނަދޫގެ ގެތަކަށް ފެން ފޯރުކޮށްދެވޭނެކަމުގެ ޔަޤީންކަން ފެނަކައިން ދެއްވައެވެ. މީގެ އިތުރުން އައިލެންޑް އޭވިއޭޝަނުން ތިނަދޫއަށް ފޯރުކޮށްދެއްވުމަށް ނިންމަވާފައިވާ 1.5 ޓަނުގެ ބޯފެނުގެ ތެރެއިން ފުރަތަމަ ޝިޕްމަންޓްގެ ގޮތުގައި 40 ކޭސް ފެން މިއަދު ހެނދުނު 11 ޖެހިއިރު ތިނަދުއަށް ވަނީ ގެންގޮސްފައެވެ.މީގެ އިތުރުން މިފްކޯގެ ފަރާތުން ރޭގެ ވަގުތެއްގައި ތިނަދުއަށް ގެނައި 800 ކޭސް ފެން ކަރަންޓު ފޯރުކޮށްދެއްވުމަށް މަސައްކަތް ކުރައްވާ ތަންތަނަށް ފޯރުކޮށްދެއްވަން ފަށްޓަވާފައިވާކަމަށްވެސް ޚަބަރުލިބެއެވެ.