ޤައުމީ ފެރީ ނިޒާމަކީ ރައީސް އިބްރާހީމް މުޙައްމަދު ޞާލިހުގެ އިޤްތިޞާދީ ތަޞައްވުރުގައި ހިމެނޭ އެންމެ މުހިންމު އެއްބައިކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޟް އިސްމާޢީލް ވިދާޅުވެއްޖެއެވެ. މިނިސްޓަރ މިހެން ވިދާޅުވީ ޤައުމީ ފެރީ ނިޒާމް "ރާއްޖެ ޓްރާންސްޕޯޓް ލިންކް" އިފްތިތާޙުކުރުމަށް ބޭއްވި ވަރޗުއަލް ރަސްމިއްޔާތުގައެވެ.
ޤައުމީ ފެރީ ނިޒާމަކީ ސަރުކާރުގެ މާސްޓަރ ޕްލޭންގެދަށުން ފަށްޓަވާފައިވާ މަސައްކަތެކެވެ. މިއީ ހައިސްޕީޑް ފެރީ ނިޒާމަކުން ރާއްޖޭގެ ރަށްތައް ގުޅާލުމަށް ކުރިއަށްގެންދާ މަޝްރޫޢެވެ. މިނިޒާމު ރަސްމީކޮށް ފަށާފައިވާއިރު، މީގެ އެންމެބޮޑު ބޭނުމަކީ ޢާންމުންނަށް ބޭނުންވާ ޚިދުމަތްތައް އަގުހެޔޮކޮށް، ލުއި ފަސޭހަކޮށް ލިބޭނެ އިންތިޒާމް ހަމަޖެއްސުމެވެ.
ފެރީ ނިޒާމު އިފްތިތަޙުކުރުމަށް ބޭއްވި ވަރޗުއަލް ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓަރ ފައްޔާޟު އިސްމާޢީލް ވިދާޅުވީ މިއީ ރައީސޫލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ އިޤްތިޞާދީ ސިޔާސަތުގެ މުހިންމު މަޝްރޫއުއެއްކަމަށެވެ. މި ނިޒާމާއެކު ރާއްޖޭގެ މުޅި އިޤްތިޞާދު ދެން ފެނިގެންދާނީ އެކަތިގަނޑެއްގެ ގޮތުގައި ކަމަށްވެސް މިނިސްޓަރ ވިދާޅުވިއެވެ.
"މިއާއެކު ކުދި މަރކެޓްތައް ބަދަލުވަނީ ބޮޑު އެއް މާކެޓަށް. މުޅި ރާއްޖެ މި ގުޅިގެން ދަނީ. މިއީ ރާއްޖެއާ ގުޅޭ، އެކަށީގެންވާ ނިޒާމެއް." އިކޮނޮމިކް މިނިސްޓަރ ފައްޔާޟް އިސްމާޢީލް ވިދާޅުވިއެވެ.
މި ނިޒާމާއެކު ވިޔަފާރިތަކުން ޚިދުމަތް ހޯދާ މީހުން އިތުރުވެ ވިޔަފާރިތަކަށް ލިބޭ މާކެޓްވެސް ވަރަށް ބޮޑަށް އިތުރުވެގެންދާނެއެވެ. އަދި ރަށްރަށުގައި ކުދި ވިޔަފާރިތައް އިތުރުވުމަށްވެސް ބާރަކަށް ވާނެއެވެ.
މިރަސްމިއްޔާތުގައި ވާހަކަދައްކަވަމުން ހެލްތު މިނިސްޓަރ އަޙުމަދު ނަސީމް ވިދާޅުވީ ފެރީ ނިޒާމުގެ އަޖުމަބެލުމުގެ ދަތުރުތަކަށް ބަލާއިރުވެސް އެންމެ ގިނަ ބަޔަކު ދަތުރުކުރަމުންދަނީ ސިއްޙީ ޚިދުމަތް ހޯދުމަށްކަމަށެވެ. މި ޚިދުމަތަކީ ރާއްޖޭގެ މުޅި ސިއްޙީ ނިޒާމަށް ލިބޭނެ ވަރަށްބޮޑު ކުރިއެރުމެއްކަމަށާ، ޚިދުމަތް ހޯދާ ޢާންމުން އެކަމަށްކުރާ ހޭދަޔަށް ބޮޑު ލުޔެއް ލިބޭނެ ކަމެއްކަމަށް މިނިސްޓަރ ނަސީމް ވިދާޅުވިއެވެ.
"މިއީ ވަރަށް ބޮޑު ހިތްހަމަޖެހުމެއް. ރާއްޖޭގައި ސަރުކާރުން ސިއްޙީ ޚިދުމަތްދޭ 186 ފެސިލިޓީ މި ގުޅިގެންދަނީ. މިއީ ޚިދުމަތް ލުއިފަސޭހާވެ، އާއްމު މީހާގެ ޖީބަށްވެސް ލިބޭ ލުޔެއް." ހެލްތް މިނިސްޓަރ އަޙުމަދު ނަސީމް ވިދާޅުވިއެވެ.
ޤައުމީ ފެރީ ނިޒާމުގެ ޚިދުމަތް ރަސްމީކޮށް ފަށާފައި މިވަނީ ޒޯން 1 ގައި ހިމެނޭ ހދ.އަތޮޅަށެވެ. އަތޮޅުގައި މީހުން ދިރިއުޅޭ 13 ރަށް މި ނިޒާމުގެ ތެރެއިން ވަނީ ގުޅާލާފައެވެ.