ރާއްޖޭގައި 6 ސަރަޙައްދުގައި އެއަރޕޯޓް ތަރައްޤީކުރަން 12 ކުންފުންޏަކުން ޝައުގުވެރިކަން ފާޅުކޮށް ޕްރޮޕޯސަލް ހުށައަޅާފައިވާކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ރާއްޖޭގެ 6 ސަރަޙައްދުގައި ޑޮމެސްޓިކް އެއަރޕޯޓް ތަރައްޤީކުރާނެ ބަޔަކު ހޯދުމަށް ފުރަތަމަ ހުޅުވާލީ މިދިޔަ އަހަރުގެ ޑިސެމްބަރުމަހުގެ ފަހުކޮޅުއެވެ. އެއީ ބ. ތުޅާދޫ، ށ. ބިލެތްފަހި، ތ. ވިލުފުށި، ހދ. މަކުނުދޫ، ފ. މަގޫދޫ އަދި ރ. އަތޮޅުގެ ދެކުނު ބިތުގައި އެއަރޕޯޓެއް ތަރައްޤީކޮށްދޭނެ ބަޔަކު ހޯދުމަށެވެ.
ފުރަތަމަ ފުރުޞަތު ހުޅުވާލީ ޝައުގުވެރިކަން ފާޅުކުރުމުގައި މުޅި އެއަރޕޯޓް ތަރައްޤީކުރުމަށް ނުވަތަ ފައިނޭންސް ކުރުމަށްވެސް ހުށަހެޅޭގޮތަށެވެ. އަދި ޝައުގުވެރިކަން ފާޅުކުރުމުގައި އެއަރޕޯޓެއްގެ ތަރައްޤީއަށް އެންމެ މަދުވެގެން ހުށައެޅޭނެ ފައިސާގެ އަދަދަކީ 5 މިލިއަން ޑޮލަރުކަމުގައި ކަނޑައަޅައިގެންނެވެ. ނަމަވެސް ފަހުން ވަނީ މުޅި އެއަރޕޯޓް ތަރައްޤީކުރުމަށް ނުވަތަ އޭގެއިން ބައެއް ތަރައްޤީކުރުމަށް ފައިނޭންސް ކުރުމަށް ހުށައެޅޭގޮތަށް ބަދަލު ގެނެސްފައެވެ. އަދި ޝައުގުވެރިކަން ފާޅުކުރާ ފަރާތްތަކުން އެންމެ މަދުން ހުށައެޅޭނެ އަގު ވަނީ 5 މިލިއަނުން 3 މިލިއަން ޑޮލަރަށް ކުޑަކޮށްފައެވެ.
މި 6 އެއަރޕޯޓްގެ މަސައްކަތް ކުރިއަށްދާ ގޮތުގެ މަޢުލޫމާތު ރައްޔިތުންގެ މަޖިލީހުގައި ދެއްވަމުން މިނިސްޓަރ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވީ، ޕްރޮޕޯސަލް ހުށައެޅޭ އުސޫލަށް ގެނައި ބަދަލާއެކު ކުންފުނިތަކުން ޝައުގުވެރިކަން ފާޅުކުރަން ފަށާފައިވާކަމަށެވެ. އެގޮތުން މިހާތަނަށް 12 ކުންފުންޏަކުން ޝައުގުވެރިކަން ފާޅުކޮށް ޕްރޮޕޯސަލް ހުށައަޅާފައިވާކަމަށާއި، އެއީ ޖުމްލަ 25 މިލިއަން ޑޮލަރުގެ އިންވެސްޓްމަންޓްކަމަށް މިނިސްޓަރ ވިދާޅުވިއެވެ. އަދި ލިބުނު ޕްރޮޕޯސަލްތައް ބަލާ، މަސައްކަތް ކުރިއަށްގެންދެވޭނެ ޤާބިލުކަން ހުރި ކުންފުނިތައް ދެނެގަތުމުގެ މަސައްކަތްތައް ފަށާފައިވާކަމަށް މިނިސްޓަރ ވިދާޅުވިއެވެ.
"ފުރަތަމަ އެގްރިމެންޓެއް ހަދާނީ 45 ދުވަހުގެ ތެރޭގައި އަގު ދައްކަން. މުއްދަތުގައި އަގު ނުދެއްކިއްޖެއްޔާ އެކަން އެ ނިމުނީ. އެ ޔަގީންކަން ލިބުނީމަ ޕްރޮޖެކްޓްގެ އެއްބަސްވުންތައް ފައިނަލްކޮށް، ޕްރޮޖެކްޓް ހިންގުމުގެ އެއްބަސްވުމުގައި ސޮއިކުރާނީ" އަސްލަމް ވިދާޅުވިއެވެ.
މިނިސްޓަރ ވިދާޅުވީ، މި މޮޑެލްއަށް ކުރިއަށްދާ މަސައްކަތަކަށްވާތީ ބަންޑާރަ ނައިބުގެ ލަފަޔަކަށްވެސް މިހާރު ހުށައަޅާފައިވާކަމަށެވެ. އަދި ކަންކަން ފައިނަލްވަމުންދާ މިންވަރަކުން އެއަރޕޯޓްތަކުގެ ޢަމަލީ މަސައްކަތް ހަވާލުކުރަމުން ދާނެކަމަށް މިނިސްޓަރ ވިދާޅުވިއެވެ.
- އެއަރޕޯޓު އަޅާ ރަށްތަކާއި ލަފާކުރާ ޚަރަދު:
- ހދ. މަކުނުދޫ – 23.3 މިލިއަން ޑޮލަރު (359 މިލިއަން ރުފިޔާ)
- ށ. ބިލެއްފަހި – 23.6 މިލިއަން ޑޮލަރު (363 މިލިއަން ރުފިޔާ)
- ބ. ތުޅާދޫ – 21.9 މިލިއަން ޑޮލަރު (337 މިލިއަން ރުފިޔާ)
- ތ. ވިލުފުށި – 33.3 މިލިއަން ޑޮލަރު (513 މިލިއަން ރުފިޔާ)
- ފ. މަގޫދޫ – 8.2 މިލިއަން ޑޮލަރު (126 މިލިއަން ރުފިޔާ)
- ރ. އަތޮޅުގެ ދެކުނު ބިތުން ރަށެއް – 23.6 މިލިއަން ޑޮލަރު (363 މިލިއަން ރުފިޔާ)
މި 6 އެއަރޕޯޓުގެ ތެރެއިން އެންމެ ބޮޑު ޚަރަދެއް ހިނގާނެކަމަށް އަންދާޒާކޮށްފައި ވަނީ ތ. ވިލުފުށި އެއަރޕޯޓުގެ މަޝްރޫޢަށެވެ. އެ މަޝްރޫޢަށް އެކަނިވެސް 33.3 މިލިއަން ޑޮލަރު ނުވަތަ 513 މިލިއަން ރުފިޔާ ހޭދަވާނެކަމަށް ޕްލޭނިންގ މިނިސްޓްރީން ވިދާޅުވެއެވެ.