އޭވިއޭޝަނަށް ބޭނުންކުރާ ތެލުގެ ސަބަބުން ތިމާވެއްޓަށްކުރާ ކުރާ ނޭދެވޭ އަސަރު ހުއްޓުވަން މަސައްކަތްކުރަންޖެހޭ: ނަހުލާ
އޭވިއޭޝަން ސިނާއަތުގައި ބޭނުންކުރާ ތެލުގެ ސަބަބުން ތިމާވެއްޓަށްކުރާ ކުރާ ނޭދެވޭ އަސަރު ހުއްޓުވަން މަސައްކަތްކުރަންޖެހޭކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ ވިދާޅުވެއްޖެއެވެ.
މިނިސްޓަރ ނަހުލާ މިހެން ވިދާޅުވީ އެންވަޔަރަމަންޓް މެޓާސް: އީޔޫ އެންޑް ސައުތު އޭޝިއާ ރީޔުނައިޓިންގ ޓު ޓެކްލް ކްލައިމެޓް ޗޭންޖް ވޯކްޝޮޕް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ޕެރެޑައިސް އައިލެންޑް ރިސޯޓުގައި ކުރިއަށްދާ މި ވޯކްޝޮޕަކީ، އޭވިއޭޝަން ދާއިރާގައި ބައިނަލްއަޤްވާމީ ކާބަން އޮފްސެޓް ޕްރޮގްރާމް "ކޯސިއާ"ގައި ރާއްޖެއިން ބައިވެރިވުމުގެ ސަބަބުން ކުރިއަށްގެންދާ ވޯކްޝޮޕެކެވެ. ކޯސިއާއަކީ ދުނިޔޭގެ ތިމާވެއްޓަށް ކުރާ ނޭދެވޭ އަސަރުތައް ކުޑަކުރުމުގެ ގޮތުން ބައިނަލްއަޤްވާމީ މަދަނީ ވައިގެ ދަތުރުފަތުރުތަކުން ޖައްވަށް ބޭރުވަމުންދާ ކާބަންޑައިއޮކްސައިޑް ގޭސް އިތުރުވިޔަނުދީ ހިފެހެއްޓުމަށް ކުރިއަށްގެންދާ ޕްރޮޖެކްޓްކެވެ.
މި ރަސްމިއްޔާތުގައި ވާހަކަފުޅު ދައްކަވަމުން ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވީ ތިމާވެށި ރައްކާތެރިކުރުމުގެ މަސައްކަތްތައް ކުރިއަށް ގެންގޮސް މޫސުމަށް ބަދަލު އަންނަ ސަބަބުތަކަށް ހައްލު ހޯދުމަކީ ރާއްޖެކަހަލަ ޤައުމުތަކަށް ވަރަށް މުހިންމު ކަމެއްކަމަށެވެ. އެގޮތުން ތަރައްޤީގެ މަޝްރޫޢުތައް ކުރިއަށް ގެންދިޔުމުގައި ވިސްނުންތޫނު ގޮތްތައް ޙިޔާރު ކުރަންޖެހިފައިވާކަމަށް މިނިސްޓަރ ވިދާޅުވިއެވެ. އަދި ރާއްޖޭގެ އިޤްތިސާދީ ކުރިއެރުމުގައި މަދަނީ އުދުހުމުގެ ދާއިރާގެ މުހިންމުކަމާއި ވައިގެ ދަތުރުފަތުރުގެ ވިއުގަތަކާއި ފަތުރުވެރިކަމުގެ ސިނާޢަތާއި ގުޅިލާމެހިފައިވާ މިންވަރު ފާހަގަކުރެއްވިއެވެ.
"ވައިގެ ދަތުރުފަތުރުގެ މަގުތައް އިތުރުވަމުންދާއިރު މި ސިނާޢަތުން ހަކަތައަށް ބޭނުންކުރާ ތެލުގެ ސަބަބުން ތިމާވެއްޓަށް ނޭދެވޭ އަސަރު އަންނަނީ ކުރަމުން. އަދި މީގެ އިތުރުން ކަރަންޓާއި އެއްގަމު އުޅަނދު އުފެއްދުމުގެ ދާއިރާތަކުގައި ދެމެހެއްޓެނިވި ފަންނިއްޔާތުތައް ބޭނުން ކުރަމުން ދިޔަ ނަމަވެސް މަދަނީ އުދުހުމުގެ ދާއިރާގައި ބޭނުންކުރެވޭ މިފަދަ ހައްލުތައް އަދި ވަރަށް މަދު" މިނިސްޓަރ އައިޝަތު ނަހުލާ ވިދާޅުވިއެވެ.
މި ވޯކްޝޮޕްގެ މައިގަނޑު މަގްސަދަކީ ވައިގެ ދަތުރުފަތުރުގެ ސިނާއަތް "ކާބަން ނިއުޓްރަލް" ކުރުމަށް ދުނިޔޭގެ މަދަނީ ވައިގެދަތުރުފަތުރާ ބެހޭ ޖަމިއްޔާ (އައިކާއޯ)އިން ކަނޑައަޅާފައިވާ ލަނޑުދަނޑި ހާސިލްކުރުމަށް އެކުލަވާލަންޖެހޭ ޤައުމީ ޕްލޭންތައް ތައްޔާރުކުރުމުގެ ހުނަރާއި ޤާބިލުކަން އިތުރު ކުރުމަށް ފަންނީ އެހީތެރިކަން ފޯރުކޮށްދިނުމެވެ. އަދި ބައިނަލްއަޤްވާމީ މަދަނީ ވައިގެ ދަތުރުފަތުރުތަކުން ޖައްވަށް ބޭރުވަމުންދާ ކާބަންޑައިއޮކްސައިޑް ގޭސް އިތުރުވިޔަނުދީ ހިފެހެއްޓުމަށް އައިކާއޯ ތަޢާރަފް ކޮށްފައިވާ ކޯސިއާ ޕްރޮގްރާމަށް އަހުލުވެރިކުރުވުމެވެ.
ވޯކްޝޮޕް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ޔޫރަޕިއަން ޔޫނިއަނުން ރާއްޖެއަށާއި ސްރީލަންކާއަށް ކަނޑައަޅުއްވާފައި ހުންނަވާ ސަފީރު، ހިސް އެކްސެލަންސީ މރ.ޑެނިސް ޗައިބީވެސް ވިދާޅުވީ ޑެނިސް ޗައިބީ ވިދާޅުވީ، ކޯސާ ޕްރޮޖެކްޓްގައި ރާއްޖެއިން ބައިވެރިވުމުން އެކަމާއި ވަރަށް އުފާކުރާ ކަމަށެވެ. އަދި މިޕްރޮޖެކްޓްގެ ސަބަބުން ރާއްޖެއަށް ވަރަށް ގިނަ ފައިދާތަކެއް ކުރާނެކަމަށް އޭނާ ވިދާޅުވިއެވެ.
"ޙާއްސަގޮތެއްގައި މޫސުމަށް ބަދަލު އަންނަން ދިމާވާ ބައެއް ކަހަލަ މައްސަލަތަކަށް ހައްލެއް ލިބިގެންދާނެ. އެގޮތުން ވައިގެ ދަތުރުފަތުރުތަކުން ޖައްވަށް ބޭރުވަމުންދާ ކާބޮންޑައިއޮކްސައިޑް ގޭސް އިތުރުވިޔަނުދީ ހިފެހެއްޓިގެންދާނެ" ޔޫރަޕިއަން ޔޫނިއަނުން ރާއްޖެއަށާއި ސްރީލަންކާއަށް ކަނޑައަޅުއްވާފައި ހުންނަވާ ސަފީރު، ޑެނިސް ޗައިބީ ވިދާޅުވިއެވެ.
3 ދުވަހުގެ މުއްދަތަކަށް ކުރިއަށްދާ މި ވޯކްޝޮޕަކީ ޔޫރަޕިއަން ޔޫނިއަންގެ ވައިގެ ދަތުރުފަތުރުގެ ސަލާމަތް ބަލަހައްޓަން ޤާއިމުކޮށްފައިވާ އިދާރާ ކަމުގައިވާ ޔޫރަޕިއަން ޔޫނިއަން އޭވިއޭޝަން ސޭފްޓީ އެޖެންސީ (އިއާސާ) އާއި މޯލްޑިވްސް ސިވިލް އޭވިއޭޝަން އޮތޯރިޓީ ގުޅިގެން ކުރިއަށްގެންދާ ވޯކްޝޮޕެކެވެ.
މިވޯކްޝޮޕް ޙާއްސަވެގެންދާ އެއްކަމަކީ، އައިކާއޯ އިން ކުރިއަށްގެންދާ ކޯސިއާ ޕްރޮގްރާމްގައި ދިވެހިރާއްޖެ ވޮލިންޓިއަރ އުސޫލުން ބައިވެރިވެފައިވާތީއެވެ.