ފުލުހުންގެ ވަޒީފާއަށް އެދި ހުށަހެޅުމުގެ ފުރުސަތާއެކު އައްޑޫ ސިޓީގައި ބާއްވާ ޕޮލިސް އޯޕަން ޑޭ މާދަމާ ހަވީރު ބާއްވަން ނިންމައިފިއެވެ.
ފުލުހުންގެ އޯޕަން ޑޭއެއް ބޭއްވުމަށް ފުލުހުން ނިންމާފައިވަނީ އައްޑޫގައި ޤާޢިމު ކުރެވިފައިވާ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމެންޓް ހުޅުވުމާއެކު އައްޑޫގައި ތިބެގެން ފުލުހުންގެ ވަޒީފާ އަދާކުރަން ބޭނުންވާ ފަރާތްތަކަށް އެ ފުރުސަތު ފަހި ކޮށްދިނުމުގެ ގޮތުންނެވެ. މި އޯޕަން ޑޭ ކުރިއަށްދާނީ ހަވީރު 3:00 އިން 6:00 އަށް އައްޑޫގައި ޤާއިމުވެފައިވާ ފުލުހުންގެ ނޭޝަނަލް ކޮލެޖް އޮފް ޕޮލިސިންގް އެންޑް ލޯ އެންފޯސްމަންޓްގައެވެ.
ދިވެހިން ފުލުހުންގެ ޙިދުމަތަށް ވަންނަން އެދޭ ފަރާތްތަކަށް މި އޯޕަން ޑޭގެ ތެރެއިން ފުލުހުންގެ މުޢައްސަސާގައި މިވަގުތު ހުރި ފުރުސަތުތައް ކިޔައި ދެވޭނެއެވެ. އެގޮތުން އޮޕަރޭޝަން ދާއިރާއާއި، ފޮރެންސިކް ދާއިރާއާއި، ތަހުޤީޤީ ދައިރާއި، އަންފޮމޭޝަން ޓެކްނޮލޮޖީ، އެލެކްޓްރިކަލް އަދި މެކޭނިކަލް އިންޖިނިއަރިން، އެކައުންޓިން އަދި ފައިނޭންސް އަދި މީގެ އިތުރުން އިންފްރާސްޓްރަކްޗަރ އަދި ޕްރޮޖެކްޓް މެނޭޖްމަންޓު ދައިރާއިން މަޢުލޫމާތު ދެވޭނެއެވެ.
އޯޕަން ޑޭއަށް ވަޑައިގަންނަވާ ފަރާތްތަކުން ތަޢުލީމީ ސެޓިފިކެޓުތަކާއި އައީޑީ ކާޑު ހިފައިގެން އައުމަށް ފުލުހުން އެދެއެވެ. އަދި އޯލެވެލް ހަދާފައިވާނަމަ ވަގުތުން ވަޒީފާއަށް އެދެވޭނެކަމަށް ފުލުހުން ބުނެއެވެ.
އައްޑޫގައި ޤާޢިމްކޮށްފައިވާ ނޭޝަނަލް ކޮލެޖް އޮފް ޕޮލިސިންގް އެންޑް ލޯ އެންފޯސްމަންޓަކީ ފުލުހުންގެ ޙިދުމަތަށް މީހުން ތަމްރީނު ކުރުމަށް މިހާތަނަށް ޤާއިމްވި މިފަދަ އެންމެ ބޮޑު ތަމްރީނު މަރުކަޒެވެ. މިތަން ފުލުހުންގެ ދައިރާގެ ތަފާތު އެކި ކޯސްތަކާއި ތަމްރީނުތައް ގެންދެވޭ ގޮތަށް ތައްޔާރުކޮށްފައިވާއިރު، 300 އަށް ވުރެ ގިނަ ކުދިންނަށް އެއް ފަހަރާ ތަމްރީނު ހެދޭނެ ކަމަށް ފުލުހުން ވިދާޅުވެވެ.