ހުޅުމާލެ ފޭސް 2ގައި ބިނާކުރާ އިސްލާމީ މރުކަޒު ޑިޒައިން ކުރުމަށް ކުރިމަތިލުމަށް ހުޅުވާލާފައިވާ މުއްދަތު މިއަދުގެ ނިޔަލަށް ހަމަވާނެއެވެ.
ފޭސް 2ގައި ބިނާކުރާ އިސްލާމީ މަރުކަޒު ޑިޒައިންކުރަން ކުރިމަތިލުމަށް ހުޅުވާލުމާއެކު، ވަނީ 1 މިލިއަން ރުފިޔާގެ އިނާމެއް މިކަމަށް ހުށަހަޅާފައެވެ. ޒަމާނީ ފެންވަރުގެ އިސްލާމީ މަރުކަޒެއް ޑިޒައިން ކުރުމަށް ރާއްޖޭގެ ކޮންމެ އާކިޓެކްޗަރަކަށްވެސް ބައިވެރިވުމުގެ ފުރުސަތު ވަނީ ހުޅުވާލާފައެވެ. މި މުބާރާތުން 1ވަނައަށް ދާ ފަރާތަކަށް 7 ލައްކަ ރުފިޔާ، 2ވަނައަށް ދާ ފަރާތަކަށް 2 ލައްކަ ރުފިޔާ އަދި 3ވަނައަށް ދާ ފަރާތަކަށް 1 ލައްކަ ރުފިޔާ ދިނުމަށް ވަނީ ހަމަޖެހިފައެވެ.
އިސްލާމީ މަރުކަޒުގެ ޑިޒައިންގައި ނަމާދުކުރެވޭނެ ތަނަކާއި ޕާކުކުރާނެ ޖާގައާއި، އޮފީސްބައި، މަލްޓީޕާޕަސް ހޯލް، ސެމިނަރ ރޫމް، ލައިބްރަރީ އަދި ސްޓާފް ކެންޓީނާއި ކްލާސްރޫމްތަކާއި ކޮމާޝަލް އޭރިއާއެއްގެ އިތުރުން ރެކްރިއޭޝަނަލް އޭރިއޭއެއް ހިމެނޭނެއެވެ.
އިސްލާމިކް މިނިސްޓްރީން ވިދާޅުވީ ދެވަނަ ފިޔަވަހީގައި ބިނާކުރާ އިސްލާމީ މަރުކަޒަކީ ތަފާތު އާ ޑިޒައިނަކަށް ހަދާ ތަނަކަށް ހަދަން ނިންމާފައިވާކަމަށެވެ. މިކަމަށް ހުށަހަޅާ ޑިޒައިންތަކަކީ މީގެކުރިން އެއްވެސް ތަނަކުން ބޭނުންކޮށްފައިވާ ޑިޒައިނަކަށް ވެގެން ނުވާނެކަމަށްވެސް އެމިނިސްޓްރީން ވިދާޅުވިއެވެ.
މި މުބާރާތުގައި ބައިވެރިވުމަށް މިނިސްޓްރީ އޮފް އިސްލާމިކް އެފެއާޒުގެ ވެބްސައިޓުގައިވާ ގޫގްލް ފޯމު މެދުވެރިކޮށް ހުށަހެޅޭނެއެވެ. އަދި މި މުބާރާތާބެހޭ މަޢުލޫމާތު މިނިސްޓްރީގެ ވެބްސައިޓުން ލިބެން ހުންނާނެއެވެ.
މި މުބާރާތާ ގުޅޭ އެއްވެސް މަޢުލޫތެއް ބޭނުންވާނަމަ ޖޫންމަހުގެ 7ވަނަ ދުވަހުގެ ކުރިން މިނިސްޓްރީގެ ރަސްމީ މެއިލް [email protected] އަށް ފޮނުވުމަށް އެ މިނިސްޓްރީން އެދެއެވެ. އަދި މެއިލް ކުރައްވާ ސުވާލުތަކަށް ޖޫން މަހުގެ 13 ވަނަ ދުވަހުގެ ކުރިން ޖަވާބު ލިބިގެންދާނެކަމަށްވެސް އިސްލާމިކް މިނިސްޓްރީން ވިދާޅުވެއެވެ.