ބައިނަލްއަޤުވާމީ ގޮތުން ފާހަގަކުރާ ޢާއިލާތަކުގެ ދުވަހުގެ މުނާސަބަތުގައި ބޭއްވި ޢާއިލީ ހަވީރަށް ބޮޑު ތަރުހީބެއް ލިބިއްޖެއެވެ. މިހަވީރުގައި ޢާއިލާތަކާއެކު ގިނަ ޢަދަދެއްގެ ކުޑަކުދިންވަނީ ބައިވެރިވެފައެވެ.
ބައިނަލްއަޤުވާމީ ޢާއިލާތަކުގެ ދުވަސް ފާހަގަކުރުމަށް "ގެވެށި ގުޅުން"ނަމުގައި މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސަރވިސަސްއާއި ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީއިން ކުރިއަށްގެންދިޔަ މިހަވީރު ޝަރަފުވެރިކޮށްދެއްވީ ރައިސުލްޖުމްހޫރިއްޔާގެ ނައިބު ފައިސަލް ނަސީމްއެވެ. އެމަނިކުފާނާއެކު އަނބިކަނބަލުން ޢާއިޝަތު ޝަމްޞަދާވަނީ މިހަވީރުގައި ބައިވެރިވެވަޑައިގަންނަވާފައެވެ. މިނިސްޓްރީއިން ކުރިއަށްގެންދިޔަ މިހަވީރުގައި ގިނަ ޢަދަދެއްގެ ކުޑަކުދިންވަނީ ޢާއިލާތަކާއެކު ބައިވެރިވެފައެވެ.
ޕީއެސްއެމްނިއުސްއަށް މަޢުލޫމާތު ދެއްވަމުން ޖެންޑަރ މިނިސްޓްރީގެ ޑިރެކްޓަރ ޢަބްދުﷲ އަޝްރަފް ވިދާޅުވީ މިހަވީރު ބޭއްވުމުގެ މައިގަނޑު ބޭނުމަކީ ޢާއިލާތަކަށް އުފާވެރި ވަގުތުކޮޅެއް ހޯދައިދިނުންކަމަށެވެ. މިމަހުގެ 15 ގައި މިދުވަސް ފާހަގަކޮށްފައިވީނަމަވެސް އެއީ ރަސްމީ ދުވަހެއްކަމުން ޢާއިލީ ހަވީރު ބަންދުދުވަހަކާ ދިމާކޮށް އިންތިޒާމުކުރީވެސް ޢާއިލާގެ ގިނަ މެމްބަރުންނަށް މިހަވީރުގައި ބައިވެރިވުމުގެ ފުރުސަތު ދިނުމަށްކަމަށް އޭނާ ވިދާޅުވިއެވެ.
"ކުދިންވެސް ބޮޑެތި މީހުންވެސް ނުތަނަވަސްކަމެއްގައި ދިރިއުޅެނީމި. އެހެންވީމަ އަޅުގަނޑުމެންގެ ބޭނުމަކީ ކުދިންނަށް އުފާވެރި ހިތްހަމަޖެހޭ ވަގުތުކޮޅެއް ހޯދައިދިނުން." އަޝްރަފް ވިދާޅުވިއެވެ.
ސަރުކާރުގެ ގިނަ މުވައްސަސާތަކާއި އަމިއްލަ އެކި ޖަމިއްޔާ ޖަމާޢަތްތަކުން މިހަވީރުގައިވަނީ ސްޓޯލްތައް ޤާއިމުކޮށް ކުދިން ޝައުގުވެރިވާނެފަދަ ޙަރަކާތްތައް ކުރިއަށްގެންގޮސްފައެވެ. މިގޮތުން ހުރިހާ އުމުރެއްގެ ކުދިންނަށް ބައިވެރިވެވޭ ޙަރަކާތްތަކެއްވަނީ ކުރިއަށްގެންގޮސްފައެވެ. ޢާއިލީ ހަވީރުގައި ބައިވެރިވުމަށް ސެންޓްރަލް ޕާރކަށް ދާކޮންމެ ފަރާތަކަށް ބައިވެރިވެވޭ ލަކީ ޑްރޯއެއް ނެގުމަށްވެސްވަނީ ހަމަޖެހިފައެވެ. މިލަކީޑްރޯއިން ވަނަތަކަށް އަންނަ ފަރާތްތަކަށް ގިނަ ހަދިޔާތަކެއް ލިބޭގޮތަށް އިންތިޒާމުކޮށްފައިވާކަމަށް ޖެންޑަރ މިނިސްޓްރީއިން ވިދާޅުވެއެވެ. އޭގެތެރޭގައި ޢާއިލާއާއެކު ރިސޯޓު ދަތުރާއި، ޓިކެޓާއި އިންޓަރނެޓް ޕެކޭޖާއި، އިންޝުއަރެންސް ޕެކޭޖްތައް ލަކީޑްރޯގައި ހިމެނޭކަމަށް މިނިސްޓްރީއިން ވިދާޅުވެއެވެ.