ރައީސުލްޖުމްހޫރިއްޔާގެ ނައިބު ފައިޞަލް ނަސީމާއި، ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ހުޅުމާލޭ ލިޓިލް ޖެމްސް ޕްރީސްކޫލަށް ޒިޔާރަތްކުރައްވައިފިއެވެ.
ނައިބު ރައީސްއާއި ރައީސްގެ އަނބިކަނބަލުން ލިޓިލް ޖެމްސް ޕްރީސްކޫލަށް ޒިޔާރަތްކުރައްވާފައިވަނީ ކުޑަކުދިންގެ ދުވަސް ފާހަގަކުރުމަށް އެ ސްކޫލުގައި ކުރިއަށްގެންދިޔަ ހަރަކާތްތަކުގައި ބައިވެރިވެވަޑައިގަތުމަށެވެ. މި ޒިޔާރަތުގައި ނައިބު ރައީސްއާއި ރައީސްގެ އަނބިކަނބަލުންގެ އަރިހުގައި އެޑިއުކޭޝަން މިނިސްޓަރ ޑރ. އައިޝަތު ޢަލީވެސް ވަނީ ބައިވެރިވެވަޑައިގެންފައެވެ.
ރައީސުލްޖުމްހޫރިއްޔާގެ ނައިބު ފައިޞަލް ނަސީމާއި، ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ހުޅުމާލޭ ލިޓިލް ޖެމްސް ޕްރީސްކޫލަށް ވަކިވަކިން ކުރެއްވި ޒިޔާރަތުގައި އެ ސްކޫލުގައި ކިޔަވަމުންދާ ދަރިވަރުންނާއެކު ވަނީ ވަގުތުކޮޅެއް ހޭދަކުރައްވާފައެވެ. އެގޮތުން ވަކިވަކި ކްލާސްރޫމްތަކަށް ވަޑައިގެން ދަރިވަރުންނާއި ޓީޗަރުންނާއެކު ގްރޫޕް ފޮޓޯ ނެގުމާއި، ކުޑަކުދިންގެ ދުވަހަށް ޚާއްސަކޮށްގެން ސްކޫލުގައި ކުރިއަށްގެންދިޔަ ކުޅިވަރު ހަރަކާތްތައް ބައްލަވާލެއްވިއެވެ.
ހުޅުމާލޭ ލިޓިލް ޖެމްސް ޕްރީސްކޫލަކީ ޕްރީސްކޫލް ތަޢުލީމަށް ޚާއްސަކޮށްގެން 2015 ވަނަ އަހަރުގެ އޮކްޓޯބަރުމަހުގެ 1 ވަނަ ދުވަހު ކިޔަވައިދޭން ފެށި ސްކޫލެކެވެ. އެގޮތުން އެ ސްކޫލުގައި ބޭބީ ނަރސަރީން ފެށިގެން ޔޫ.ކޭ.ޖީއާއި ހަމައަށް ކިޔަވައިދެއެވެ. މިވަގުތު ސްކޫލުގައި 1034 ކުދިން ތަޢުލީމް ހާސިލްކުރަމުންދެއެވެ.