ދެކުނުގެ އަތޮޅުތަކަށް ވައިބާރުވެ ކަނޑުތައް ވަރަށް ގަދަވާނެ ކަމަށް މޫސުމާބެހޭ ޤައުމީ އިދާރާއިން ހާމަކޮށްފިއެވެ.
ދެކުނަށް މޫސުން ގޯސްވާނެ ކަމަށް ލަފާކޮށް މޫސުމާބެހޭ އިދާރާއިންވަނީ އެސަރަހައްދަށް ޔެލޯ އެލާޓްވެސް ނެރެފައެވެ.
މެޓް އޮފީހުން ޔެލޯ އެލާޓް ނެރެފައިވަނީ ގއ. އަތޮޅުން ފެށިގެން އައްޑޫ ސިޓީއާ ހަމައަށެވެ. އަދި ޔެލޯ އެލާޓް ނެރެފައިވަނީ މިއަދު ހަވީރު 16:30އަށެވެ.
Yellow Aert for strong winds and rough seas. pic.twitter.com/usutak41W8
— Maldives Meteorology (@MetMaldives) May 4, 2022
މޫސުމާ ބެހޭ ގައުމީ އިދާރާއިން ވިދާޅުވީ އެލާޓް ނެރެފައިވާ ސަރަހައްދަށް ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައިޖެހޭނެކަމަށެވެ. އަދި ވިލާގަނޑުގައި ގަޑިއަކު 45 މޭލު ބާރުމިނުގައި ވައިގަދަވުމުގެ އިތުރުން ކަނޑުތައް ވެސް ވަރަށް ގަދަވާނެ ކަމަށް ލަފާކުރެވޭ ކަމަށެވެ.
މެޓް އޮފީހުން ވަނީ ޢީދު ބަންދާ ދިމާވާ ގޮތަށް ރާއްޖޭގެ އެކި ހިސާބުތަކަށް ވިއްސާރަ ކުރާނެ ކަމަށް މީގެ ކުރިންވެސް ވިދާޅުވެފައެވެ. އެހެންކަމުން ކަނޑުދަތުރު ކުރާ ފަރާތްތަކުން މޫސުމަށް ބަލައިގެން ދަތުރުތައް ރޭވުމަށް އެއިދާރާއިންވަނީ އިލްތިމާސް ކޮށްފައެވެ.