ދުނިޔޭގެ ނޫސްވެރިކަމުގެ މިނިވަންކަމަށް 31 އަހަރު ފުރޭ ދުވަހާއި ގުޅިގެން، މިދުވަސް ޤައުމީ ފެންވަރުގައި ފާހަގަ ކުރުމަށް ހަރަކާތްތަކެއް ހިންގުމަށް ނިންމައިފިއެވެ. މިހަރަކާތްތައް ހިންގުމަށް ނިންމާފައިވަނީ މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން ގުޅިގެންނެވެ.
ކޮންމެ އަހަރެއްގެވެސް މެއި މަހުގެ 3 ވަނަ ދުވަހަކީ ދުނިޔޭގެ ނޫސްވެރިކަމުގެ މިނިވަންކަން ފާހަގަކުރަމުން އަންނަ ދުވަހެވެ.
ދުނިޔޭގެ ނޫސްވެރިކަމުގެ މިނިވަންކަމުގެ ދުވަހަށް ޔުނެސްކޯއިން މިއަހަރު ކަނޑައަޅާފައިވާ ޝިއާރަކީ
"Journalism under Digital Siege".
މިއަހަރުގެ ބައިނަލްއަޤްވާމީ ނޫސްވެރިކަމުގެ މިނިވަންކަމުގެ ދުވަސް ފާހަގަކުރުމުގެ އެންމެ ބޮޑު މަގްސަދަކީ ނޫސްވެރިކަމުގެ މިނިވަންކަމުގެ މުހިންމުކަން ރައްޔިތުންނާއި ސަރުކާރަށް ހަނދުމަކޮށްދީ ނޫސްވެރިން ކުރާ ބުރަމަސައްކަތުގެ އަގުވަޒަންކޮށް ނޫސްވެރިކަމުގެ މިނިވަންކަމަށް އިޙްތިރާމްކުރުމުގެ ސަގާފަތެއް ދެމެހެއްޓުމަށް ބާރުއެޅުންކަމަށެވެ. މީގެ އިތުރުން ނޫސްވެރިކަމުގެ މިނިވަންކަމުގެ އަސާސީ ސިފަތައް ދަމަހައްޓައި ރާއްޖޭގައި ނޫސްވެރިކަމުގެ މިނިވަންކަމުގެ ހާލަތު ވަޒަންކޮށް
އެކަންކަން ރައްޔިތުންނަށް ބުނެދިނުމާއި، މަސައްކަތުގެ މާހައުލުގައާއި އަދި އެނޫންވެސް ވަގުތުތަކުގައި ނޫސްވެރިން އެމީހުންގެ ގައުމީ ޒިންމާ އަދާކުރުމުގެ ތެރޭގައި، އަނިޔާވެ އަދި ފުރާނަ ގެއްލިދިޔަ ނޫސްވެރިންގެ ހަނދާން އައުކުރުންވެސް މިދުވަސް ފާހަގަކުރުމުގެ މަޤްސަދުތަކުގެ ތެރޭގައި ހިމެނެއެވެ.
މިއަހަރުގެ މިދުވަހާއި ގުޅިގެން ކުރިއަށް ގެންދާ ހަރަކާތްތަކުގެ ތެރޭގައި މިދުވަހާއި ގުޅިގެން ޤައުމީ ކެމްޕެއިނެއް ކުރިއަށް ގެންދިއުމަށްވަނީ ހަމަޖެހިފައެވެ.
މިކެންޕެއިންގައި ކުރިއަށް ގެންދިއުމުގެ ރާވާފައިވާ ހަރަކާތްތަކުގެ ތެރޭގައި މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިންގ ކޮމިޝަނުން ދޫކުރާ ޚާއްސަ ބެޖް ބޭނުންކުރުމާއި، ބުލޫ ކުލައިގެ ހެދުމެއް/ ގަމީހެއް ލުމާއި، މިއަހަރުގެ ޝިއާރާ ގުޅުވައިގެން ހަރަކާތްތައް ހިންގުން ނުވަތަ މުވައްޒަފުން މެދުވެރިކޮށް މިޝިއާރުގެ މަގްސަދު ހާސިލުވާނެ ފަދަ މެސެޖެއް އާންމުންނަށް ފޯރުކޮށްދިނުމާއި ފޮޓޯ ނެގުމަށްފަހު ސޯޝަލް މީޑިއާ PressFreedomMV# ބޭނުންކުރުމަށްވަނީ ނިންމާފައެވެ. މި ހަރަކާތް މީޑިއާ އިދާރާތަކުން މިމަހުގެ 3ވަނަ ދުވަހު ކުރިއަށް ގެންދާއިރު ސަރުކާރުގެ އޮފީސްތަކާއި މިނިސްޓްރީތަކުން މިހަރަކާތް ކުރިއަށް ގެންދާނީ މިމަހުގެ 8ވަނަ ދުވަހުއެވެ.
ނޫސްވެރިކަމުގެ މިނިވަންކަމުގެ ދުވަސް ފާހަގަކުރުމަށް ހިންގާ އިތުރު ހަރަކާތްތަކުގެ ތެރޭގައި ގްރޭޑް 11 އަދި 12ގެ ކުދިންނަށް އަމާޒުކޮށް ބަހުސްއެއް ކުރިއަށް ގެންދިއުމަށްވަނީ ހަމަޖެހިފައެވެ. މިބަހުސްގެ ބޭނުމަކީ ސްކޫލް ނިންމާ ކުދިންގެ މެދުގައި ނޫސްވެރިކަމަށް ޝައުގުވެރިކަން އުފައްދައި، މިދާއިރާއިން ކުރިއަށްދާން ބޭނުންވާ ޒުވާނުންގެ މެދުގައި ނޫސްވެރިކަމަށް ލޯބިޖެއްސުމެވެ. އަދި ނޫސްވެރިކަމާއި ޚިޔާލު ފާޅުކުރުމުގެ މުހިންމުކަން ދަރިވަރުންނަށް އަންގައިދިނުމާއި އާއްމު ރައްޔިތުންނަށް ނޫސްވެރިކަމުގެ މުހިއްމުކަމާއި ގުޅޭ މައުލޫމާތު ބަހުސްއެއްގެ ސިފައިގައި ގެނެސްދިނުމެވެ.
މިދުވަސް ފާހަގަކުރުމަށް ލޭ ހަދިޔާ ކުރުމުގެ ޕްރޮގްރާމެއް ހިންގުމަށްވެސްވަނީ ހަމަޖެހިފައެވެ. ލޭ ހަދިޔާކުރުމުގެ ކެމްޕެއިންގެ ބޭނުމަކީ ހާލުގައި ޖެހިފައިވާ ބަލިމީހުންނަށް ބޭނުންވާ ލޭގެ ބާވަތްތައް ރައްކާތެރިކަމާއިއެކު ލިބެން ހުރިކަން ކަށަވަރުކުރުމެވެ. އަދި ގަވާއިދުން ލޭ ހަދިޔާކުރުމުގެ ބޭނުންތެރިކަމާ މެދު އާއްމު ރައްޔިތުން ހޭލުންތެރިކުރުވުމެވެ. މި ކެންޕެއިން އޮންނާނީ މިމަހުގެ 27ވަނަ ދުވަހު މެންދުރު ފަހު މޯލްޑިވްސް ބްލަޑް ސަރވިސްގަ އެވެ. "ޝުކުރުވެރި ހިތަކާއެކު، ލޭ ހަދިޔާ ކުރަމާ" މި ޝިއާރުގެ ދަށުން ކުރިއަށްގެންދާ ލޭހަދިޔާކުރުމުގެ މި ކެމްޕެއިންގައި ބައިވެރިވުމުގެ ފުރުސަތު ނޫސްވެރިންގެ އިތުރަށް އާއްމުންނަށްވެސް ވަނީ ހުޅުވާލާފައެވެ.
ނޫސްވެރިންގެ އަގު ވަޒަން ކުރުމުގެ ގޮތުން ރާއްޖޭގައި ގިނަ ހަރަކާތްތަކެއް އަންނަނީ ކުރަމުންނެވެ. އޭގެތެރެއިން ފާހަގަކުރެވޭ އެއްކަމަކީ ކޮންމެ އަހަރަކު ބާއްވާ ނޫސްވެރިކަމުގެ ހާއްސަ އިނާމް ދިނުމުގެ ރަސްމިއްޔާތެވެ. މިރަސްމިއްޔާތުވެސް މިހާތަނަށް 8 ފަހަރު ވަނީ ބާއްވާފައެވެ. މި އިނާމުގައި މީޑިއާއާއި ގުޅުންހުރި ގިނަ ދާއިރާތައްދަނީ ހިމަނަމުންނެވެ.