ސޫރިޔާގެ ހަނގުރާމައިގެ ސަބަބުން އަމިއްލަ ވަޒަން ދޫކުރަން މަޖުބޫރުވެފައިވާ އެޤައުމުގެ ރެފިއުޖީން އަލުން ވަޒަންވެރިކުރުމަށް ބައިނަލްއަޤްވާމީ ދުނިޔެއިން އިސްކަން ދިނުމަށް ރެފިއުޖީންނާ ބެހޭ އދގެ އިދާރާގެ އިސްވެރިޔާ ގޮވާލައްވައިފިއެވެ.2011 ވަނަ އަހަރުން ފެށިގެން ސޫރިޔާގައި ހިނގަމުންދާ ވަރުގަދަ ހަނގުރާމައިގައި އެތައް ހާސް ބަޔަކު މަރުވެފައިވާއިރު، އެތައް މިލިއަން ބަޔަކު ވަނީ ރެފިއުޖީންގެ ގޮތުގައި އަވަށްޓެރި އަދި ދުރު ގައުމުތަކަށް ވެސް ހިޖުރަކޮށްފައެވެ.ލުބުނާން، އުރުދުން، ތުރުކީ އަދި މިޞްރު ފަދަ ޤައުމުތަކުގައި ސޫރިޔާގެ އެތައް މިލިއަން ރެފިއުޖީންނެއް އުޅެމުންދެއެވެ. މީގެ އިތުރުން، ނުރައްކާތެރި އޭޖިއަން ކަނޑު ހުރަސްކޮށް ސޫރިޔާގެ ގިނަ ބަޔަކު ދަނީ ވިލާތުގެ ޤައުމުތަކަށް ވެސް ވަންނަމުންނެވެ. މިފަދަ ހުރަސްކުރުންތަކުގައި ގިނަ އަދަދެއްގެ ބަޔަކު މަރުވެފައިވާ އިރު، ސޫރިޔާގެ ރެފިއުޖީން ވިލާތަށް ވަނުމަކީ އެޤައުމުގެ ހަނގުރާމައަށް ސުލްޙަވެރި ހައްލެއް ހޯދުމަށް ހުޅަނގުގެ ބާރުތަކަށް ލިބިގެންދާނެ ހިތްވަރެއްގެ ގޮތުގައި ރެފިއުޖީންނާ ބެހޭ އދގެ އިދާރާގެ އިސްވެރިޔާ ފިލީޕޯ ގްރާންޑޭ މިވަނީ ސިފަ ކުރައްވާފައެވެ.އުރުދުންގައި ހުންނަ ޒަތާރީ ރެފިއުޖީން ކޭމްޕަށް ޒިޔާރަތް ކުރައްވާ ނޫސްވެރިންނާ ވާހަކަ ދައްކަވަމުން ގްރާންޑޭ ވިދާޅުވީ، ވިލާތަށް ވަންނަ ރެފިއުޖީންގެ އަދަދު އިތުރުވުމަކީ ވިލާތަށް މައްސަލައަކަށް ވީ އިރު، މިއީ ހަނގުރާމައަށް އަވަސް ހައްލެއް ހޯދުމަށް ބައިނަލްއަޤްވާމީ ދުނިޔެއަށް މަޖުބޫރު ވެގެން ދިޔަ ކަމެއް ކަމަށެވެ. ގްރާންޑޭ ވަނީ ޤައުމުތަކުގައި ތިބި ސޫރިޔާގެ ރެފިއުޖީން ވަޒަންވެރިކުރުވުމަށް މަޝްރޫއުތައް ހިންގުމަށް ވެސް ގޮވާލައްވާފައެވެ. އަދި މިކަމަށްޓަކައި އަންނަ މާޗް މަހުގެ ފަހު ކޮޅު އދ އިން ޙާއްސަ ސަމިޓެއް ބާއްވާނެ ކަމަށާ މި ސަމިޓްގެ ބޭނުމަކީ މިފަދަ މަޝްރޫޢުތައް ހިންގާ ސޫރިޔާގެ ކިޔަވާ ކުދިންނަށް ސްކޮލަރޝިޕްތައް ހަމަޖައްސާ ހަނގުރާމައިގެ ސަބަބުން ވަކިވެފައިވާ އާއިލާތައް އަލުން ގުޅުވައިދިނުން ފަދަ ކަންކަމަށް ބައިނަލްއަޤްވާމީ ޤައުމުތަކުގެ ކިބައިން އެދޭނެ ކަމަށް ވެސް ގްރާންޑޭ ވިދާޅުވިއެވެ.ސޫރިޔާގެ ހަނގުރާމައަށް ސުލްޙަވެރި ހައްލެއް ހޯދުމަށް ބައިނަލްއަޤްވާމީ ދުނިޔެއިން ކުރަމުންދާ މަސައްކަތުގެ ދަށުން މިމަހުގެ 25 ވަނަ ދުވަހު ސަރުކާރާ އިދިކޮޅު ފަރާތްތައް ބައިވެރިވާ މަޝްވަރާ ވާހަކަތަކެއް އދން ވަނީ ރާއްވާފައެވެ. މި ވާހަކަތަކަށް ހަފްތާއަކަށް ވީއިރު މި މަޝްވަރާތަކުގައި އިދިކޮޅު ފަރާތްތަކުން ބައިވެރިވާނެ ޖަމާޢަތްތަކުގެ ލިސްޓެއް އަދިވެސް އެކުލަވާ ނުލެވެއެވެ. ސޫރިޔާގެ ސަރުކާރުން މިވާހަކަތަކުގައި ބައިވެރިވާނެކަން މާ ކުރިން އިޢުލާނުކޮށްފައިވާއިރު، އިދިކޮޅު ފަރާތްތަކުގެ ލިސްޓެއް ބޭނުންވާނެކަން އެފަރާތުން ވަނީ ހާމަކޮށްފައެވެ. އެހެންނަމަވެސް ވާހަކަތަކުގެ ކުރިން އިދިކޮޅު ފަރާތްތަކުގެ ލިސްޓެއް ހެދުމުގެ ވިސްނުމެއް އދގެ ނެތްއިރު މިކަމުގެ ސަބަބުން ވާހަކަތައް ނާކާމިޔާބުވުމަކީ ދުރުގައިވާ ކަމެއް ނޫން ކަމަށް މުރާސިލުން ބުނެއެވެ.