ފެލިވަރުގެ ބިން ހިއްކުމުގެ މަސައްކަތް ނިމި، ފެސިލިޓީ ތަރައްޤީކުރާނެ ބަޔަކު ހޯދުމަށް ވަރަށް އަވަހަށް ހުޅުވާލާނެ ކަމަށް މިފްކޯގެ ސީއީއޯ އިސްމާއީލް ފައުޒީ ވިދާޅުވެއްޖެއެވެ. ފެލިވަރު ތަރައްޤީކުރަން ބޭނުންވާ ބިން ހިއްކުމުގެ މަސައްކަތް ނިމުމަކާވަނީ ގާތްވެފައެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީގެ ސީއީއޯ އިސްމާއީލް ފައުޒީ ވިދާޅުވީ މިއީ ފެލިވަރު ތަރައްޤީކުރެވުނީއްސުރެ، ކެޕޭސިޓީ އިތުރުކުރުމަށް ހިންގޭ އެންމެ ބިޔަ މަޝްރޫޢުކަމަށެވެ. އެކި ނަންނަމުގައި ފެލިވަރާއެކު މިފްކޯގެ ޚިދުމަތް ފެށީ މީގެ 44އަހަރު ކުރިންނެވެ. ފައުޒީ ވިދާޅުވި ފެލިވަރު ތަރައްޤީކުރުމުގެ މަސައްކަތް ކުރިއަށްގެންދަނީ އިންޑިއާގެ އެގްޒިމް ބޭންކްގެ އެހީގައިކަމަށެވެ.
މި ޕްރޮޖެކްޓްގެ އެންމެ ބޮޑު ބޭނުމަކީ ފެލިވަރުގެ ފްރީޒިންގް ކެޕޭސިޓީ އިތުރުކޮށް، މަސްގަނެ ޕްރޮސެސްކުރާ މިންވަރު އިތުރުކުރުމެވެ. އަދި ފެލިވަރުގެ ބަނދަރަކީ ބައިނަލްއަޤްވާމީ ބޯޓުފަހަރަށް ފަސޭހަކަމާއެކު ކައިރިކޮށް ޚިދުމަތް ދެވޭ ފެންވަރުގެ ބަނދަރެއްގެ ގޮތުގައި ތަރައްޤީކުރުމެވެ. ފެލިވަރު ހިއްކާ ބަނދަރު ބޮޑުކުރުމުގެ މަސައްކަތް އެމްޓީސީސީއާ ހަވާލުކުރީ 2021ވަނަ އަހަރުގެ ޖެނުއަރީމަހުއެވެ.
"ބިން ހިއްކުމުގެ މަސައްކަތުގެ %97 މިހާތަނަށް ވަނީ ނިމިފައި. މިއާއެކު ބަނދަރު ތަރައްޤީވެގެން އަންނާނީ ރާއްޖޭގެ މަސް ދޯނިފަހަރަށް މަސް ކިރުމަށް ޚާއްސަ ސަރަޙައްދާ އަދި މަސް އެކްސްޕޯޓްކުރާ ބޭރުގެ ބޯޓުފަހަރަށް ފަސޭހައިން ކައިރިކޮށް ޚިދުމަތް ހޯދޭނެ ބަނދަރަކާއެކު." މިފްކޯގެ ސީއީއޯ އިސްމާއީލް ފައުޒީ ވިދާޅުވިއެވެ.
ފައުޒީ ވިދާޅުވީ ފެލިވަރު ތަރައްޤީ ކުރުމުގެ މަސައްކަތްތައް ފަށާފައި މިވަނީ، ކޫއްޑޫއާއި އައްޑޫގެ ފިޝަރީޒް ކޮމްޕްލެކްސްގެ ތަޖުރިބާއަށް ބަލާ، ޚިދުމަތް ދިނުމަށް އެންމެ ލުއިސޭހަވާނެ ގޮތްތައް ބަލައިގެންކަމަށެވެ. ބަނދަރާ ކައިރި ނުކުރެވުމުގެ ސަބަބުން މިހާރު އެކްސްޕޯޓް ކުރާ ބޯޓު ފަހަރަށް މަސް ގެންދަނީ ދޯނިފަހަރުގައެވެ. ފެލިވަރު ބަނދަރު ތަރައްޤީވެގެން އަންނާނީ މިކަންކަމަށް ޙައްލު ލިބިގެންކަމަށް އިސްމާއީލް ވިދާޅުވިއެވެ.
އަދި މަސް ފިނިކުރާ ކެޕޭސިޓީ އިތުރުވެގެން ދިއުމާއެކު މަސްވެރިންގެ އަތުން މަސް ގަންނަ މިންވަރު އިތުރުވެގެންދާނެއެވެ.
ޅ. ފެލިވަރު ބިން ހިއްކުމާއި ބަނދަރު ތަރައްޤީ ކުރުމުގެ މަޝްރޫއުގެ މަސައްކަތަށް ބޭނުންވާ ބޮޑުހިލައިގެ ފުރަތަމަ ޝިޕްމެންޓް ވަނީ ޕްރޮޖެކްޓް ސައިޓަށް ގެންދެވިފަ. ބިންހިއްކުމާއި، ބަނދަރު ފުންކުރުމުގެ 95 އިންސައްތަ މަސައްކަތް ވަނީ ފުރިހަމަ ކުރެވިފަ. #MTCCProjects #RayyithungeKunfuni pic.twitter.com/QcAXg06nDO
— MTCC Plc (@MTCCPlc) April 3, 2022
ފެލިވަރު އިތުރަށް ތަރައްޤީ ކުރުމަށް ހިންގާ މަޝްރޫޢުގެ ދަށުން އެރަށުގައި 4000 ޓަނުގެ ކޯލްޑް ސްޓޯރޭޖެއް ނުވަތަ ފިނި ކޮށާރަކާއި، ދުވާލަކު 100 ޓަނުގެ މަސް ޕްރޮސެސްކޮށް، ދަޅުގައި އަދި ޕައުޗުގައި ބަންދުކުރެވޭނެ ކާރުޚާނާއެއް ޤާއިމުކުރުމަށް ވަނީ ހަމަޖެހިފައެވެ.
މީގެއިތުރުން ބްރައިން ފްރީޒިންގ ފެސިލިޓީއާއި، ރެފްރިޖަރޭޓަޑް ސީ ވޯޓަރ ފެސިލިޓީއާއި، ފިޝްމީލް ޕްލާންޓަކާއި އެހެނިހެން ވަޞީލަތްތައްވެސް ފެލިވަރުގައި ޤާއިމުކުރާނެއެވެ.