ސަރުކާރުން އިޢުލާންކޮށްފައިވާ އެއަރޕޯޓްތަކުގެ މަސައްކަތް ކޮންޓްރެކްޓަރ ފައިނޭންސް އުސޫލުން ކުރިއަށް ނުގެންދެވިއްޖެނަމަ، ދަޢުލަތުގެ ބަޖެޓުން ޚަރަދުކޮށްގެންވެސް މަސައްކަތް ނިންމާނެކަމަށް ޕްލޭނިން މިނިސްޓަރ އަސްލަމް ވިދާޅުވެއްޖެއެވެ.
ސަރުކާރުން ދާދިފަހުންވަނީ ރާއްޖޭގެ އެކި ސަރަޙައްދުތަކަށް ބަހާލައިގެން 6 އެއަރޕޯޓް ތަރައްޤީކުރުމުގެ މަސައްކަތް ކުރިއަށްގެންދާނެ ފަރާތްތައް ހޯދުމަށް އިޢުލާންކޮށްފައެވެ. އެއަރޕޯޓް ތަރައްޤީކުރުމަށް ހުޅުވާލި ރަށްތަކަކީ ބ.ތުޅާދޫ، ށ.ބިލެތްފަހި، ތ.ވިލުފުށި، ހދ.މަކުނުދޫ، ފ.މަގޫދޫގެ އިތުރުން ރ.އަތޮޅުގެ ދެކުނު ބިތުގައި އެއަރޕޯޓް ތަރައްޤީކުރުމަށެވެ.
މި 6 އެއަރޕޯޓް ތަރައްޤީކުރުމަށް 133މިލިއަން ޑޮލަރު ހޭދަވާނެ ކަމަށް ޕްލޭނިންގ މިނިސްޓްރީން ލަފާކޮށްފައިވެއެވެ. އެއީ ދިވެހި ރުފިޔާއިން 2 ބިލިއަނަށްވުރެ ގިނަ ރުފިޔާއެވެ.
އެއަރޕޯޓްތަކުގެ މަސައްކަތް ކުރިއަށްގެންދިއުމަށް ހުޅުވާލީ ކޮންޓްރެކްޓަރ ފައިނޭންސް އުސޫލުންނެވެ. މި ޕްރޮޖެކްޓަށް ހުޅުވާލާފައިވަނީ ކްރޮސް-ސަބްސިޑީގެ ގޮތުގައި ފަތުރުވެރިކަމުގެ ބޭނުމަށް ރަށް ނުވަތަ ބިން ނުވަތަ ފަޅު ކުއްޔަށް ދިނުމާބެހޭ ގަވާއިދުގެ ދަށުންނެވެ. ފައިނޭންސް ކުރުމުގެ އުސޫލު ކަނޑައަޅާފައިވަނީ އެއަރޕޯޓް ތަރައްޤީކުރުމަށް ދޭ އިންވެސްޓްމަންޓް އަދަދު އެ މަޝްރޫއެއްގެ މުޤާބިލުގައި، ފަތުރުވެރިކަމަށް ކުއްޔަށް ދޫކުރާނެ ރަށް ނުވަތަ ބިން ނުވަތަ ފަޅުގެ އެކްއިޒިޝަން ކޮސްޓް އަދި އެތަނެއްގެ ބިމުގެ ކުލީގެ ގޮތުގައި ކަނޑައަޅާ ފައިސާގެ އަދަދާ އަޅައި ކަނޑައި ދޭގޮތަށެވެ.
މިހާތަނަށް އައިއިރު މި މަޝްރޫޢުތަކަށް ކުރިމަތިލުމަށް ދެ ފަހަރެއްގެ މަތިން ހުޅުވާލާފައިވެއެވެ. ނަމަވެސް މިހާތަނަށް އައިއިރު އެއްބަސްވުމަކާއި ހަމައަށް ގޮސްފައެއް ނުވެއެވެ.
އެއަރޕޯޓްތައް ތަރައްޤީކުރުމަށް ކުރަމުންދާ މަސައްކަތާއި ގުޅޭގޮތުން ރައްޔިތުންގެ މަޖިލީހުގެ މެންބަރުން ކުރި ސުވާލުގައި ޕްލޭނިން މިނިސްޓަރ އަސްލަމް ވިދާޅުވީ މަސައްކަތަށް އެކަށީގެންވާ ބިޑްތައް ނުލިބޭނަމަ ދަޢުލަތުގެ ބަޖެޓުން ޚަރަދުކޮށްގެންވެސް މަސައްކަތްތައް ނިންމާނެކަމަށެވެ.
"ލިބޭ ޕްރޮޕޯސަލްތައް މިކަން ނުވިތަ ދަޢުލަތުގެ ބަޖެޓުން ދެން ގެންދާނީ. އިޢުލާންކުރި 6 އެއަރޕޯޓްގެ މަސައްކަތް ހުއްޓައެއް ނުލާނަން. އެއް މޮޑެލް ފެއިލްވެއްޖެނަމަ އަނެއް މޮޑެލަށް ދާނަން." އަސްލަމް ވިދާޅުވިއެވެ.
މި މަސައްކަތުގައި ހިމެނޭ މަގޫދޫ އެއަރޕޯޓްގެ ބިން ހިއްކުމަށް މިހާރު ބަޔަކާއި ހަވާލުކޮށްފައިވާ ކަމަށް މިނިސްޓަރ ވިދާޅުވިއެވެ. އަދި ވިލުފުށީގައިވެސް ބިން ހިއްކުމުގެ މަސައްކަތް ހިމެނޭތީ، އަންނަ އަހަރު ނިމުމުގެ ކުރިން މި މަސައްކަތްވެސް ނިންމާ ޚިދުމަތް ފަށާނެކަމަށް ވިދާޅުވިއެވެ.
ސަރުކާރުން ޢަމާޒުކޮށްފައިވަނީ މިއަހަރު 2 އެއަރޕޯޓެއްގެ މަސައްކަތް ނިންމައި ޚިދުމަތް ފެށުމަށެވެ. އެއީ މުލަކަތޮޅު މުލީ އެއަރޕޯޓާއި ފަރެސްމާތޮޑާ އެއަރޕޯޓްގެ މަސައްކަތެވެ.