މާލޭގެ ރައްޔިތުންނަށް ގޯތި ދިނުމަށް ސަރުކާރުން ނިންމާފައިވާ ނިންމުމުގެދަށުން މިހާރު ކުރަމުންދަނީ، މާކްސް ދޭނެ ގޮތުގެ އުސޫލު ފައިނަލް ކުރުމުގެ މަސައްކަތްކަމަށް މިނިސްޓަރ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
މަޖިލީހުގެ މެމްބަރުންގެ ސުވާލުތަކަށް ޖަވާބުދެއްވަމުން މިނިސްޓަރ އަސްލަމް ވިދާޅުވީ ގޯތި ދޭއިރު ކުރިއާއި ޚިލާފަށް، މާކްސް ދިނުމުގައި މުހިންމު ބަދަލުތަކެއް ހިމަނާފައިވާނެކަމަށެވެ.
މަޖިލީހުގެ މެންބަރުން ކުރެއްވި ސުވާލުތަކަށް ޖަވާބުދެއްވަމުން ހައުސިން މިނިސްޓަރ މުޙައްމަދު އަސްލަމް ވަނީ، މާލެގެ ރައްޔިތުންނަށް ގޯތި ދިނުމުގައި މާކްސް ދޭ އުސޫލު ކަނޑައެޅުމަށް ކުރަމުންގެންދާ މަސައްކަތްތަކުގެ ތަފްސީލް ޙިއްސާކުރައްވާފައެވެ. މިނިސްޓަރ އަސްލަމް ވިދާޅުވީ މާލޭގެ ރައްޔިތުންނަށް ޚާއްސަކޮށް ގޯތިދިނުމުގައި، ބިން ދޫކުރާނީ މާލެއަށް އުފަން ރައްޔިތުންނަށް ކަމަށެވެ. ނަމަވެސް މާލޭގެ ދަފްތަރުގައި ޖެހިފައިވާ މީހުންނާމެދު ޢަމަލު ކުރާނެ ގޮތެއް ނިންމަމުންދާކަމަށް ވިދާޅުވިއެވެ.
ގޯތި ލިބޭ މީހާއަކީ މާލޭގައި 600އަކަފޫޓަށްވުރެ ބޮޑު ބިމެއް އޮތްމީހަކަށް، ނުވަތަ ވާރުތަ ކުރާ ބިމެއް އޮތް މީހަކަށްވެސް ވެގެން ނުވާނެކަމަށް އަސްލަމް ވިދާޅުވިއެވެ. އަދި އެފަދަ ބިމެއް އޮތްނަމަ، އެ ބިން ދޫކޮށްލާ ސަރުކާރުގެ ސްކީމްގައި ބައިވެރިވުމުގެ ފުރުޞަތު ލިބޭނެކަމަށް ވިދާޅުވިއެވެ.
މާކްސް ދިނުމުގައި އެންމެ ބޮޑު ބަދަލެއް ގެންނަނީ، އުމުރާއި ދަރިން ތިބި މިންވަރުން މާސްދޭ ނިޒާމަށެވެ. އަސްލަމް ވިދާޅުވީ މާކްސް ދިނުމުގައި ބަލާނީ، އާއިލާއެއް ބެލެހެއްޓުމުގައި އެމީހާގެ މައްޗަށް އޮތް ޒިންމާއަށް ނުވަތަ ބަލަދުއަރާ މީހުން ތިބި މިންވަރަށް ކަމަށެވެ. މީއީ ބޯހިޔާވަހިކަމަށް ބޭނުންޖެހިފައިވާ މީހުން ވަޒަންކުރުމުގައި ގެންނަ ބަދަލެކެވެ.
"މީހަކާ އިންދެގެން އުޅެންޏާ މާކްސް އިތުރުކުރުމުގެ ވިސްނުމެއް ނެތް. ނަމަވެސް ދަރިން ތިބެންޏާ ބަދަލު އަންނާނެ. ޖޮއިންޓް އެޕްލިކޭޝަނަށްވެސް ފުރުޞަތު އޮންނާނެ. މިހާރު މި ބޮޑަށް ބަލާނީ ބަލަދު އަރާ މީހުން ތިބީ ކިހާ ވަރަކަށްތޯ." އަސްލަމް ވިދާޅުވިއެވެ.
މާކްސްދޭ އުސޫލު އެކުލަވާލުމުގައި މިހާރު ނުނިމި އޮތީ ދިރިއުޅުމުގެ ޙާލަތަށް މާކްސް ދޭނެ އުސޫލު ކަނޑައެޅުންކަމަށް މިނިސްޓަރ ވިދާޅުވިއެވެ. އެކަމާމެދު އަދި ގޮތެއް ނުނިންމާކަމަށްވެސް އަސްލަމް ވިދާޅުވިއެވެ.
ގޯތި ދޫކުރުމަށް ހުޅުވާލުމުގެ ކުރިން މާލޭގެ ދާއިރާތަކަށް ނިސްބަތްވާ ރައްޔިތުންގެ މަޖިލީހުގެ މެންބަރުންނާ މަޝްވަރާ ކުރައްވާނެކަމަށްވެސް ހައުސިން މިނިސްޓަރ އަސްލަމް މަޖިލީހުގައި ވިދާޅުވެފައިވެއެވެ.
މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާވަނީ މާލޭގެ ރައްޔިތުންނަށް ގޯތިދިނުމަށް ސަރުކާރުން ނިންމާފައިވާގޮތް ހިއްސާކޮށްފައެވެ. އެގޮތުން ހުޅުމާލެއިން 1000 ގޯތި، ގުޅީފަޅުން 2000 ގޯތި އަދި ގިރާވަރު ފަޅު ހިއްކައިގެން މަދުވެގެން 2000 ގޯތި ހިލޭ ދެއްވާނެކަމަށް ރައީސް ވިދާޅުވިއެވެ. އަދި ގޯތި ދޫކުރުމުގެ މަސައްކަތް މިއަހަރުގެ ޖޫންގައި ފަށްޓަވާނެކަމަށްވެސް ރައީސް ވަނީ ވިދާޅުވެފައެވެ.