މިއަހަރުގެ "ފުޑް އެންޑް ބެވަރޭޖް ޝޯ" ގެ ޑިޖިޓަލް ޕާޓްނަރަކަށް ދިރާގު ހަމަޖައްސައިފިއެވެ. މިއީ ފުޑް އެންޑް ބެވަރޭޖް ޝޯ ބާއްވާ 5ވަނަ އަހަރެވެ.
މިއަހަރުގެ ފުޑް އެންޑް ބެވަރޭޖް ޝޯ އޮންނާނީ ޖޫންމަހުގެ 2އިން 4އަކަށް ހުޅުމާލޭ ސެންޓްރަލް ޕާކުގައެވެ. ފުޑް އެންޑް ބެވަރޭޖް ޝޯއަކީ ހައިރައިޒުން އިންތިޒާމްކޮށްގެން ބާއްވާ ޝޯއެކެވެ. މި ޝޯގެ އެންމެ މުހިންމު އެއް ބޭނުމަކީ ރާއްޖޭގައި ފުޑް އެންޑް ބެވަރޭޖްގެ ދާއިރާގައި މަސައްކަތްކުރާ ވިޔަފާރިތައް އެއްތަނަކަށް ގެނެސް އެމީހުންގެ އުފެއްދުންތައް ދައްކާލުމެވެ.
މި އެކްސްޕޯގެ ޑިޖިޓަލް ޕާޓްނަރުގެ ހައިސިއްޔަތުން ދިރާގުން މި ޝޯގައި ބައިވެރިވާ ވިޔަފާރިތަކަށް ޑިޖިޓަލް އެސިސްޓަންސް ފޯރުކޮށްދޭނެއެވެ. އަދި ގޭގައި މަސައްކަތްކުރާ އެކިއެކި ވިޔަފާރިތަކަށްވެސް ދިރާގުން އެހީތެރިކަން ފޯރުކޮށްދޭނެއެވެ.
ފުޑް އެންޑް ބެވަރޭޖް ޝޯއަށް ރާއްޖެއާއި އަދި ރާއްޖެއިން ބޭރުގެ ފަރާތްތަކުން ޒިޔާރަތްކުރާނެއެވެ. މި ޝޯއަށް ރިސޯޓްތަކާއި، ސަފާރީތަކާއި، ހޮޓެލްތަކާއި، ގެސްޓްހައުސްތަކާއި، ރެސްޓޯރަންޓްތަކާއި، ފުޑް އެންޑް ބެވަރޭޖް ހޯލްސޭލްކުރާ ފަރާތްތަކުން ޒިޔާރަތްކުރާނެއެވެ. އެހެންކަމުން މިއީ ވިޔަފާރިތަކަށް އެމީހުންގެ އުފެއްދުންތައް ދައްކާލުމަށް ލިބިގެންދާ ރަނގަޅު ފުރުސަތެކެވެ.