ކޯވިޑް ވެކްސިން ފުރިހަމަ ނުކުރާ މީހަކަށް ޙައްޖާއި އުމްރާއަށް ސައުދީއަށް އެތެރެނުވެވޭނެކަމަށް އޮތް އޮތުން އެޤައުމުން ނިމުމަކަށް ގެނެސްފިއެވެ.
ސައުދީ ސަރުކާރުން ބުނީ ހައްޖާއި އުމްރާއަށް އެޤައުމަށް އެތެރެވުމަށް ދެން ކޮންމެހެން ވެކްސިން ފުރިހަމަ ކުރަން ނުޖެހޭނެކަމަށެވެ. އެހެންނަމަވެސް މި ބަދަލު ގެނެސްފައިވަނީ ހަމައެކަނި ސައުދީން ބޭރުގެ ރައްޔިތުންނަށެވެ. މީގެކުރިން ސައުދީން ކަނޑައަޅާފައިވާ ގޮތުން ކޯވިޑުން ދިފާއުވުމަށް ޖަހާ ވެކްސިންގެ ދެ ޑޯޒާއި ބޫސްޓަރ ޑޯޡްވެސް ފުރިހަމަ ނުކުރާ މީހަކަށް ދެ ޙަރަމްފުޅަކަށް އެތެރެއެއް ނުވެވޭނެއެވެ.
Worshipers after Isha Prayers today.. pic.twitter.com/ZU7KYLpyrX
— Haramain Sharifain (@hsharifain) March 7, 2022
ކޯވިދާއި ގުޅިގެން އަޅާފައިވާ ފިޔަވަޅުތައް މިމަހުގެ 7 ވަނަދުވަހު ދޫކޮށްލުމުން ގިނަ އަދަދެއްގެ ބަޔަކު އެރޭ ޙަރަމްފުޅަށް ނަމާދަށް ދިޔަ.
ކޯވިޑުން ރައްކާތެރިވުމަށް ދެ ޙަރަމްފުޅުގައި އަޅާފައިވާ ފިޔަވަޅުތައް ސައުދީން ވަނީ މިދިޔަ ހަފްތާގެ ތެރޭގައި ދޫކޮށްލާފައެވެ. މިގޮތުން ގައިދުރުކޮށް ނަމާދުކުރުން ނިންމުކަށް ގެނެސް ދުނިޔޭގެ ހުރިހާ ސަރަހައްދަކުން އުމްރާއަށް އެތެރެވެވޭނެކަން ސައުދީން ވަނީ އިއުލާންކޮށްފައެވެ. އަދި ކޯވިޑްގެ ކުރިން ގެންދިޔަ ގޮތަށް މިއަހަރުގެ ޙައްޖުގެ އަޅުކަން ކުރިޔަށް ގެންދާނެކަންވެސް ސައުދީން ވަނީ ހާމަކޮށްފައެވެ. އަދި ޙައްޖަށް މީހުން ގެންދިޔުމަށް ބޭނުންވާ ކޯޓާ ވަރަށް އަވަހަށް ދޫކުރާނެކަންވެސް އެޤައުމުން ވަނީ އިއުލާންކޮށްފައެެވެ.