ފެނަކައިގެ އިންސްޓިޓިއުޓް އޮފް ރިސަރޗް އެންޑް ޓެކްނޮލީގެ ތަމްރީންތަކާއި ހޯދުންތައް، ބައިނަލްއަޤްވާމި ފެންވަރަށް ފުޅާކުރުމުގެ މަސައްކަތް، އެކި ޤައުމުތަކާ ގުޅިގެން ފަށާފައިވާކަމަށް ފެނަކަ ކުންފުނީގެ މެނޭޖިންގ ޑިރެކްޓަރ އަޙުމަދު ސަޢީދު ވިދާޅުވެއްޖެއެވެ. ދާއިރާގެ މުހިންމު 3 ރިސަރޗް މަސައްކަތެއް އެ އިންސްޓިޓިއުޓުންވަނީ ފަށާފައެވެ.
2021ވަނަ އަހަރު އުފައްދާ ތަމްރީންތައް ފެށި ފެނަކަ އިންސްޓިޓިއުޓް އޮފް ރިސަރޗް އެންޑް ޓެކްނޮލޮޖީ ޚާއްސަކޮށްފައިވަނީ ފެނާއި ނަރުދަމާ އަދި ކަރަންޓުގެ ޚިދުމަތް ދިނުމުގެ ދާއިރާއިން މީހުން ތަމްރީންކުރުމަށެވެ. މިހާތަނަށް އައިއިރު މި ދާއިރާތަކުގެ އެކި ތަމްރީންތައް 113 ދަރިވަރަކުވަނީ ފުރިހަމަކޮށްފައެވެ. އަދި ފެނަކައިން ފެށި "ފުނަރަ" ޕްރޮގްރާމުން އިންޖީން މެއިންޓަނަންސް އެންޑް ރިޕެއަރިން ކޯސް ފުރިހަމަކޮށް 23 ދަރިވަރަކު މިވަނީ ދަސްވެނިވެފައެވެ. މިކަމަށް ޚާއްސަކޮށް ފެނަކައިން ބޭއްވި ޙަފްލާގައި ކޯސް ފުރިހަމަކުރި ދަރިވަރުންނަށް ސެޓްފިކެޓް ހަވާލުކޮށްދެއްވީ މިނިސްޓަރ އޮފް ހަޔަރ އެޑިއުކޭޝަން ޑރ.އިބްރާހީމް ހަސަނެވެ.
މި ރަސްމިއްޔާތުގައި ފެނަކައިގެން މެނޭޖިންގ ޑިރެކްޓަރ އަޙްމަދު ސަޢީދު މުޙައްމަދު ވިދާޅުވީ އިންސްޓިޓިއުޓް އުފެއްދިއިރު، ގިނަ ބައެއްގެ ފާޑުކިއުން އަމާޒުވިކަމަށެވެ. ނަމަވެސް މިހާރު މި ދައްކުވައިދެނީ މިދާއިރާއަށް މީހުން ބިނާކުރުމުގައި އިންސްޓިޓިއުޓްގެ މުހިންމުކަމާއި، އަދި ކުރިމަގުގައި ދާއިރާ އިތުރަށް ތަރައްޤިވެގެން އައުމުގައި ފެނަކައިގެ ޙިއްސާކަމަށެވެ.
ސަޢީދު ވިދާޅުވީ ފެނަކައިގެ މިސްރާބު މިހާރު ހުރީ މި ދާއިރާއިން ހޯދުންތައް ހޯދާ، ބައިނަލްއަޤްވާމީ ފެންވަރުގައި ފާހަގަކުރެވޭ މަސައްކަތްތަކާ ދިމާލަށްކަމަށެވެ. މިގޮތުން މިހާރުވެސް ފެނާއި ނަރުދަމާގެ ދިރާސާއަކާއި އިއާދަކުރަނިވި ހަކަތައިގެ ދިރާސާއެއް ފަށައިގެން ކުރިއަށްދާކަމަށް އޭނާ ވިދާޅުވިއެވެ.
އުންމީދަކީ މި މަސައްކަތްތަކަކީ ބައިނަލްއަޤްވާމީ ރޮނގުގައި ފާހަގަކޮށްލެވޭ މަސައްކަތަކަށް ހެދުން. މިހާރުވެސް ނެދަލެންޑްގެ 1 ނަންބަރު ޔުނިވަރސިޓީ ޑެލްފާ ގުޅިގެން އެބަ މަސައްކަތްކުރެވޭ. އަދި ލަންކާއާއި އިންޑިއާގެ އެކިއެކި ޔުނިވަރސިޓީތަކާއެކުވެސް އެއްބަސްވުން ހެދުމަށް ދަނީ ތައްޔާރުވަމުން." ފެނަކައިގެ މެނޭޖިން ޑިރެކްޓަރ ވިދާޅުވިއެވެ.
ސަޢީދު ވިދާޅުވީ ފެނަކައަކީ އަމިއްލަ ފައިމައްޗަށް ތެދުވެފައިވާ ކުންފުންޏެއްކަމަށެވެ. އެންމެ ޒަމާނީ ވަސީލަތްތައް ފެނަކައިގެ އިންޖީނުގެތަކުގައި ބޭނުންކުރަމުން އަންނައިރު، އިންޖީނުތަކާއި ގުޅޭ އަދި ޓެކްނިކަލް ހުރިހާ މަސައްކަތްތައްވެސް ބަލަހައްތަނީ ކުންފުނީގެ %100 ދިވެހި މުވައްޒަފުންކަމަށް ސަޢީދު ވިދާޅުވިއެވެ.
ފެނަކަ އިނސްޓިޓިއުޓުންދަނީ ޓެކްނިކަލް ދާއިރާތަކުގެ އިތުރުން، ފެނާއި ކަރަންޓާއި ނަރުދަމާގެ ދާއިރާގެ އިދާރީ މަސައްކަތްތަކާއި ގުޅޭ ދާއިރާކުގެ ކޯސްތައް ފެށުމަށްވެސް ތައްޔަރުވަމުންނެވެ.
ފެނަކައިން ކުރިއަށްގެންދާ "ފުނަރު"ޕްރޮގްރާމްގެ ތަމްރީން ރާއްޖޭގެ 8 ސަރަޙައްދުގައި ކުރިއަށްގެންދިޔައެވެ. އެއީ ށ.މިލަންދޫ، ހދ.ކުޅުދުއްފުށީ، ނ.ވެލިދޫ، ތ.ވިލިފުށި، ދ.ކުޑަހުވަދީ، ބ.އޭދަފުށި އަދި ފުވައްމުލައް ސިޓީއާއި އައްޑޫ ސިޓީގައެވެ. މިއީ ލިވެލް 3ގެ ކޯސްތަކެކެވެ.