ޔޫކްރެއިންގެ ނިއުކްލިއަރ ސައިޓްތަކުގެ ސަލާމަތާއި ރައްކާތެރިކަން ކަށަވަރުކުރުމަށް އެޓޮމިކް ހަކަތައާބެހޭ ބައިނަލްއަޤްވާމީ އިދާރާީ (އައި.އޭ.އީ.އޭ)އާއެކު މަސައްކަތްކުރުމަށް އދގެ އިސް އޮފިޝަލަކު ހުރިހާ ފަރާތްތަކަށް ގޮވާލައްވައިފިއެވެ.
އދގެ ސަލާމަތީ މަޖިލީހުގައި އދގެ އަންޑަރ ސެކްރެޓަރީ ޖެނެރަލް ފޮރ ޕޮލިޓިކަލް އެންޑް ޕީސްބިލްޑިންގ އެފެއަރޒް ރޯޒްމެރީ ޑިކާލޯ ވިދާޅުވީ ޔޫކްރެއިންގެ ނިއުކްލިއަރ ޕަވަރ ޕްލާންޓްތައް ރައްކާތެރި އަދި އިތުބާރު ހިފޭ ގޮތެއްގައި ހިންގޭނެ ފަދަ އެކަށީގެންވާ އޮނިގަނޑެއް އެކުލަވާލުމަށް އައި.އޭ.އީ.އޭ އާއެކު ހުރިހާ ފަރާތްތަކަކުންވެސް މަސައްކަތް ކުރުމަކީ ވަރަށް މުހިންމު ކަމެއް ކަމަށެވެ. ޑިކާލޯ ވިދާޅުވީ ޔޫކްރެއިންގެ ޒަޕޯރިިިިްޒިއާ ނިއުކްލިއަރ ޕަވަރ ޕްލާންޓް ވަށައިގެން ވަރުގަދަ ކުރިމަތިލުންތަކެއް ހިނގަމުންދާ ކަމުގެ ވަރަށް ބިރުވެރި ރިޕޯޓުތައް ސެކްޓެރީ ޖެނެރަލަށް ލިބިލައްވާފައިވާކަމަށެވެ. އަދި ހަމަލާތަކުގެ އަސަރު ޓްރެއިނިން ފެސިލިޓީއަކަށް ކުރިކަން އިނގޭ ކަމަށާއި މިއީ ވަރަށް ޒިންމާފާރު ކުޑަ އަމަލެއްކަމަށެވެ.
އޭނާ އިތުރަށް ވިދަޅުވީ ނިއުކްލިއަރ ސައިޓްތަކާއި އެނޫންވެސް ނާޒުކު މަދަނީ އިންފްރާސްޓްރަކްޗަރތަކުގެ ވަށައިގެން ހިންގާ އަސްކަރީ އޮޕަރޭޝަންތަކަކީ ބަލައިގަނެވޭނެ ކަމެއް ނޫންކަމަށެވެ.
ހުކުރު ދުވަހު ޒަޕޯރިުޒިއާ ޕްލާންޓްގެ ބޭރުގައި ހުރި ތަމްރީނު ހަދަމުންދިޔަ އިމާރާތެއްގައި ވަނީ އަލިފާން ރޯވެފައެވެ. ކައިރީގައި އޮންނަ ސިޓީއެއްގެ ޓައުންގެ މޭޔަރު ވިދާޅުވީ އެއީް މެދުނުކެނޑި ބަޑީގެ ހަމަލާތައް ދިނުމުގެ ނަތީޖާ ކަމަށެވެ.
ޔޫކްރެއިނާއި ރަޝިޔާއާ ދެމެދު ބާއްވައި ޞުލްޙައިގެ މަޝްވަރާތަކުގެ ތިންވަނަ ބުރެއް ބޭއްވުމަށް އެއްބަސްވި ނަމަވެސް އެ ބައްދަލުވުން ބާއްވާނެ ތަނަކާއި ދުވަހެއް އަދި ނިންމާފައެއް ނުވެއެވެ. ބެލެވޭ ގޮތުގައި ތިންވަނަ ބުރުގެ މަޝްވަރާތައްވެސް ބާއްވާނީ ބެލަރޫސްގައެވެ.