ވިލާތުގެ އެންމެ ބޮޑު ނިޔުކްލިޔަރ މަރުކަޒު ރަޝިޔާގެ ބާރުގެ ދަށަށް ގެނެސްފިއެވެ.
ޔޫކްރެއިނުގައި ހަނގުރާމަކުރަމުންދާ ރަޝިޔާގެ ފައުޖުތަކުގެ ބާރުގެ ދަށަށް ޒަޕޮރްޖިޔާ ނިޔުކްލިޔަރ މަރުކަޒު ގެނެސްފައިވަނީ އެ ޤައުމުގެ ދެކުނުއިރުމަތީ ސަރަޙައްދުތަކަށް ދެމުންދާ ޙަމަލާތަކުގެ ތެރެއިންނެވެ. އެ ގޮތުން މީގެ ކުރިން ރަޝިޔާގެ ދިފާޢީ ވުޒާރާއިން ބުނެފައިވަނީ ޔޫކްރެއިނުގެ އިރުމަތީގެ ދޮންބާސުންނާއި ދެކުނުގެ ކުރިމިޔާއިން އެ ޤައުމަށް ޙަމަލާދެމުންދާ ފައުޖުތައް އަޒޯވު ކަނޑާ ދިމާލުން ގުޅާލާފައިވާކަމަށެވެ. އެ ލަޝްކަރުތަކުން ޒަޕޮރްޖިޔާ ހުންނަ ސަރަޙައްދަށް ދިން ޙަމަލާތައް އެ މަރުކަޒަށްވެސްވަނީ ޢަމާޒުވެފައެވެ. އެއާއެކު އެ މަރުކަޒުގެ އިމާރާތެއްގައި ވަރަށް ބޮޑަށް އަލިފާން ރޯވިއެވެ. ނަމަވެސް އިތުރު ގެއްލުމެއްވުމުގެ ކުރިން އެ މަރުކަޒުގައި ތިބި މުވައްޒަފުންވަނީ އަލިފާންގަނޑު ނިއްވާލައިފައެވެ.
ރަޝިޔާގެ ފައުޖުތަކުގެ ބާރުގެ ދަށަށް ޒަޕޮރްޖިޔާ ގެނައުމަށްފަހު އެ ޤައުމުން ބުނެފައިވަނީ އެ މަރުކަޒަށް ބޮޑު ގެއްލުމެއް ނުލިބޭކަމަށެވެ. ޒަޕޮރްޖިޔާގެ ހަ ނިޔުކްލިޔަރ ރިއެކްޓަރުގެ ތެރެއިން މަސައްކަތްކުރަނީ އެންމެ ރިއެކްޓަރެކެވެ. ރަޝިޔާގެ ސިފައިން ޒަޕޮރްޖިޔާ ހުންނަ ސަރަޙައްދުގައި ޙަމަލާބަދަލުކުރުމުން ދުނިޔޭގެ ޤައުމުތަކުންވަނީ ވަރަށް ބޮޑަށް ފާޑުކިޔައިފައެވެ. އެ ގޮތުން އެ މަރުކަޒުގެ ރިއެކްޓަރެއް ގޮވައި ބޮޑު އިންސާނީ ކާރިޘާއެއް ކުރިމަތިވުމުގެ ފުރުޞަތު އޮތްކަމަށް އެ ޤައުމުތަކުންވަނީ ފާހަގަކޮށްފައެވެ.
ފެބްރުއަރީ މަހުގެ 24ވަނަ ދުވަހު ވައިގެމަގުންނާއި ކަނޑުމަގުންނާއި އެއްގަމުން ޔޫކްރެއިނަށް ދޭން ފެށި ޙަމަލާތަކުގައި ރަޝިޔާގެ އަސްކަރީ ފައުޖުތަކުގެ ބާރުގެ ދަށަށް ކުރީގެ ރޫސީވިލާތުގެ މަޝްހޫރު ނިޔުކްލިޔަރ މަރުކަޒެއްކަމަށްވާ ޗަރްނޮބީލްވެސްވަނީ ގެނެސްފައެވެ. ޗަރްނޮބީލް އޮންނަނީ ބެލަރޫސްގެ ސަރަޙައްދީ ރޮނގު ހުރަސްކޮށް ޔޫކްރެއިނުގެ ވެރިރަށް ކިޔޭވަށް ދާން އޮންނަ މަގުމަތީގައެވެ. އެހެންކަމުން އެ ސަރަޙައްދު ރަޝިޔާގެ އަސްކަރިއްޔާގެ ބާރުގެ ދަށަށް ގެނައުމަށް ބޮޑު އިސްކަމެއް ދީފައިވެއެވެ. ރަޝިޔާގެ ދިފާޢީ ވުޒާރާއިން ބުނެފައިވަނީ ޗަރްނޮބީލުގައި ތިބި ޔޫކްރެއިނުގެ ސިފައިންނާ އެއްބަސްވުމަކަށް އައިސްފައިވާކަމަށާއި އެ ސަރަޙައްދު ބެލެހެއްޓުމުގައި ދެ ޤައުމުގެ ފައުޖުތަކުން ޙަރަކާތްތެރިވާނެކަމަށެވެ.
ދުނިޔޭގައި ހިނގި އެންމެ ނުރައްކާތެރި އަދި ގެއްލުން ބޮޑު ނިޔުކްލިޔަރ ޙާދިޘާ ހިނގާފައިވަނީ 1986ވަނަ އަހަރު ޗަރްނޮބީލްގައެވެ. އެ ޙާދިޘާގައި ޗަރްނޮބީލުގެ ނިޔުކްލިޔަރ ރިއެކްޓަރެއް ގޮވައި 100އެއްހާ މީހުން މަރުވިއެވެ.