ރަޝިޔާއާ ދެކޮޅަށް ހަނގުރާމަކުރުމަށް 16،000އަށްވުރެ ގިނަ ބިދޭސީން ޔޫކްރެއިނަށް ވަރަށް އަވަހަށް އަންނާނެކަމަށް އެ ޤައުމުގެ ރައީސް ވޮލޮޑީމީރް ޒެލެންސްކީ ވިދާޅުވެއްޖެއެވެ.
މީސްމީޑިޔާގައި ޢާއްމުކުރެއްވި ވީޑިޔޯއެއްގައި ޒެލެންސްކީ ވިދާޅުވީ ރަޝިޔާގެ ފައުޖުތަކާ ކުރިމަތިލުމަށް ރަޙްމަތްތެރި ޤައުމުތަކުން ބާރުގަދަ އަދި ޒަމާނީ ހަތިޔާރު ޔޫކްރެއިނަށް ފޯރުކޮށްދެމުންދާކަމަށެވެ. އަދި ޔޫކްރެއިނުގެ މިނިވަންކަމުގެ ދިފާޢުގައި ހަނގުރާމަކުރުމަށް ބޭނުންވާ ބިދޭސީންނަށް އެ ޤައުމަށް އާދެވޭނެ ފަސޭހަ ގޮތްތަކެއް އިންތިޒާމުކުރައްވާނެކަމަށާއި ރަޝިޔާގެ ފައުޖުތަކާ ދެކޮޅަށް ކާމިޔާބު ހޯދޭނެކަމުގެ އުއްމީދު ބޮޑުކަމަށްވެސް އޭނާ ވިދާޅުވިއެވެ.
ފެބްރުއަރީ މަހުގެ 24ވަނަ ދުވަހު ކަނޑުމަގުންނާއި ވައިގެމަގުންނާއި އެއްގަމުން ޙަމަލާދެމުންދާ ރަޝިޔާގެ ފައުޖުތަކާ ދެކޮޅަށް ހަނގުރާމަކުރުމަށް ޔޫކްރެއިނަށް އަންނަން ބޭނުންވާ މީހުންނަށް ވިސާއަކާ ނުލައި އެ ޤައުމަށް އެތެރެވެވޭނެ ގޮތްވަނީ ހަމަޖައްސައިފިއެވެ. އޭގެ އިތުރުން ޔޫކްރެއިނުގެ ސަރުކާރުންވަނީ ޢާއްމުންގެ އެތައް ހާސް މީހުންނަށް ހަތިޔާރު ބަހައި ރަޝިޔާގެ ފައުޖުތަކާ ކުރިމަތިލުމަށް ބާރުއަޅައިފައެވެ.
ރަޝިޔާއިން ދެމުންދާ ޙަމަލާތަކަކީ ވިލާތާ ދެކޮޅަށް ކުރަމުންދާ ހަނގުރާމައެއްކަމަށް ވިދާޅުވެ ޒެލެންސްކީވަނީ ޔޫކްރެއިނުގެ ދިފާޢުގައި ހަނގުރާމައަށް އަންނަ މީހުންނަށް ޚާއްޞަ ފައުޖެއްކަމަށްވާ އިންޓަނޭޝަނަލް ލީޖަން އޮފް ޓެރިޓޯރިޔަލް ޑިފެންސް އޮފް ޔޫކްރެއިނު އުފައްދަވައިފައެވެ. އަދި ޔޫކްރެއިނުގެ ރައްޔިތުންނާއެކު ހަނގުރާމަކުރުމަށް ރަޝިޔާ ނޫން ދުނިޔޭގެ ކޮންމެ ސަރަޙައްދަކުން އަންނަ ކޮންމެ މީހަކަށްވެސް އެ ޤައުމުން މަރްޙަބާކިޔާނެކަމަށް އޭނާވަނީ ވިދާޅުވެފައެވެ.
އަލްބޭނިޔާއާއި ކޮސޯވޯއާއި ބޮސްނިޔާގެ ކުލީ ސިފައިން ރަޝިޔާގެ ފައުޖުތަކާ ކުރިމަތިލުމަށް ޔޫކްރެއިނުގެ އިރުމަތީ ސަރަޙައްދުތަކަށް ފޮނުވުމަށް މަސައްކަތްކުރަމުންދާކަމަށް ރަޝިޔާގެ ޚާރިޖީ ވަޒީރު ސަރްގައި ލަވްރޯފްވަނީ ވިދާޅުވެފައެވެ.