"ހަފްތާރެސް" ޕްރޮގްރާމްގެ ތެރެއިން ވިލުންތެރި މުޖުތަމަޢެއް ބިނާކުރުމަަށް ޒުވާނުންގެ ދަޢުރާގުޅޭ ސެޝަންތައް ފަށައިފިއެވެ. މި ސެޝަންތަކުގައި މައިގަނޑު 4 ބަޔަކަށް ޒުވާނުންނަށް މަޢުލޫމާތުދީ، ސެޝަންތައް ކުރިއަށްގެންދާނެއެވެ.
"ހަފްތާރެސް"ގެ 6ވަނަ ޕްރޮގްރާމް ކުރިއަށްގެންދަނީ ތ.ވޭމަންޑޫގައެވެ. މި ޕްރޮގްރާމް ކުރިއަށްގެންދަނީ އަތޮޅުގެ އެހެން ރަށްތަކުގެވެސް ބައިވެރިވުމާއެކުއެވެ. ހަފްތާރެސްގައި ޒުވާނުންނަށް ޚާއްސަކޮށްގެން ފެށި، ވިލުންތެރި މުޖުތަމަޢެއް ބިނާކުރުމުގެ ޕްރޮގްރާމްގައި 41 ޒުވާނުން ބައިވެރިވެއެވެ.
މި ސެޝަންތައް ފައްޓަވައިދެއްވީ މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނީ އެމްޕަވަރމަންޓްގެ ސްޓޭޓް މިނިސްޓަރ ހުސައިން އިސްމާއިލްއެވެ. ސެޝަން ފައްޓަވައިދެއްވާ ވާހަކަދައްކަވަމުން ސްޓޭޓް މިނިސްޓަރ ވިދާޅުވީ މުޖުތަމަޢެއް ބިނާކުރުމުގެ އެންމެ ބޮޑު ޒިންމާއެއް އޮތީ ޒުވާނުންނަށްކަމަށެވެ. އަދި ސަރުކާރުން ކިތަންމެ މަސައްކަތެއް ކުރި ނަމަވެސް، ރަނގަޅު މުޖުތަމަޢެއް ބިނާކުރެވޭނީ ޒުވާނުންގެ އެއްބާރުލުން ސަރުކާރާއެކު ފުރިހަމައަށް ލިބި ހިއްސާ އޮވެގެން ކަމަށް ސްޓޭޓް މިނިސްޓަރ ވިދާޅުވިއެވެ.
"މީހުން ދައްކާ ކޮންމެ ވާހަކައެއް ގަބޫލުކޮށް އެކަންކަމަށް ހެއްލުމަކީ ކޮށްގެންވާނެ ކަމެއް ނޫން. އޭގެ ބަދަލުގައި ހަރުދަނާ ކަންކަން ބަލައި ހޯދާ، ޙަޤީގަތް ހޯދާ ބަޔަކަށް ޒުވާނުން ވާންވާނީ." ހުސައިން އިސްމާއިލް ވިދާޅުވިއެވެ.
ޒުވާނުންނަށް ކުރިއަށްގެންދާ ޕްރޮގްރާމްގެ މަޢުލޫމާތު ޙިއްސާކުރައްވަމުން ޔޫތު މިނިސްޓްރީން ވިދާޅުވީ މިސެޝަންތަކުގެ ތެރޭގައި އަމާން މުޖުތަމަޢެއް ބިނާކުރުމާއި، ޒުވާނުންގެ މެދުގައި ކަންކަމުގައި އިސްނެގުމުގެ ރޫހު އާލާކުރުމާއި ގުޅޭ ސެޝަންތައް ގެންދާނެކަމަށެވެ. އަދި ކުރިމަތިވާ މައްސަލަތަކާއި ކުރިމަތިލާނެ ގޮތްތަކާއި، އެހީތެރިކަން ހޯދުމުގެ ޢަމަލުކުރާނެ ގޮތްތަކުގެ އިތުރުން މާލީ ފުދުންތެރިކަން އިތުރުކޮށް ފައިސާ ގެންގުޅޭނެ ގޮތްތަކާއި ގުޅޭ މަޢުލޫމާތު ހިއްސާކުރާނެއެވެ.
މި ސެޝަންތައް ކުރިއަށް ގެންދަނީ އެން.ސީ.ޓީ.ސީ، ޔޫތު މިނިސްޓްރީ، މޯލްޑިވްސް ޕޮލިސް ސަރވިސްއާއި ދިވެހިރާއްޖޭގެ އިސްލާމީ ޔުނިވަރސިޓީގެ އިތުރުން މޯލްޑިވިއަން ރެޑްކްރެސެންޓްގެ ފަރާތުންނެވެ.
ހަފްތާރެސް ޕްރޮގްރާމްގެ ޒުވާނުންގެ ބައިގައި ތ.އަތޮޅުގެ އެކި ރަށްތަކުގެ ޒުވާނުން ބައިވެރިވެއެވެ. ހަފްތާރެސް ޕްރޮގްރާމަކީ 3 ދުވަހަށް ގެންދާ ޕްރޮގްރާމެކެވެ. މި ޕްރޮގްރާމްގައި މުޖުތަމައުގެ އެކި ގްރޫޕްތަކަށް ސެޝަން ކުރިއަށްގެންދިޔައެވެ.