އެތައް ހާސް މިސައިލަކާއި ރޮކެޓަކާއި އެނޫންވެސް ބަރުހަތިޔާރު ބޭނުންކޮށްގެން ރަޝިޔާގެ އަސްކަރިއްޔާއިން ޔޫކްރެއިނުގެ ބޮޑެތި ހުރިހާ ސަރަހައްދަކަށް ވަރުގަދަ ޙަމަލާތަކެއް ދީފިއެވެ.
ދެވަނަ ބޮޑު ހަނގުރާމައިގެ ފަހުން ވިލާތުގައި ކުރަމުންދާ އެންމެ ނުރައްކާތެރި ހަނގުރާމައިގައި ރަޝިޔާގެ އެތައް ހާސް ސިފައިންނެއްވަނީ ވައިގެ މަގުންނާއި އެއްގަމު މަގުންނާއި ކަނޑު މަގުން ދެމުންދާ ޙަމަލާތަކުގެ ނިވަލުގައި ޔޫކްރެއިނުގެ ތިން ސަރަޙައްދަކުން އެ ޤައުމަށް އަރައިފައެވެ. އަދި އެ ޤައުމުގެ މުޙިއްމު މަޤާމުތަކަށް ވައިކުޑައިގައި ރަޝިޔާގެ ސިފައިންވަނީ ފައިބައިފައެވެ. އޭގެ ތެރޭގައި ޔޫކްރެއިނުގެ ވެރިރަށް ކިޔޭވު ކައިރީގައި އޮންނަ ވައިގެ ބަނދަރަކާއި ޗެނޮބީލް ނިޔުކްލިޔަރ ރިއެކްޓަރު ހުރި ސަރަޙައްދު ހިމެނެއެވެ. ރަޝިޔާގެ ދިފާޢީ ވުޒާރާއިން ބުނެފައިވަނީ ފުރަތަމަ 24 ގަޑިއިރުގެ ތެރޭގައި ޙާޞިލްކުރަން ބޭނުންވި ހުރިހާ އަސްކަރީ ލަނޑުދަނޑިތަކެއް ކާމިޔާބުކަމާއެކު ޙާޞިލްކުރެވުނުކަމަށާއި ޔޫކްރެއިނުގެ 83 އަސްކަރީ މަރުކަޒެއް ނައްތާލާފައިވާކަމަށެވެ. އޭގެ ތެރޭގައި ގިނަ ޢަދަދެއްގެ އަސްކަރީ ވައިގެ ބަނދަރުތަކެއް ހިމެނެއެވެ. އެ ވުޒާރާއިން ބުނެފައިވަނީ ޔޫކްރެއިނުގެ އެކި އަސްކަރީ މަޤާމުތަކަށް ދެމުންދާ ޙަމަލާތަކުގައި މަދު ވަޤުތުކޮޅެއްގެ ތެރޭގައި އެ ޤައުމުގެ ވައިގެ ދިފާޢީ ނިޒާމު ނައްތާލެވިފައިވާކަމަށެވެ. އަދި ރަޝިޔާގެ ޙަމަލާތައް ޢަމާޒުކުރަމުންދަނީ ޔޫކްރެއިނުގެ އަސްކަރީ މަޤާމުތަކަށްކަމަށާއި ބޭނުމަކީ އަސްކަރީ ގޮތުން ޔޫކްރެއިނު ބަލިކަށިކޮށްލުންކަމަށް އެ ވުޒާރާއިން ބުނެފައިވެއެވެ.
44 މިލިޔަން މީހުންގެ އާބާދީއެއް އޮންނަ ޔޫކްރެއިނުގެ ޞިއްޙަތާބެހޭ ވުޒާރާއިން ބުނެފައިވާ ގޮތުގައި ރަޝިޔާއިން ދެމުންދާ ޙަމަލާތަކުގައި 70އަށްވުރެ ގިނަ މީހުން މަރުވެ 200އަށްވުރެ ގިނަ މީހުން ޒަޚަމުވެ 100،000އަށްވުރެ ގިނަ މީހުންގެ ގެދޮރުގެއްލިފައިވާކަމަށެވެ. އަދި ޔޫކްރެއިނު ދޫކޮށް އެހެން ޤައުމުތަކަށް ދިޔުމަށް މަސައްކަތްކުރާ މީހުންނަށް އޯގާތެރިކަމާއެކު އެހީތެރިކަން ފޯރުކޮށްދިނުމަށް އދންވަނީ އަވަށްޓެރި ޤައުމުތަކަށް ގޮަވާލައިފައެވެ.
އެންމެ ވަރުގަދަ ކުރިމަތިލުންތަކެއް ހިނގަމުންދާ ޔޫކްރެއިނުގެ ވެރިރަށް ކިޔޭވުގައި ހުންނަވައި އެ ޤައުމުގެ ރައީސް ވޮލޮޑީމީރް ޒެލެންސްކީ ވިދާޅުވީ ރަޝިޔާގެ ފައުޖުތަކުން ބޭނުންވަނީ އޭނާ ހައްޔަރުކޮށް އެ ޤައުމުގެ ވެރިކަން ބަދަލުކުރަންކަމަށެވެ. އޭނާވަނީ ޔޫކްރެއިނުގެ ދިފާޢުގައި ހުޅަނގުގެ އެއްވެސް ޤައުމަކުން އެހީތެރިކަން ފޯރުކޮށްނުދޭކަމަށް ބުނެ ވިލާތުގެ އިއްތިޙާދާއި ހުޅަނގުގެ އަސްކަރީ އިއްތިޙާދު، ނޭޓޯއަށް ވަރަށް ބޮޑަށް ފާާޑުވިދާޅުވެފައެވެ. ޔޫކްރެއިނަކީ އެ ދެ އިއްތިޙާދުގެ މެންބަރުކަން އޮންނަ ޤައުމެއް ނޫނެވެ. އެހެންކަމުން އެ ދެ އިއްތިޙާދުންވަނީ ޔޫކްރެއިނުގެ ދިފާޢުގައި އަސްކަރީ ގޮތުން ރަޝިޔާއާ ކުރިމަތިލުމަށް ދެކޮޅުހަދައިފައެވެ. ނަމަވެސް ހުޅަނގުގެ ބާރުތަކުންވަނީ ރަޝިޔާއާ ދެކޮލަށް ހަރުކަށި ދަތިކުރުމުގެ ފިޔަވަޅުތަކެއް އަޅައިފައެވެ.
އަމިއްލައަށް މިނިވަންކަން އިޢުލާންކޮށްފައިވާ ޔޫކްރެއިނުގެ އިރުމަތީގައި އޮންނަ ދޮންބާސްގެ ދެ ދަޢުލަތުގެ ދިފާޢުގައި އެ ޤައުމުގައި އަސްކަރީ ޙަރަކާތްތަކެއް ހިންގުމުގެ ޢަމުރުދެއްވާފައިވާކަން އިޢުލާންކުރައްވަމުން ރަޝީޔާގެ ރައީސް ވުލަޑުމީރް ޕުޓިން ވިދާޅުވީ ޔޫކްރެއިނު އިސްތިޢުމާރުކުރުމުގެ އެއްވެސް ވިސްނުމެއް ރަޝިޔާއިން ނުގެންގުޅޭކަމަށެވެ. އަދި ރަޝިޔާގެ އަސްކަރީ ޙަރަކާތްތަކުގެ ބޭނުމަކީ ދޮންބާސްގައި ފާއިތުވި 8 އަހަރުދުވަހު ޔޫކްރެއިނުގެ ފައުޖުތައް ހިންގަމުންދާ ލާއިންސާނީ ޖަރީމާތަކާއި ޤަތުލުޢާއްމު ހުއްޓުވުންކަމަށް ޕުޓިން ވިދާޅުވިއެވެ. އޭނާ ވިދާޅުވި ގޮތުގައި ރަޝިޔާގެ އަސްކަރީ ޙަރަކާތުގެ ދަށުން ޔޫކްރެއިނުގެ އަސްކަރީ ބާރުވެރިކަން ނައްތާލައި އެ ޤައުމުގެ ރައްޔިތުންނާ ދެކޮޅަށް އަނިޔާވެރިވުމުގެ ޢަމަލުތައް އިތުރަށް ނުހިންގޭނެކަން ކަށަވަރުކުރާނެއެވެ. ޔޫކްރެއިނަށް ޙަމަލާ ދިނުން ނޫން ގޮތެއް ރަޝިޔާއަށް ނެތްކަން ފާހަގަކުރައްވައި ޕުޓިން ވިދާޅުވީ ނޭޓޯގެ މެންބަރުކަން ޔޫކްރެއިނަށް ދުވަހަކުވެސް ނުދޭނެކަމުގެ ޔަޤީންކަން ދިނުމަށް އެ އިއްތިޙާދުން ދެކޮޅުހެދިކަމަށެވެ. އަދި ރަޝިޔާއާ އިންވެގެން އޮންނަ ޔޫކްރެއިނަށް ނިޔުކްލިޔަރ ހަތިޔާރުގެ ޤާބިލްކަމާއި ބާރުވެރިކަން ހޯދުމުގެ ފުރުޞަތު ނުދެއްވާނެކަމަށްވެސް ޕުޓިން ވިދާޅުވިއެވެ.
2008ވަނަ އަހަރުގެ ތެރޭގައި ރަޝިޔާއާ އިންވެގެން އޮންނަ ޖޯޖިޔާގައި ދިރިއުޅޭ ރަޝިޔާ ބަހުން ވާހަކަދައްކައި ރަޝިޔާގެ ރައްޔިތުންނާ ދެކޮޅަށް ޖޯޖިޔާގެ އަސްކަރިއްޔާއިން ޤަތުލުޢާއްމެއް ހިންގުމުން ރަޝިޔާއިންވަނީ ސަރަޙައްދީ ރޮނގު ހުރަސްކޮށް ޖޯޖިޔާއަށް ވަރުގަދަ ޙަމަލާތަކެއް ދިނުމަށް އެ ސަރަޙައްދުތައް ރަޝިޔާގެ ބާރުގެ ދަށަށް ގެނެސްފައެވެ. އެ ސަރަޙައްދުތަކުން ރަޝިޔާގެ ފައުޖުތައް ފޭބީ އެ ސަރަޙައްދުތަކުގައި ދިރިއުޅޭ ރައްޔިތުންނަށް އެއްވެސް ގޯނާއެއް ނުކުރާނެކަމުގެ ޔަޤީންކަން ޖޯޖިޔާއިން ދިނުމުންނެވެ. އަދި 2014ވަނަ އަހަރުގެ ތެރޭގައި ޔޫކްރެއިންނަށް ޙަމަލާ ދިނުމަށްފަހު އެ ޤައުމުގެ ކުރިމިޔާ ސަރަޙައްދުވަނީ ރަޝިޔާގެ ބާރުގެ ދަށަށް ގެނެސްފައެވެ.