ޔޫކްރެއިނަށް ދެމުންދާ ޙަމަލާތަކުގައި އެ ޤައުމުގެ ވައިގެ ދިފާޢީ ނިޒާމު ނައްތާލެވިއްޖެކަމަށް ރަޝީޔާއިން ބުނެފިއެވެ.
ރަޝިޔާގެ ދިފާޢީ ވުޒާރާއިން ނެރުނު ބަޔާނެއްގައި ބުނެފައިވަނީ ޔޫކްރެއިނުގެ އެކި އަސްކަރީ މަޤާމުތަކަށް ދެމުންދާ ޙަމަލާތަކުގައި މަދު ވަޤުތުކޮޅެއްގެ ތެރޭގައި އެ ޤައުމުގެ ވައިގެ ދިފާޢީ ނިޒާމު ނައްތާލެވިފައިވާކަމަށެވެ. އަދި ރަޝިޔާގެ ޙަމަލާތައް ޢަމާޒުކުރަމުންދަނީ ޔޫކްރެއިނުގެ އަސްކަރީ މަޤާމުތަކަށްކަމަށާއި ބޭނުމަކީ އަސްކަރީ ގޮތުން ޔޫކްރެއިނު ބަލިކަށިކޮށްލުންކަމަށް އެ ބަޔާނުގައި ބުނެފައިވެއެވެ.
ރަޝިޔާގެ ރައީސް ވުލަޑުމީރް ޕުޓިންގެ އެންގެވުމަށް ބަރުހަތިޔާރާއެކު އެތައް ހާސް ސިފައިންނެއްވަނީ ތިން ސަރަޙައްދަކުން ޔޫކްރެއިނަށް ޙަމަލާ ދޭން ފަށައިފައެވެ. އެ ގޮތުން އަވަށްޓެރި ބެލަރޫސުންނާއި ޔޫކްރެއިނުގެ ހުޅަނގުގެ ސަރަހައްދުތަކުންނާއި 2014ވަނަ އަހަރުގެ ތެރޭގައި ރަޝިޔާގެ ބާރުގެ ދަށަށް ގެނެސްފައިވާ ޔޫކްރެއިނުގެ ކުރިމިޔާ ސަރަޙައްދު ބޭނުންކޮށްގެން ރަޝިޔާއިންވަނީ ވަރުގަދަ ޙަމަލާތަކެއް ދޭން ފަށައިފައެވެ. ބެލަރޫސްގެ ސަރަޙައްދު ބޭނުންކޮށްގެން ރަޝިޔާއިން ޔޫކްރެއިނަށް ޙަމަލާ ދެމުންދިޔަ ނަމަވެސް ބެލަރޫސުން ބުނެފައިވަނީ ޔޫކްރެއިނަށް ދެމުންދާ ޙަމަލާގައި އެ ޤައުމުގެ އަސްކަރިއްޔާއިން ބައިވެރިނުވާކަމަށެވެ.
އަމިއްލައަށް މިނިވަންކަން އިޢުލާންކޮށްފައިވާ ޔޫކްރެއިނުގެ ދޮންބާސްގެ ދެ ދަޢުލަތުގެ ދިފާޢުގައި އެ ޤައުމުގައި އަސްކަރީ ޙަރަކާތްތަކެއް ހިންގުމުގެ ޢަމުރުދެއްވާފައިވާކަން އިޢުލާންކުރައްވަމުން ޕުޓިން ވިދާޅުވީ ޔޫކްރެއިނު އިސްތިޢުމާރުކުރުމުގެ އެއްވެސް ވިސްނުމެއް ރަޝިޔާއިން ނުގެންގުޅޭކަމަށެވެ. އަދި ރަޝިޔާގެ އަސްކަރީ ޙަރަކާތްތަކުގެ ބޭނުމަކީ ދޮންބާސްގައި ފާއިތުވި 8 އަހަރުދުވަހު ޔޫކްރެއިނުގެ ފައުޖުތައް ހިންގަމުންދާ ލާއިންސާނީ ޖަރީމާތަކާއި ޤަތުލުޢާއްމު ހުއްޓުވުންކަމަށް ޕުޓިން ވިދާޅުވިއެވެ. އޭނާ ވިދާޅުވި ގޮތުގައި ރަޝިޔާގެ އަސްކަރީ ޙަރަކާތުގެ ދަށުން ޔޫކްރެއިނުގެ އަސްކަރީ ބާރުވެރިކަން ނައްތާލައި އެ ޤައުމުގެ ރައްޔިތުންނާ ދެކޮޅަށް އަނިޔާވެރިވުމުގެ ޢަމަލުތައް އިތުރަށް ނުހިންގޭނެކަން ކަށަވަރުކުރާނެއެވެ.
ރަޝިޔާއިން ވަރުގަދަ ޙަމަލާތަކެއް ދޭން ފެށުމުން ޔޫކްރެއިނުން ބުނެފައިވަނީ މުޅި ޤައުމު އިސްތިޢުމާރުވުމުގެ ބިރު އޮތްކަމަށާއި ބައިނަލްއަޤްވާމީ އެހީތެރިކަން ބޭނުންވާކަމަށެވެ. ނަމަވެސް ހުޅަނގުގެ ބާރުތަކުން ޔޫކްރެއިނުގެ ދިފާޢުގައި ރަޝިޔާއާ ކުރިމަތިލުމުގެ ވިސްނުމެއް ނުގެންގުޅެއެވެ. ރަޝިޔާއިން ޔޫކްރެއިނަށް ޙަމަލާ ދޭން ފަށައިފައިވަނީ އެމެރިކާއާއި ކެނެޑާއާއި އޮސްޓުރޭލިޔާއާއި ޖަޕާނާއި އިނގިރޭސިވިލާތާއި ވިލާތުގެ އިއްތިޙާދުން އެއްގަލަކަށް އަރައި ރަޝިޔާއާ ދެކޮޅަށް ހަރުކަށި އިޤްތިޞާދީ ދަތިކުރުމުގެ ފިޔަވަޅުތަކެއް އަޅާފައިވަނިކޮށެވެ. ރަޝިޔާއިން ބުނެފައިވަނީ އެ ޤައުމާ ދެކޮޅަށް އަޅައި ދަތިކުރުމުގެ ފިޔަވަޅަކުން ލިބޭނެ ގެއްލުމެއް ނެތްކަމަށާއި އެފަދަ ފިޔަވަޅުތަކަކީ އައު ކަމެއް ނޫންކަމަށެވެ.
2008ވަނަ އަހަރުގެ ތެރޭގައި ރަޝިޔާއާ އިންވެގެން އޮންނަ ޖޯޖިޔާގައި ދިރިއުޅޭ ރަޝިޔާ ބަހުން ވާހަކަދައްކައި ކުރީގެ ރަޝިޔާގެ ރައްޔިތުންނާ ދެކޮޅަށް ޖޯޖިޔާގެ އަސްކަރިއްޔާއިން ޤަތުލުޢާއްމެއް ހިންގުމުން ރަޝިޔާއިންވަނީ ސަރަޙައްދީ ރޮނގު ހުރަސްކޮށް ޖޯޖިޔާއަށް ވަރުގަދަ ޙަމަލާތަކެއް ދިނުމަށް އެ ސަރަޙައްދުތައް ރަޝިޔާގެ ބާރުގެ ދަށަށް ގެނެސްފައެވެ. އެ ސަރަޙައްދުތަކުން ރަޝިޔާގެ ފައުޖުތައް ފޭބީ އެ ސަރަޙައްދުތަކުގައި ދިރިއުޅޭ ރައްޔިތުންނަށް އެއްވެސް ގޯނާއެއް ނުކުރާނެކަމުގެ ޔަޤީންކަން ޖޯޖިޔާއިން ދިނުމުންނެވެ. އަދި 2014ވަނަ އަހަރުގެ ތެރޭގައި ޔޫކްރެއިންނަށް ޙަމަލާ ދިނުމަށްފަހު އެ ޤައުމުގެ ކުރިމިޔާ ސަރަޙައްދުވަނީ ރަޝިޔާގެ ބާރުގެ ދަށަށް ގެނެސްފައެވެ.