ރަޝިޔާގެ ރައީސް ވުލަޑުމީރް ޕުޓިންގެ އަމުރުފުޅަށް، ރަޝިޔާއިން ޔޫކްރެއިންގެ އިރުމަތީ ދޮންބާސް ސަރަޙައްދުގައި މިލިޓަރީ އޮޕަރޭޝަނެއް ފަށައިފިއެވެ.
ޔޫކްރެއިނުގެ އިރުމަތީގައި އޮންނަ ދޮންބާސްގެ ދޮނެސްކާއި ލުހާންސްކަކީ މިނިވަން ދައުލަތްތަކެއްގެ ގޮތުގައި ރަޝިޔާއިން ވަނީ މިގެ ދެ ދުވަސްކުރިން ބަލައިގެންފައެވެ. އަދި އެ ސަރަހައްދުގައި ރަޝިޔާގެ މިލިޓަރީ އޮޕަރޭޝަނެއް ފަށާފައިވާއިރު، ދޮންބާސްގެ ދޮނެސްކާއި ލުހާންސްކުން ވަނީ ރަޝިޔާގެ އެހީތެރިކަމަށް އެދިފައެވެ.
ރަޝިޔާ ގަޑިން މިއަދު ހެނދުނު 6:00 އެހާކަންހާއިރު ޓީވީ މެދުވެރިކޮށް ދެއްވި ބަޔާނެއްގައި ރަޝިޔާގެ ރައީސް ވުލަޑުމީރް ޕުޓިން ވިދާޅުވީ ޔޫކްރެއިންގައި ރަޝިޔާއިން މިލިޓަރީ އޮޕަރޭޝަނެއް ފެށުމަށް ނިންމާފައިވާކަމަށެވެ. އަދި ޔޫކްރެއިން ސިފައިން ހަތިޔާރު ބެހެއްޓުމަށްވެސް ޕުޓިން ވަނީ ގޮވާލައްވާފައެވެ. ނަމަވެސް މިއީ ޔޫކްރެއިން ހިފަން ރަޝިޔާއިން ކުރާ ކަމެއް ނޫންކަމަށާއި، މިއީ ދޮންބާސްގެ ދޮނެސްކާއި ލުހާންސްކުގެ ރައްޔިތުންގެ ސަލާމަތާއި ރައްކާތެރިކަމަށް އަޅާ ފިޔަވަޅެއްކަމަށްވެސް ޕުޓިން ވިދާޅުވިއެވެ.
ރަޝިޔާގެ މިލިޓަރީ އޮޕަރޭޝަން ފެށުމާއެކު ޔޫކްރެއިން އެކަން ސިފަކޮށްފައިވަނީ ޔޫކްރެއިން ހިފުމުގެ މަސައްކަތް ރަޝިޔާއިން ފެށުންކަމަށެވެ. ޔޫކްރެއިންގެ ފޮރިން މިނިސްޓަރ ކުރެއްވި ޓްވީޓެއްގައިވެސް ވަނީ ރަޝިޔާއިން ޔޫކްރެއިން ހިފުމުގެ މަސައްކަތް ފަށާފައިވާކަމަށް ވިދާޅުވެފައެވެ.
ހަބަރުތައް ބުނާގޮތުން ޔޫކްރެއިންގެ އިރުމަތީ ބައެއް ސަރަހައްދުތަކުން ގޮވުންތަކުގެ އަޑުތައް ދަނީ އިވެމުންނެވެ. ނަމަވެސް ރަޝިޔާގެ ކަމާއިބެހޭ ފަރާތްތަކާއި ހަވާލާދީ ހަބަރުތައް ބުނާގޮތުން ރަޝިޔާއިން ޔޫކްރެެއިންގެ އާއްމުން އުޅޭ ސިޓީތަކަށް މިހާތަނަށް ހަމަލާދީފައެއް ނުވެއެވެ. ނަމަވެސް ހަމަލާތައް އަމާޒު ވާނީ މިލިޓަރީ ތަންތަނަށްކަމަށް އޮފިޝަލަކު ވިދާޅުވެފައިވެއެވެ.