ސްޕެނިޝް ލަލީގާގައި ރެއާލް މެދްރިޑާއި އަލްވޭޒް ބައްދަލުކުރިމެޗް ރެއާލް ކާމިޔާބުކޮށްފިއެވެ. ރެއާލްގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ 3 ލަނޑު ސުންލަނޑުންނެވެ.
ރެއާލްގެ ފަރާތުން މޮޅު ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ރެއާލްއިންނެވެ. ނަމަވެސް މި މެޗްގެފުރަތަމަ ހާފްގައި ރެއާލްއަށް އަލަވޭޒްގެ ޑިފެންސް ފޫއަޅުވާލެވޭގޮތެއް ނުވިއެވެ. މިމެޗްގައި ރެއާލްގެ ފުރަތަމަ ލަނޑު މެޗްގެ 63 ވަނަ މިނެޓްގައި ޖަހައި، އެޓީމަށް ލީޑު ނަގައިދިނީ މާކޯ އަސެންސިއޯއެވެ. އަދި ދެވަނަ ލަނޑު މެޗްގެ 80 ވަނަ މިނެޓްގައި ވިނީޝިއަސް ޖޫނިއަރ ކާމިޔާބުކޮށްދިންއިރު ފަހު ލަނޑު މެޗްގެ އިތުރު ވަގުތުގައި ލިބުނު ޕެނަލްޓީއަކުން ކާމިޔާބުކޮށްދިނީ ކަރިމް ބެންޒީމާއެވެ.
މިކާމިޔާބީއާއެކު ރެއާލްއަށް މިހާރުވަނީ ކުޅުނު 25 މެޗުން ލިބިފައިވާ 57 ޕޮއިންޓާއެކު ތާވަލްގައި 7 ޕޮއިންޓްގެ ލީޑެއް ލިބިގެން ގޮސްފައެވެ. ދެވަނައިގައި އުޅޭ ސެވިއްޔާއަށް 24 މެޗުން ލިިފައިވަނީ 50 ޕޮއިންޓެވެ. އަދި އަލަވޭޒް ވަނީ 25 މެޗުން ލިބިފައިވާ 20 ޕޮއިންޓާއެކު ތާވަލްގެ 19 ވަނައަށް ވެއްޓިފައެވެ.