މަދަނީ ޖަމްޢިއްޔާތަކުގެ 4ވަނަ މަހާސިންތާ އއ.އުކުޅަހުގައި ބާއްވައިފިއެވެ.
މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އިން އިންތިޒާމްކޮށްގެން ކުރިއަށްގެންދާ މި މަހާސިންތާއަކީ އެ މިނިސްޓްރީން ކުރިއަށްގެންދާ މިފަދަ 4ވަނަ މަހާސިންތާއެވެ.
އުކުޅަހުގައި ބާއްވާ މި މަހާސިންތާއަކީ ހަތަރު އަތޮޅަކަށް ނިސްބަތްކޮށް ކުރިއަށް ގެންދާ މަހާސިންތާއެކެވެ. އެއީ އއ، އދ، މ، އަދި ފ، މި ހަތަރު އަތޮޅެވެ. 19 ޖަމްޢިއްޔާއަކުން 20 ބައިވެރިންނާއެކު ކުރިއަށްގެންދާ މި މަހާސިންތާ ކުރިއަށްގެންދިއުމަށް ހަމަޖެހިފައިވަނީ 4 ދުވަހުގެ މުއްދަތަކަށެވެ.
މުޖުތަމަޢުގައި ޙަރަކަތްތެރިވާ މަދަނީ ޖަމްޢިއްޔާތަކުގެ ގުޅުން ވަރުގަދަކޮށް ހަރުދަނާ މަދަނީ މުޖުތަމަޢެއް ބިނާކޮށް ފަހި ވެށްޓެއް ޤާއިމުކުރުމުގެ މަޤުސަދުގައި ބާއްވާ މި މަހާސިންތާގައި ޖަމްޢިއްޔާތައް ހިންގުމަށް ބޭނުންވާ ކަންކަން ދެނެގަތުމާއި، ޤައުމީ ތަރައްޤީއާއި، ހެޔޮ ވެރިކަން އަދި އިޖުތިމާއީ ތަފާތު މައްސަލަތަކުން އަރައިގަތުމުގައި ދިމާވާ ދަތިތަކާ ގުޅޭގޮތުން މަޝްވަރާ ކުރާނެއެވެ.
މި ފޯރަމްގެ ތެރޭގައި މުޖުތަމައުގެ އެކިއެކި ފަރާތްތަކަށް އަމާޒުކޮށް ހޭލުންތެރިކުރުމުގެ ޕްރޮގްރާމްތައް ކުރިއަށްދާނެއެވެ. އޭގެ ތެރޭގައި ނެޓްވޯކިން އަދި ފައިނޭންސިން ފަދަ ބައިވަރު ދާއިރާތަކުން މައުލޫމާތު ލިބިގެންދާނެއެވެ. މީގެ އިތުރުން ލީޑަރޝިޕް ޓްރޭނިންގ ފަދަ ޕްރޮގްރާމްތައްވެސް މި ފޯރަމްގެ ދަށުން ހިންގުމަށްވަނީ ހަމަޖެހިފައެވެ.
ޔޫތު މިނިސްޓްރީގެ ސްޓޭޓް މިނިސްޓަރ ހުސައިން އިސްމާޢީލް ވިދާޅުވީ މިމަހާސިންތާއަކީ މުޅި ރާއްޖޭގެ މަދަނީ ޖަމްޢިއްޔާތަކާ ބައްދަލުކުރުމުގެ ޕްރޮގްރާމްތަކުގެ ތެރެއިން ޕްރޮގްރާމްއެއްކަމަށެވެ. އެގޮތުން އެކިއެކި އަތޮޅުތަކުގެ ޖަމްޢިއްޔާތަކާ ބައްދަލުކުރުން ކުރިއަށް އޮތް މާޗް މަހުގެ ތެރޭ ނިމިގެންދާނެކަމަށްވެސް ސްޓޭޓް މިނިސްޓަރ ފާހަގަކުރެއްވިއެވެ.
" ދެން އަޅުގަނޑުމެންނަށް ބާކީ އޮންނާނީ ތ، ލ އަދި ދ، މި 3 އަތޮޅާއި މާލޭގެ މަދަނީ ޖަމިއްޔާތަކާ ބައްދަލުކުރުން. ކުރިއަށް އޮތް މަސްތެރޭ އަޅުގަނޑުމެން މި ދެ ފޯރަމްގެ މަސައްކަތްތައް ނިންމާލާނަން. " ސްޓޭޓް މިނިސްޓަރ ވިދާޅުވިއެވެ.
މުޅި ރާއްޖޭގެ ހިނގަމުންދާ މަދަނީ ޖަމިއްޔާތަކަށް އަމާޒުކޮށްގެން ކުރިއަށްގެންދާ މި ފޯރަމްގެ 4ވަނަ މަހާސިންތާ މިފަހަރު މެދު ރާއްޖޭގެ އަތޮޅުތަކުގައި ކުރިއަށްދާއިރު 3 ވަނަ މަހާސިންތާ ބާއްވާފައިވަނީ ރާއްޖޭގެ ދެކުނުގައެވެ. ޔޫތު މިނިސްޓްރީން މި ފޯރަމް ބާއްވާފައިވަނީ މޯލްޑިވްސް ޕޮލިސް ސަރވިސްއާއި އޫރިދޫ މޯލްޑިވްސްއާ ގުޅިގެންނެވެ.